SLOVENIE. Vals in musiche

“Il Senjam al è il Senjam, tu âs di vivilu par podêlu capî”. E je cheste une des rispuestis che ti rivin se tu domandis a un sloven de Sclavanie ce che al è il Senjam benške piesmi, festival de cjançon des Vals dal Nadison. Il Festival al à prodot, sumant ancje cheste trentesime prime edizion, ben 359 cjançons intai varis dialets slovens in ûs inte fasse confinarie cu la Slovenie de provincie di Udin, chei des Vals dal Nadison, de Tor e dal Cuarnap, de Val Resie e de Valcjanâl. Un patrimoni culturâl no indiferent che al à contribuît intai agns a valorizâ, in graciis di un strument zovevul tant che chel de musiche, lis fevelis e la culture di une comunitât che e à scugnût simpri lotâ pe proprie afermazion e, intai ultins decenis, ancje par podê mantignî vive la proprie lenghe mari.
Nassût intal 1971 su iniziative dal Circul culturâl Recˇan, che lu organize ore presint, Il Senjam benške piesmi al reste ancjemò vuê une des manifestazions plui amadis dai slovens de provincie di Udin. Ancje chest an al à riclamât une vore di personis che, intes dôs zornadis di “fieste de musiche” (ai 8 e ai 9 di Novembar passâts), a àn jemplade la palestre dal piçul paîs di Liessa in comun di Grimac. “Ma in principi nol è stât facil”, al à dit Aldo Klodicˇ, fin de prime edizion anime e fra i promotôrs plui atîfs di cheste fieste de cjançon de Sclavanie, intune interviste al Novi Mataiûr. “Il Recˇan al à rapresentât une Vierte pes nestris vals. Nol jere sempliç chê volte promovi la culture e la lenghe slovene, o vevin tancj opositôrs e o vin patît atacs di ogni gjenar.” E propit a cui che chê volte al provave a impedî cun ogni mieç cualsisedi gjenar di ativitât che e podès promovi la culture slovene Aldo Klodicˇ al à inviât, midiant di une sô cjançon scrite pal festival, il messaç clâr “pustita nam rože po našim sadit” (“lassaitnus semenâ lis rosis a mût nestri”, vâl a dî inte nestre lenghe). Titul che al è stât sielzût ancje pe racuelte in trê volums, publicade propit dal circul Recˇan, dai tescj di dutis lis cjançons dai prins trente festivai.
Plui di setante aromai i peraulants, numerôs i grups e i cjantautôrs che a àn partecipât a cheste manifestazion. Par agns une des colonis puartantis dal festival al è stât Francesco Kekko Bergnach, fra i prins musiciscj de Sclavanie a doprâ la fevele slovene in clâf moderne e no folcloristiche. Dopo la sô muart rivade masse adore, il Senjam, e plui in gjenerâl la cjançon slovene inte fasse confinarie de provincie di Udin, al à vivût un periodi di crisi. Dopo une lungje polse, il Senjam benške piesmi si è ripiât intal 2008, cun cadence bienâl, e al à cjapât dentri intai ultins agns une vore di zovins, soredut ex arlêfs de scuele bilengâl di Sant Pieri e arlêfs de scuele di musiche Glasbena matica simpri di Sant Pieri. Il rivâ su la sene de gnove gjenerazion al à determinât tancj cambiaments, sedi dal pont di viste musicâl che linguistic. Ma ancje intai contignûts dai tescj des cjançons, spieli dal mudament che al è stât ancje inte comunitât de Sclavanie. E se la vecje gjenerazion e cjantave l’amôr e la nostalgjie pal paîs di origjin (in chê volte un dai problemis plui sintûts e jere la emigrazion), in agns resints lis cjançons a tocjin tematichis al pas cui timps de societât moderne.
Il Senjam benške piesmi al à dimostrât ancje chest an, cun dodis gnovis cjançons – e pe prime volte presentadis di videos autoprodots di diviers artiscj che si son dâts la volte sul palc –, la vivarosetât e la atualitât assolude di tescj, ritmis e melodiis proponudis dai musiciscj. Cun gjenars musicâi che a àn spaziât dal funky, al rap, al punk rock ma ancje al pop plui melodic; la libertât assolude par ce che al tocje la forme musicâl propueste e je stade di fat di simpri une carateristiche distintive dal Senjam. E i tescj di chest edizion, se o cjalìn lis cjançons plui premiadis, “Mucˇi, dok te mucˇi” dai Blue Fingers (di Davide Tomasetig, autôr di test e musiche cun Martina Marmai, Jani Skocˇir, Matteo Monai e Luca Clinaz) e “Špotify” di Il Grande Splash (Ilija Ota – sôs lis peraulis e la musiche -, Martina Jazbec e Martina Marmai), a àn frontât, in mût tal stes timp ironic e critic, temis tant che la identitât e il lavôr. Ai Blue Fingers la vitorie dal premi dal public (seconts Il Grande Splash) e de jurie pe miôr musiche. In paritât cun Il Grande Splash si son adiudicâts ancje la vitorie dal public sot i 30 agns. Tierç puest assolût par Ikeia Feletig che e à interpretât une cjançon che e descrîf la frenesie de vite moderne. Il premi de jurie pal miôr test al è lât a une altre fantate tant zovine: Sara Simoncig, che e à scrit pal so grup Sons of a gun (za finaliscj dal Premi Friûl 2013) la cjançon Maglà (Fumate). Segn ancje chest dal rivâ su la sene (no dome musicâl) di une gnove gjenerazion di zovins de Sclavanie che a àn madressût une fuarte cussience de proprie identitât, e che si dimostrin leâts sì ae lôr lenghe e culture, ma cul fer intindiment di proietâle intal futûr, cence ghetizâsi intal revival folcloristic. ❚
Tjaša Gruden