La Slovenie, cemût che a dimostrin i indicadôrs economics, e à di timp tacade la strade juste par lâ fûr de crisi economiche e finanziarie che le à puartade sul ôr dal precipizi. Tra i intervents plui impuartants che a son stâts necessaris par sconzurâ la assistence finanziarie de Troika e par rilançâ in maniere economiche il Paîs, al è stât il plan di risanament dal sisteme bancjari. Lis misuris di risanament a àn cjapât dentri sîs bancjis slovenis, NLB (Nova Ljubljanska banka), NKBM (Nova kreditna banka Maribor), Probanka, Factor Banka, Banka Celje e Abanka, che a àn patît i efiets de crisi, ancje par vie di faliments di impresis e di une percentuâl cressinte di credits che no àn podût esizi. Il risanament, scomençât ae fin dal 2013, al à compuartât une grande ricapitalizazion de bande dal Stât che al à invistît chê volte 3,6 miliarts di euros (plui o mancul il 10% dal Pil) par salvâ lis bancjis slovenis. Cuatri istitûts, NLB, NKBM, Abanka e Banka Celje a son stâts di fat nazionalizâts, intant che intai câs di Probanka e Factor Banka si è decidût par une licuidazion controlade. Part culminative dal procès di risanament e je stade, di là dal aiût statâl, la istituzion de „bad bank” che e à rilevât i credits ‘tossics’ des bancjis slovenis. L’acuardi cu la Comission Europeane al previodeve intune fase sucessive ancje la privatizazion des bancjis salvadis.
Lis misuris adotadis si son mostradis a ogni bon cont zovevulis. Come previodût dal plan di risanament, doi agns indaûr Abanka e Banka Celje si son unidis e a formin il tierç principâl istitût di credit in Slovenie. La gnove Abanka, che e je a vuê ancjemò controlade al 100% dal Stât, e opare cumò cun sucès (l’an passât e à segnât un util net di cuasi 77 milions di euros; intal prin trimestri dal 2017 l’util regjistrât al è stât di 17 milions di euros). L’acuardi al previôt che la bancje e sedi privatizade dentri dal 2019.
La Slovenie si prepare però intant a vendi la sô plui grande bancje, la NLB, che e je ancje un dai simbui principâi de economie slovene. Dopo i aiûts statâi, ancje la NLB e je daûr a operâ cun bogns risultâts e a son diviers opositôrs ae privatizazion. Intant la Slovenie e je rivade a un gnûf acuardi cu la Comission Europeane. Il 75% mancul une azion de bancje slovene principâl al vignarà vendût in dôs fasis: almancul la metât des azions statâls a saran cedudis dentri dal 2017 e il rest dentri de fin dal 2018. Secont il guvier, chest al permetarà ae Slovenie di otignî une vendite plui congrue midiant dal metodi IPO (ufierte publiche iniziâl). La prime fase, chê relative ae IPO, se no saran impreviscj e podarès jessi concludude za in Jugn. Al principi, ai piçui invistidôrs in Slovenie e vignarà ufierte la pussibilitât di comprâ fin al 10% des azions, intant che il 90% des azions al sarà ufiert ai invistidôrs istituzionâi. Po dopo, lis azions a vignaran metudis in vendite su lis borsis di Lubiane e di Londre.
Il presit des azions nol è stât ancjemò definît. Ae fin dal 2016 il valôr contabil al jere di 63,2 euros par azion. Intant però, dopo lis primis presentazions a acuirents potenziâi a Londre, Boston e New York, i rapresentants de Holding slovene statâl (SDH) incjariade di stâ daûr aes privatizazions, a àn programât une serie di incuintris cui pussibii invistidôrs intai centris finanziaris principâi in Europe e intai Stâts unîts di Americhe.
La NKBM e je stade invezit za privatizade. La vendite e je finide, no cence polemichis, intal Avrîl dal 2016. ❚
Tjaša Gruden