La Slovenie e je stade une vore svelte a proponi il so candidât pe incarghe di comissari dentri de gnove Comission europeane, che e vignarà vuidade di Ursula von der Leyen. O fevelìn dal ambassadôr sloven ae Union europeane Janez Lenarcˇicˇ, sielt di persone dal premier sloven Marjan Šarec (fat che al à saborât plui di cualchi ruze jenfri i partner di guvier che a varessin volût jessi consultâts prime).
Confermât dopo sedi di bande dal guvier sedi di bande de comission parlamentâr pertinente, Lenarcˇicˇ al è stât ritignût dal premier la sielte plui juste ancje pe sô esperience, pe preparazion e par vie che nol fâs part di nissun partît. Il candidât si è za cjatât in maniere informâl cu la gnove presidente de Comission europeane ai prins di Avost par fevelâ des disfidis de gnove Comission e de impuartance dal rispiet dai valôrs fondamentâi de Union Europeane. Cun di plui, al à za colaborât cun diviers guviers slovens: chei di Drnovšek, Janša (al jere in capite dal grup di lavôr pe presidence slovene ae Union Europeane) e Cerar (cu la incarghe di segretari di Stât pai afârs forescj e pai afârs europeans). Jenfri lis sôs incarghis plui impuartantis, ancje il lavôr fat te rapresentance permanente de Slovenie tal ONU e te rapresentance permanente de Slovenie te Organizazion pe sigurece e pe cooperazion in Europe a Viene. Al à ancje vût vuidât il Consei permanent de Osce e po dopo al à direzût l’Ufici pes Istituzions democratichis e pai Dirits dal om. La France i à fintremai conferît il titul di Uficiâl de Legjon di onôr.
Tra i setôrs de Comission che Lenarcˇicˇ al calcole plui interessants pe Slovenie, in plui di chel pal slargjament de UE za segnalât di prime dal premier sloven, ancje chei pal ambient, pe ricercje sientifiche, pe digjitalizazion, pe politiche regjonâl e pe cooperazion al disvilup.
Te ultime Comission europeane la Slovenie e je stade rapresentade di Violeta Bulc (membri di chel che in chê volte al jere il partît di guvier principâl SMC), responsabile pai traspuarts. Par trê mandâts di file, de jentrade slovene te UE tal 2004 e fin al 2014, la incarghe di comissari sloven e je stade cuvierte di Janez Potocˇnik, nomenât tant che candidât indipendent. I setôrs che i jerin stâts dâts a jerin slargjament, ricercje sientifiche e ambient. ❚
Tjaša Gruden
