SPECIÂL BIBIE – I volontaris

I zovins che a gjestivin l’Infopoint, cussì come chei de ARLeF, a ricuardin soredut un non: Andreina, volontarie de Unitalsi di Udin. Giovanni Candussio, di Advantage Italia al dîs di jê: “Ecezionâl”. Elena Zanussi, de ARLeF: «Deliziose, mai strache: e motivave ducj». Eugenio Busolini: «Par fortune che o vevin la Unitalsi». Il contat cu la associazion dai puartadôrs che e à judât sore nuie tal davuelziment de leture de Bibie al è vignût dopo che in ARLeF si jerin inacuarts, viodint il libri produsût daspò la esperience di Rome, di chestis volontariis viestudis come muiniis: volontariis che a dispartivin il “trafic” di personis, letôrs e scoltadôrs, intal sît. «Par dî il vêr – e sclarìs Elena Zanussi – o vevin domandât a dutis lis associazions de Arcidiocesi la disponibilitât a judânus, ma cence une rispueste. Lôr a àn aderît subit, cun entusiasim… e cu la professionalitât che a vevin! Come se par lôr al fos lâ a vore». I volontaris a àn poiade la organizazion te gjestion logjistiche des zornadis: si tratave di dâ l’acet ai letôrs, viodi che si presentassin e che a fossin tal ordin coret tal  vicinâsi al letorin, e po compagnâju al libri des firmis. In plui di dâ informazions li dal Infopoint. Daûr des situazions, a coventavin 3-5 personis fissis. In plui di Andreina, la Unitalsi di Udin e à mobilitât une trentine di personis, che a turni a àn prestât servizi. «Personis favolosis, di un grant cûr, dutis! – al comente Candussio –.
A son stâts in grât di gjestî dutis lis situazions, cence mai lamentâsi o domandâ nuie».
Unitalsi e je stade la principâl associazion di volontariât di supuart, par numar di personâl mobilitât e par oris prestadis.
Ancje altris a àn dât, dut câs, un lôr contribût. Si ricuarde la Associazion Teatrâl Furlane cun Claudio Mezzelani in prime linie, la Filologjiche furlane e l’Ente
Friuli nel Mondo.
Te fase di preparazion, une siore di Spilimberc dal Istitût ladin furlan, che e fevele il francês, e à judât la ARLeF a tignî i contats cun chei che a àn imbastide in France “La Bible en continu”, che a àn inviât il model tal 2004 (sul lôr sît e je racuelte ancje la esperience furlane).
Il jutori al è rivât ancje li dal call-center imbastît de Regjon. Dongje di Giovanni, Marco, Giulia e Manuele, i zovins di “Advantage Italia” – la agjenzie di comunicazion che e veve vinçût l’apalt gjestionâl – si son a man a man alternadis ancje altris personis, che a àn judât rispuindint al telefon, contatant e riclamant la int, mandant lis parts di lei. Presince fisse par Paolo Bortolussi e Remo Spizzamiglio. E po, al è stât in graciis dal coordenament di Luca Peresson dal Comitât tecnic sientific de ARLeF e de rispueste pronte di Claudio Roya, se si à podût dâ di lei vot tocs dal Sacri test a ancjetancj furlans di cuarte e di cuinte gjenerazion dal Circul Alef di Colonia Caroya, che a àn ambientât la lôr leture in cinc glesiis storichis de zone di partignince.
«O pensi che il sucès organizatîf di cheste “grande machine” al sedi peât ancje al fat che il grup al jere zovin e tantis robis, tancj problemis e complicazion, si son risolts une vore par intuit e par frescjece di ideis», e comente la Zanussi. Il numar di sogjets mobilitâts al è stât une vore ridot in confront a esperiencis similis di altris bandis. «Personalmentri – al zonte Candussio, che in chei dîs al à durmît une medie di cuatri oris par zornade – chest event mi à puartât a cognossi diviersis realtâts che prime no savevi nuie; realtâts culturâls e di agregazion, che mi àn trasmetût valôrs e ancje umanitât».
Oscar Puntel