SLOVENIE. Inmò burascje sul guvier di Lubiane

Il guvier sloven de prime ministre Alenka Bratušek al va indenant ancje in  Novembar a navigâ in aghis burascjosis. Al falave cui che al pensave che i problemis si fossin risolts dopo che l’esecutîf – cundut des polemichis in sen ae coalizion di maiorance par vie de gnove tasse sui imobii – al veve incassade la fiducie sul belanç pal 2014 e il 2015. Dome pôcs dîs dopo la aprovazion in Parlament dai proviodiments che a varessin di permeti ae Slovenie di ripuartâ il deficit sot dal soiâr “Maasticht” dal 3%, il Guvier si è cjatât cence doi dai siei ministris, chel pal disvilup economic e tecnologjic Stanko Stepišnik e chel pe sanitât Tomaž Gantar. No dome: di pôc, si è cjatât intal voli dal ciclon ancje il ministri pes infrastruturis e pai traspuarts Samo Omerzel. Come se nol bastàs, il partît dai pensionâts DeSUS, vuidât dal ministri dai afârs cul forest Karl Erjavec, al pretint un gnûf acuardi di guvier (de coalizion che e vuide il paîs a fasin part ancje Pozitivna Slovenija, partît de prime ministre, i Socialdemocratics e la Liste civiche di Gregor Virant), e un rimpast.
Diviers tra di lôr i câs dai trê ministris slovens in cuistion, ma cuntun fatôr comun: il probleme de coruzion e de mancjance di trasparence inte aministrazion publiche. Stanko Stepišnik, cundut des iniziâls resistencis devant de ipotesi di lassâ la incarghe, al è stât costret a dimetisi par vie dal scalfûr creât de partecipazion de aziende Emo-Orodjarna, che al è coproprietari, a trê gnûfs bants pe assegnazion di incentîfs statâi. La stesse aziende, che al so sucès il ministri dimissionari al contribuìs di plui di 35 agns, e veve otignût za intai ultins dîs agns 6.890.954 euros, midiant di cualchi afâr cul Stât, che la metât di chei bêçs e ven de Agjenzie publiche pal disvilup tecnologjic de Republiche di Slovenie. Cun di plui, e veve vût un milion e 200 mil euros dal ministeri de economie. Al va in ogni câs precisât che la plui part di chestis risorsis statâls a son stadis percepidis de aziende prime de nomine di Stepišnik a ministri de economie. E cemût che la stesse comission anticoruzion in realtât no vedi rilevât infrazions o proceduris di assegnazion dai finanziaments pôc trasparentis. Stepišnik, di fat, no si è mai ocupât in prime persone des sovenzions statâls. Lis sôs dimissions a jerin dut câs spietadis: il guvier Bratušek al à fat dai standard alts di integritât e di trasparence un dai siei ponts fondamentâi.
A àn maraveât invezit la opinion publiche, ma ancje cualchi membri dal esecutîf, lis dimissions dal ministri Gantar. A motivâ la sô decision, al à sclarît il stes Gantar, e je stade la impussibilitât di inviâ lis riformis necessariis par miorâ la sanitât slovene, ancje pe mancjance di visions condividudis in sen ae coalizion di guvier. Inte sô letare di dimissions, Gantar però al rimarche cemût che la coruzion e sedi un probleme enormi dal sisteme sanitari (e ancje dal Paîs), e al esprim la convinzion che al sedi stât il grup di interès de edilizie a causâ tantis des dificoltâts che si è cjatât a frontâ. Gantar al à lamentât ancje il fat che il ministeri nol à lis fuarcis e il personâl necessari par combati la coruzion e par contrastâ la agressivitât dai grups di interès plui influents. Un altri segnâl di alarme su la serietât dal probleme coruzion in Slovenie al è rivât di pôc de stesse comission anticoruzion: ae fin di Novembar, si son di fat dimetûts i siei vertiçs, denunziant che – cundut dai lôr avertiments continuis – nuie nol stedi pardabon cambiant intal Paîs. O ricuardìn cemût che a sedin stadis lis acusis de stesse comission al ex prin ministri Janez Janša (calcolât colpevul di vê violât in maniere sistematiche lis normis anticoruzion) a provocâ la colade dal Guvier vuidât dal leader dai democratics slovens.
Omerzel si è cjatât invezit di pôc al centri di dôs polemichis. La prime e rivuarde il scandul des tantis iregolaritâts e reâts rilevâts des fuarcis dal ordin intes autoscuelis slovenis (come la vendite di patentis e di atestâts fals di frecuentazion di cors di vuide sigure), sclopât sul tacâ di Novembar.  Il ministri sloven al è stât acusât di jessi stât metût a cognossince dal probleme za in Avrîl e in maniere seguitive ancje in Lui. Dal ministeri dai traspuarts a àn però mandât indaûr daurman cun decision chestis contestazions. La seconde cuistion e rivuarde invezit i cinc contrats siglâts tra il 2008 e il 2011, par un valôr complessîf di 900 mil euros, tra la sô aziende privade Lastinski (che al è proprietari al 100%) e la Dars, la aziende che e gjestìs lis autostradis slovenis. La ultime convenzion e je scjadude ae fin di Otubar e il ministri, come che al à prometût za te Vierte in Parlament, nol rinovarà il contrat tra la Dars e la sô aziende, rinunziant, par lâ indevant a fâ la funzion di ministri, a un afâr di 150 mil euros.
La stabilitât dal Guvier e continue duncje a jessi un dai problemis principâi ancje in Slovenie, dulà che, tra la Sierade 2011 e la Vierte 2013 a son colâts doi esecutîfs. E chest, intun periodi li che propri la stabilitât politiche e podarès garantî la fiducie dai marcjâts e permeti al paîs di provâ a lâ fûr de crisi che e tanaie la sô economie. ❚
✒ Tjaša Gruden
Rubriche realizade in colaborazion cu la riviste Novi Matajur di Cividât, setemanâl dai slovens de provincie di Udin (www.novimatajur.it)