Juste tai dîs che ancje li si à tacât a fevelâ di coronavirus, la Slovenie e à tornât a vê un guvier di centridiestre. Un daûr chel altri, in siet agns la Slovenie e à vût trê guviers di centriçampe, cun Alenka Bratušek, Miro Cerar e Marjan Šarec che a son deventâts prins ministris cul jutori di listis vignudis fûr dut di bot.
A vuidâ il guvier cumò al è Janez Janša, leader dal Partît democratic sloven-Sds – di no confondi cul Partît democratic de Italie, parcè che al è un partît di centridiestre – e atîf te politiche slovene bielzà di agnorums.
◆ Martars ai 3 di Març, cun 52 vôts su 90, la assemblee di Stât de Republiche di Slovenie (Državni zbor) lu à elet Prin ministri pe tierce volte, stant che al è bielzà stât President dal Consei dal 2004 al 2008 e dal 2012 al 2013.
◆ Tal 2008 al à pierdût lis elezions par une presumude cuistion di mandulis. Par cheste acuse, mai provade, al è ancje lât in preson, juste vie pe campagne eletorâl dal 2014. Plui tart, la Cort massime e à anulât la condane. Al è stât Prin ministri de Slovenie ancje tra il 2012 e il 2013, ma al à scugnût dâ lis dimissions daspò di une denunzie de Comission cuintri de coruzion.
◆ Vie pai agns, Janša al à dispès dit di vê cuintri grups di personis leadis al vecjo regjim comunist, che lui al veve judât a fâ colâ. Par esempli, tal 1988 e je stade une grande proteste di popul, vignude fûr daspò che la Armade jugoslave lu veve metût in preson par vie di une inchieste gjornalistiche li che si fevelave di cemût che a jerin daûr a preparâ un atac cuintri de democrazie slovene, che e jere juste daûr a nassi. O tal 1991, cuant che tant che ministri de Difese al veve vuidât la vuere di indipendence de Slovenie.
◆ Tes ultimis elezions in Slovenie, tal 2018, il Partît democratic sloven al à vût la maiorance relative. Ma a fâ il guvier al è stât Marjan Šarec, cuntune coalizion di cinc partîts di centriçampe e la poie dal partît Levica (çampe radicâl). Cuant che Levica al à gjavade la poie, la coalizion di Šarec e je restade di bessole, cui membris a tirâsi un cun chel altri. Šarec al à provât a dimetisi, cun chê di lâ drets a votâ, ma a son cambiâts i leaders dal Partît dal centri moderni-Smc e dal Partît democratic dai pensionâts di Slovenie-Desus. Cun lôr e cui democristians di Gnove Slovenie-NSi, Janša al è rivât a meti sù une coalizion cun almancul 47 vôts. Si son zontâts ancje chei dai deputâts des minorancis taliane e ongjarese, Felice Žiža e Ferenc Horvat, e chei dal Partît nazionâl sloven-Sns. A votâ cuintri a son stâts i Socialdemocratics-Sd, la Liste di Marjan Šarec-LMŠ e Levica. I deputâts dal Partît di Alenka Bratušek-SAB no àn partecipât al vôt. Daspò dal zurament, Janša al à anunziât che no coventaran altris spesis pal svilup de Slovenie. In chest moment, la prioritât e je la bataie cuintri dal coronavirus, ma a saran impuartantis ancje lis impresis, il decentrament, la semplificazion burocratiche e la sigurece. Janša al volarès ancje che e tornàs la jeve obligatorie. Ce che i pues ancje interessâ al Friûl e je in particolâr la nomine di chei ministris che a àn a ce fâ cul forest, o ben il gnûf ministri dai Afârs cul forest Anže Logar e la gnove ministre pai Slovens di là dal confin e ator pal mont, Helena Jaklitsch, che e à lidrîs te minorance gjermanofone di Kočevje/Gottschee. ❚
