SLOVENIE. Il magjic mont dal teatri

STORIE_ La date di nassite dal teatri moderni in Slovenie e va indaûr ae fin dal secul XVIII, di precîs ai 28 di Dicembar dal 1789, cuant che pe prime volte e fo rapresentade a Lubiane la opare di Anton Tomaž Linhart Županova Micka. La seconde piere miliâr de storie dal teatri in Slovenie e fo la fondazion de Dramatičnega društva (Compagnie dramatiche) di Lubiane tal 1867. La nassite di cheste socie e pues jessi tignude tant che il prin tentatîf di professionalizâ il mont dal teatri, che fin ae Seconde vuere mondiâl al vignarà istituzionalizât in associazions e compagniis stabilis massime tes citâts di Lubiane, Maribor e Triest. Une figure impuartante de fin dal Votcent e fo chê di Ignacij Borštnik, che al fo il prin diretôr artistic dal Teatri nazionâl di Lubiane, screât tal 1892. Dopo la Vuere grande, tal 1919 al nassè il Drame dal teatri nazionâl sloven di Maribor, l’an dopo il Teatri nazionâl di Lubiane. Intant, a Triest, tal 1907 al jere stât viert il Teatri stabil sloven.
SPETATÔRS_ Dopo la ocupazion fassiste e naziste finide tal 1945, il mont dal teatri al tornà in vite daurman: za tal 1952 a jerin atîfs teatris a Lubiane, Celje, Kranj, Ptuj, Nova Gorica/Gnove Gurize, Postojna/Postumie e Koper/Capodistria/Cjaudistrie. Tai agns Cincuante e Sessante dal secul passât, il mont dal teatri in Slovenie al tacà a cjapâ simpri plui pît, rivant ai 44 teatris dal dì di vuê, dîs in plui rispiet al 2010. Ancje il numar dai spetatôrs al è in fuarte cressite: secont lis cifris uficiâls dal Istitût di statistiche nazionâl, tal 2011 i spetatôrs in dut a son stâts 948 mil cuintri i 864 mil dal 2010 (plui 9,7 par cent; tal 2009 a son stâts 782 mil).
TEATRIS_ Di chescj, plui di 100 mil ogni an a assistin ai events proponûts dal Teatri citadin di Lubiane, che al ufrìs plui di 500 spetacui par an. Il Teatri di Maribor al à plui di 300 puescj par sentâsi e cirche 150 dipendents. Il Teatri di Piran, costruît tra il 1909 e il 1910, al è intitulât a Giuseppe Tartini, grant violinist dal Sietcent, nassût propri te citadine istriane. Il Teatri di Koper/Capodistria/Cjaudistrie al è un dai plui zovins di dut il paîs, screât tal 1951. Dut câs, te citât sul Adriatic za tal Cuatricent, sot de Republiche di Vignesie, si tignivin dai spetacui teatrâi. Chel di Nova Gorica (Slovensko narodno gledališče, Teatri nazionâl sloven) invezit al è dal 1955, e al à dôs salis: une di 371 puescj e une di 107. Ancjemò, il Teatri popolâr di Celje al è stât screât tal 1950, e al pues tignî 360 spetatôrs.
ACADEMIE_ Tant che membri de Universitât di Lubiane, la Akademija za gledališče, radio, film in televizijo (Academie par teatri, radio, cine e television) e je la uniche realtât che in Slovenie e prepare professioniscj che a vuelin jentrâ intal mont dal spetacul. Nassude tal 1945 par formâ atôrs, la Academie e à cjapât il non che e à cumò tal 1963, deventant part de Universitât di Lubiane tal 1975. Ogni an i students che a puedin jentrâ a son une vore pôcs, par solit a pene un su vot rispiet a chei che a fasin domande. Fin al dì di vuê, i diplomâts vignûts fûr de Academie a son stâts in dut plui di 400.
DIZIONARI_ Tal Jugn dal 2011 al è jessût su internet ae direzion http://bos.zrc-sazu.si/c/term/gledaliski/index.html il Gledališki terminološki slovar (Dizionari terminologjic dal teatri). Si trate di un imprest une vore util, li che si cjatin lis definizions dai tiermins che a rivuardin il mont dal teatri par sloven, cu lis traduzions peraule par peraule in cuatri lenghis: inglês, todesc, francês e talian. La vore, par cure de Sezion pai dizionaris terminologjics dal Istitût pe lenghe slovene intitulât a Fran Ramovš (innomenât linguist sloven de prime metât dal Nûfcent) di Lubiane, e cjape dentri 2.967 tiermins; jessint sul web, al è a gratis, e in plui al pues jessi inzornât moment par moment. ■
ALESSIO POTOCCO