SPECIÂL – Chel brut pastrocj su alcul e sagris

Intai ultins dîs di Lui si jere pandût jenfri i organizadôrs di sagris e di events avostans un grant alarme causât di un piçul articul (il 23) di une leç buride fûr ai 14 di Lui, la 88/2009. Cheste leç, nassude cul intent nobil di evitâ la vendite di alcolics cun grât superiôr al 21% al esterni des discotechis, e stave par fâ sù un patatrac tes nestris sagris di paîs, tai bancuts estîfs, in ducj i esercizis publics, intai concierts e intai events sportîfs, parcè che no diseve in maniere esplicite che chescj ambits no jerin  tocjâts de leç.
La leç, che e veve di jentrâ in vigôr cul 29 di Lui, e à creât subit preocupazion, massime pal fat che nol jere un margjin di timp par meti a puest il pastrocj, viodût che par cuant che il parlament al varès tornât a esaminâ la cuestion, al sarès rivât Setembar e dutis li sagris a saressin stadis ingredeadis.
O vin sintût Tino Liva, president di Arcometa, il consorzi fra lis Pro Loco dal Spilimberghês.
Ce aiar tiravial in chei dîs?
Al jere aiar di confusion su di une leç che e sameave drastiche, soredut par chei che a vevin za in pîts la organizazion di sagris (sagre a Clausêt, Tramonç, Madone de Nêf, Spilimberc) o di events (come «Portoni aperti» a Top di Midun).
O jerin preocupâts par vie che presentâ la ufierte enogastronomiche des nestris valadis cence la part enologjiche al jere tant che copâ la tradizion. No si pues pensâ di compagnâ, par esempli, la pitine o il formadi dal cit cuntun struc di naranç.
Cuai jerino i pussibii efiets par voaltris?
Pes Pro Loco dal Consorzi no podê distribuî alcul al vûl dî no fâ sagre e no fâ sagre al puarte a no vê chel necessari introit di becins, indispensabil par judâ a puartâ indenant i programs culturâi di ogni Pro Loco e la lôr minime gjestion vitâl.
Ce vêso fat subit dopo sintude la gnove?
O ai provât dal moment a clamâ la Provincie, la Regjon, la Associazion regjonâl des Pro Loco e fin la UNPLI nazionâl, dut câs cence ricevi une rispueste clare.
La rispueste clare le à dade invezit ai 29 di Lui la Direzion centrâl Ativitât produtivis de Regjon, a firme di Antonella Manca, là che si dîs che nuie al cambie pe declarazion di inizi ativitât (DIA) e pai modui di adotâ, che a restin di competente comunâl.
Lis sagris, che par tacâ a àn bisugne di chescj documents, a jerin duncje salvis, rispiet ai camions/bars itinerants che a lavorin cence la dibisugne di chest documents e che si ju cjate a ogni ore de gnot fûr des discotechis a vendi alcul, spes cence cjalâ trop pal sutîl a cui che ur vent.
I fiestezaments par chest àn a son al sigûr; dut câs, la leç e varà di sei corete metint neri su blanc che no vâl pes sagris, pes fieris e vie discorint.
Bruno Colledani