Al è avonde lâ a fâsi un zîr ator par la Slovenie, par viodi cemût che la apiculture e segni inmò une da lis ativitâts tradizionâls intune sdrume di bandis. Da rest dome cualchi desene di agns indaûr a jerin cetancj ancje achì in Friûl chei che a arlevavin lis âfs par vê mîl, cere e altris prodots.
In Slovenie la apiculture e à cetante tradizion e e reste inmò in dì di vuê une ativitât tradizionâl. Ancje cence contâ chei des minorancis autoctonis in Italie, Austrie, Ongjarie, Cravuazie e chei ator pal mont tant che emigrants, in Slovenie a vivin plui o mancul in doi milions: e chei che a son apicultôrs a son plui o mancul 11.000.
De situazion de apiculture in Slovenie si è cjacarât te tierce edizion dal “Pislakov dan”, une zornade di studis nomenade in onôr di Janko Pislak (1934-2013), che al è stât un impuartant apicultôr sloven. A inmaneâ cheste zornade di studis al è ogni an il “Strokovno združenje profesionalnih cˇebelarjev”, une associazion che e met adun i apicultôrs professioniscj slovens. Chest an ai 8 di Fevrâr ta la Facoltât di veterinarie de Universitât di Lubiane i apicultôrs e i espierts a an cirût di capî parcé che il numar di âfs e di apicultôrs al cres, intant che la cuantitât di mîl a nivel gjenerâl e cale.
Il president de associazion, Boris Seražin, al à notât che a son simpri plui malatiis e no plui dome il parasit “varroa”: chest al è un problem par ducj chei a lavorin tant che apicultôrs professioniscj o semiprofessioniscj. I apicultôrs a sperin di rivâ a fâ plui rêt, ancje par comparî ducj insiemit sui marcjâts forescj, e di vê scambi di cognossincis, massime pe apiculture cun plui bôçs.
In Slovenie la densitât dai bôçs e je avonde alte e par chest pes âfs al è ancje plui alt il risi di malatiis. A risi le è ancje la âf autoctone “Apis mellifera carnica” (par sloven “kranjska sivka”); su la sô situazion a influissin i cambiaments climatics e i compuartaments dal om cun rivuart a la nature. Par chest a coventaressin intervents par la sô tutele, come ancje meti a rêt ducj i associâts che in Slovenie a fasin apicolture, cun plui dal 10 par cent da lis fameis di âfs.
A lis conferencis a Lubiane si è cjacarât ancje di cemût tignî in buine salût lis âfs – par esempli di cemût fâ front al fonc “nosema ceranae” e a un coleotar che al ven da la Afriche dal Sud, “aethina tumida”. Impuartante e je ancje la relazion tra la apiculture e la cuantitât di arbui che a coventin par fâ la mîl. Interessant al è ancje cemût che a impolinin lis plantis che a fasin pomis piçulis tai Paîs Bas – cun lis âfs dentri lis sidreris. ❚