Si impensisi dal poete France Prešeren, che al veve ancje un leam cu la nestre regjon
Ogni an, ai 8 di Fevrâr, chest an di sabide, in Slovenie si memoree la zornade de culture slovene, il «Prešernov dan», ven a stâi la zornade li che si impensisi dal poete France Prešeren, che al murì juste in chê dì, tal 1849. Inte Republiche di Slovenie in cheste dì no si lavore.
Di passe 30 agns, ai 8 di Fevrâr, su la place che a Lubiane e à cjapât il so non – Prešernov trg -, si da adun une sdrume di int, par scoltâ atôrs che a declamin i viers plui innomenâts dal poete.
Simpri ai 8 di Fevrâr, te principâl manifestazion culturâl uficiâl, la Republiche di Slovenie e conferìs i premis «Prešernove nagrade» pai risultâts pui impuartants a nivel artistic.
France Prešeren al nassè ai 3 di Dicembar dal 1800 intune famee di contadins a Vrba, te regjon slovene che si clame Gorenjska. La mari e varès vût gust che il fi al deventàs predi ma, dopo i studis a Lubiane, tal 1822 si iscrivè ae facoltât di leç a Viene, ancje se la famee no jere contente. Sîs agns dopo, al finì i studis e al cjatà lavôr a Lubiane tant che praticant avocat. Al passà l’esam par deventâ avocat, ma cundut che al fasè plui voltis domande par podê esercitâ la profession in autonomie, lis autoritâts austriachis a refudarin plui voltis lis sôs domandis, parcè che a pensavin che al fos une persone suspiete di un pont di viste politic, par vie de sô libertât di pinsîr.
Dopo de muart dai amîs Andrej Smole e Matija Čop e par vie dal matrimoni di Julija Primic, che lu veve fat inamorâ ma po e veve maridât un altri, al le in crisi e al tacà a bevi. Tal 1846 a aprovarin la sô domande par vierzi un studi di avocat a Cragn, ma doi agns dopo si inmalà di cirosi. Al murì joibe ai 8 di Fevrâr dal 1849.
O podìn lei lis sôs poesiis miôr te publicazion «Poezije» («Poesiis», 1847). Ancje l’imni de Slovenie, «Zdravljica», al è in veretât une sô poesie, che al scrivè tal 1844.
Il poete France al è une vore cognossût, ma nol è invezit masse cognossût il fat che ancje la nestre regjon e à un leam cun lui. Inte Valcjanâl, a Valbrune, al è soterât un dai siei siet fradis, il predi Jurij Prešeren, nassût a Vrba ai 29 di Març dal 1805 e muart a Valbrune ai 7 di Otubar dal 1868. In chê volte, tal paîs – che si cjatave te zone bilengâl de Carinzie – si fevelave massime il dialet sloven e al coventave un plevan che al fevelàs ancje sloven.
In dì di vuê a son tancj i turiscj slovens che si fermin a Valbrune dome par lâ a viodi la lapide di marmul di Jurij Prešeren, a man drete de puarte par jentrâ te glesie dal paîs. ❚
