Lunis ai 13 di Lui a colin 100 agns de dì che il Narodni dom, une volte la cjase de culture slovene plui innomenade a Triest, al è stât incendiât di bande dai fassiscj. De sô scree tal 1904 e fintremai ae sô distruzion tal 1920, al fo il simbul de rinassite etniche, politiche, culturâl e economiche de comunitât slovene di Triest: al ospitave une sdrume di istituzions slovenis e slavis, un teatri, un ristorant, un albierc e un cafè. Tal 1920, tai agns che il nazionalisim estremist si infuartive in dute Europe, al fo brusât dai fassiscj e nazionaliscj vuidâts di Francesco Giunta. Il fûc dal Narodni dom al fo la vitorie dal scuadrisim, dal fassisim e dal nazionalisim estremist in cheste zone di confin, di simpri abitade di minorancis etnichis e linguistichis. Il Narodni dom al brusà intant che lis autoritâts civîls e militârs dal Stât talian a stevin a cjalâ, cence fâ nuie par evitâlu. Plui tart, i proprietaris a scugnirin vendi la struture.
◆ Ancje se domandis di restituzion dal Narodni dom a rivarin a dret dopo de liberazion dal nazifassisim, si rivà a une prime soluzion de cuistion dome cu la leç 38 dal 2001 di tutele de minorance linguistiche slovene, li che tal articul 19 si fevele dal ritor des istituzions slovenis ancje tal Narodni dom di Triest.
◆ Cumò che la fase plui dure de pandemie di Covid-19 e somee passade e che i confins dal Friûl-Vignesie Julie cun Austrie e Slovenie a son di gnûf vierts, e je inmò plui impuartante la cerimonie di restituzion dal Narodni dom ae comunitât slovene de Regjon inmaneade juste ai 13 di Lui di chest an, tal 100m inovâl dal incendi. In cheste ocasion si incuintraran i presidents de Republiche di Slovenie e chel de Italie, Borut Pahor e Sergio Mattarella. Tal moment che si scrîf chest articul il program de visite dai doi cjâfs di stât nol è inmò definît, ma al somee che al cjali bande une plui fuarte riconciliazion tra i popui talian e sloven. I nazionalisims estremiscj, la seconde vuere mondiâl e lis ideologjiis totalitariis a àn lassât daûr une rie di sanc, soference, marum e asse intune zone multietniche e plurilengâl tant che chê dongje dal confin come che lu cognossin vuê. Al è di sperâ che chest event al sclarissi une volte par dutis ce che la plui part de int di cheste zone, usade di agnorums a vivi in buine armonie te multietnicitât, e sa bielzà. Come che no ducj i citadins de Gjermanie naziste a son stâts imbombâts di nazisim, cussì no ducj i citadins de Italie fassiste a son stâts imbombâts di fassisim e no ducj i slâfs a son stâts imbombâts di comunisim. ❚