SPECIÂL BIBIE – Tignî dûr cuintri dal gjenocidi culturâl in Friûl

La Bibie e à cjapade vite no dome pe intuizion e pe vore di pre Antoni, ma podìno dî che e sedi la risulte dal Spirt autentic dal Concili Vatican II, ise cussì?
Tal mont catolic, fint al Concili Vatican II (1962-1965), la Bibie no jere un libri dal popul, ma un libri gjestît e messedât dome de Gjerarchie glesiastiche. Une linie cheste che e partive ancjemò de Cuintririforme, cul Concili di Trent, 4 secui indaûr! L’aiar gnûf conciliâr, naturalmentri, al rivà ancje in Friûl.
Rispiet però a la Catalogne, al somee che chel spirt in Friûl al sedi stât pe plui part tradît: trops sono
i celebrants par furlan?
In Friûl la clime pulitiche, culturâl, sociâl e, magari cussì no ancje glesiastiche, no jere dal sigûr chê de Catalogne, dulà che la sensibilitât e la cussience identitarie e di popul e jere une vore marcade. Che di fat apene che il Concili al à stabilît che si podeve celebrâ la liturgjie te lenghe dal popul, in Calalogne al è stât normâl che i vescui, i predis e il popul a cjapassin la strade di fâ par catalan, cence nissun fastidi. Culì al jere dut il contrari. Di fat la scuele, lis fuarcis pulitichis, economichis e, disgraciatamentri ancje la gjerarchie glesiastiche, a vevin cirût dome di sbeleâ il furlan, considerantlu un sotprodot dal talian e dimostrant une ignorance pelose. Al è stât cualchi predi, pôcs ma di grant nivel culturâl come Marchet, Placerean, Beline e altris, che si son batûts cun dutis lis lôr fuarcis cuintri chest etnocidi e cheste devastazion culturâl. Vuê, come numar no son tantons i predis che a celebrin regolarmentri par furlan. La clime e je un freghenin gambiade, ma e je dure ancjemò. Baste viodi la brute storie dal Messâl par furlan.
Come pe traduzion ancje pal event de leture de Bibie, si à scugnût spietâ fûr dal “templi”, parcè?
Il grant event de leture de Bibie di cheste Vierte, come ducj i grancj e impuartants events a caratar religjôs (la Bibie, i messalins, il cjant liturgjic patriarcjin cun dutis lis sôs ricjecis) a son ducj nassûts “fûr dal templi”, mai par une intuizion e sostegn de gjerarchie. Che anzit la gjerarchie, fin che e à podût, e à ignorât o cjalât cun suspiet.
Ma in Friûl si aial simpri preât dome par talian e prime par latin?
La liturgjie, lis funzions uficiâls a son simpri stadis fatis par latin. Ma fin a la prime vuere mondiâl i predis a predicjavin par furlan, la dutrine e vignive fate par furlan, tantis orazions a vignivin imparadis par furlan.
Mi visi che 40 agns indaûr, che o jeri capelan a S. Denêl, cualchi vieli che al vignive a confessâsi mi diseve l’At di dolôr par furlan, disint che lu veve imparât cussì di frut.
Glesie Furlane ce rapuarts aie cu la glesie in Friûl?
Nô no si sin mai sintûts fûr de Glesie. In chescj 40 agns de Associazion o pensìn di vê dât un grant e impuartant contribût a la nestre Glesie cun dutis lis ativitâts che o vin fatis, rindintle plui siore e plui incjarnade. Par altri, bisugnarès domandâ ai rapresentants uficiâi de Glesie se nus sintin come un claput te scarpe, o une risorse. La impression nestre e je che no vedin une grande stime e che nus sintin simpri sul ôr. Ma forsit e je dome une impression!
E cumò che l’event al è stât fat, ce restial?
Dopo dal event straordenari e impuartant  de leture de Bibie che e à coinvoltis tantis, tantis personis che nissun no sal spietave – segn che la int e rispuint – nô o bramaressin alc di plui de gjerarchie: che e dopri cun plui frecuence il furlan (la Bibie, Messâl, cjants) tes liturgjiis uficiâls tal Domo di Udin, tes glesiis dai paîs e tai incuintris organizâts de diocesi. O bramaressin che i predis a vincessin chês resistencis, che tal passât nus son stadis ficjadis in dentri a ducj nô, e si liberassin viers la vite, la culture, la storie de nestre int che e je uniche e iripetibil. Tune societât multiculturâl che e sta cressint, o podìn simpri mostrâ la nestre muse e regalâ vulintîr i nestris tesaurs. Al sarès un di plui e no di mancul.
Christian Romanini