SLOVENIE. Gnove leç pes gnocis gay

Matrimonis civîi ancje pes cubiis omosessuâls. L’argoment, che al divît ancje la opinion publiche in Italie, si è cjatât al centri de atenzion in Slovenie dulà che, dopo agns di provis falidis (la prime iniziative e je dai agns novante dal secul passât) e compromès, la cuistion dai dirits LGBT e podarès infin cjatâ une soluzion. La Comission parlamentâr pal lavôr, la famee, pai afârs sociâi e pai invalits, e à aprovât di fat a metât Fevrâr, dopo un lunc dibatiment, lis propuestis di modificazion de leç sul matrimoni e i rapuarts familiârs, presentadis a Dicembar dal an passât dal partît Çampe unide (Združena levica) a firme dal parlamentâr Matej Tašner Vatovec.
Il partît di çampe al à decidût di cjapâ la iniziative par »eliminâ infin cheste discriminazion incostituzionâl e sistematiche«. Di fat, secont il firmatari de propueste, l’articul 14 de Costituzion slovene al viete a clâr la discriminazion su la fonde di cundizions personâls specifichis: tra chês, a ben che no segnât di pueste, al è cjapât dentri cence dubi ancje l’orientament sessuâl. Cun di plui, in chest sens, no va dismenteade la sentence de Cort costituzionâl che, intal valutâ la incostituzionalitât de leç di sucession, al à metût in evidence l’articul de Costituzion, che e viete ancje lis discriminazions su la base dal orientament sessuâl.
La propueste aprovade de Comission parlamentâr pertinente e previôt la modificazion di cuatri articui de leç sul matrimoni e lis relazions familiârs, che a vuê e definìs il matrimoni tant che union tra un om e une femine. Chestis modificazions, se aprovadis in maniere definitive ancje dal Parlament, a fasaressin decjadê ancje la leç su la regjistrazion des unions omosessuâls. Inte gnove version, il matrimoni al è definît tant che la union di dôs personis, cence tignî cont dal lôr ses. Chest al significhe che si slargje chest dirit e lis relazions economichis consecuentis, sociâls e di altri gjenar, ancje aes cubiis omosessuâls. Il partît de Združena levica, prime di presentâ la proprie propueste, al à concuardât il test cui diviers puartadôrs di interès e i ministeris competents in materie. Il test al gjolt ancje de poie complete de comunitât LGBT slovene.
La regolamentazion dai dirits LGBT e je stade cjapade dentri ancje intal acuardi di guvier. I compagns de coalizion che e sosten l’esecutîf Cerar a vevin concuardât di adotâ o cambiâ dôs leçs separadis, ancje tignint in considerazion i risultâts dal referendum su la leç de famee, refudade intal 2012. Cu la leç su lis fameis, il guvier sloven al varès di risolvi ancje la cuistion des adozions. In ogni câs, in realtât za la legjislazion di cumò e permet al compagn di adotâ il fi de sô compagne o compagn (dentri de fin dal 2014, a jerin 12 i câs di chest gjenar).
Par ce che al tocje i partîts parlamentârs, contraris ae propueste a son i partîts di centri diestre SDS (i democratics slovens di Janez Janša) e Nova Slovenija (la democrazie cristiane slovene vuidade di Ljudmila Novak). Di là dai proponents de Združena levica, lis propuestis a gjoldin de poie dal partît dal prin ministri Miro Cerar SMC, dai socialdemocratics SD, e dal partît di oposizion ZaAB dal ex prin ministri Alenka Bratušek. I rapresentants dal partît dai pensionâts DeSUS a varessin di votâ daûr de proprie cussience, stant che intal partît no je une opinion unanime su la cuistion.
A conferme dal fat che la soluzion di cheste cuistion e podarès jessi pardabon dongje, a son ancje i risultâts dai ultins scandais sul argoment dai dirits LGBT. Daûr de investigazion dal cuotidian Delo, fate tra i 10 e i 11 di Fevrâr suntun campion di 400 personis, lis modificazions de leç sul matrimoni e i rapuarts familiârs de Združena levica a àn otignude la poie dal 51% dai ntervistâts (42% i contraris). Il matrimoni tra doi compagns dal stes ses al è supuartât dal 59%, intant che i contraris si son fermâts al 37%. Pe plui part dai intervistâts, 55%, e reste però inacetabile la adozion di fruts de bande des cubiis omosessuâls (38% i favorevui). ❚
Tjaša Gruden