Nol à voie di sei considerât un romantic però al à contât che la robe plui biele dal desert e je la gnot. Une gnot cuntun cidinôr assolût. E, massime, cu lis stelis, chês veris. Parcè che li, tal mieç dal savalon, nol esist l’incuinament luminôs. E alore ancje il cîl al è plui trancuil, plui slusint.
Al pâr di viodilu, slungjât tal sac a pêl, sot de lune. Dopo 600 chilometris di sudôr, sù e jù pes dunis, tra une bussule e cualchi camêl, cul orloi simpri in man par controlâ i timps de gare. La gnot e je magjiche par fuarce.
Edi Orioli al à «picjât i motôrs tal claut» ma lis sôs aventuris no lis dismentee. Disevot Parigi-Dakar a son tantis, a son come trê agns vivûts in Afriche suntune moto, o suntune machine. Cumò vonde, però. Si è stufât di cori e si è fermât, un an fa. Fermât par mût di dî: al à une aziende di famee di mandâ indevant, a Martignà, e al trafiche dut il dì cun tendis di soreli.
Une vite, la sô, passade ator pal mont. Ma il nît al è restât chel chi, il Friûl.
Vuê al viôt un altri paisaç magjic, chel des culinis di Moruç, dulà che al vîf, cu la femine e lis dôs fiis. La sô famee lu à simpri poiât tal so lavôr e tes sôs lontanancis. Di fat, al à tacât a lâ ator par garis e garutis cuant che al veve 15 agns. Ma cumò al cjale il gran premi sul divan, la domenie, cu lis sôs frutis.
Edi, cemût stâstu?
«Ben. O ai zirât citâts e lûcs. Ma chê chi e je cjase mê. Culì si vîf ben, in pâs. La sere, cuant che o torni cjase di vore, o poi la machine e o voi a cene. No ai di fâmi il zîr dal cuartîr mil voltis par cjatâ dulà imbusâle. Sigûr, o sin un pôc fûr di man: se o vin di lâ a Milan, o a Rome, e je strade di fâ. Ma o ai miôr fâ cualchi chilometri in plui se dopo, cuant che o rivi cjase, o soi trancuil».
E cemût ise la tô vite cence lis corsis: ti mancjino?
«No, o stoi ben cussì. O ai sintût che al jere il timp di fermâmi e di gjoldimi lis robis che fin in chel moment no vevi podût fâ. Par esempli, il Nadâl o l’ultin dal an in famee: di solit ju passavi a Parîs, in preparazion de gare (la Parigi-Dakar e scomence al prin di Zenâr, N.d.R.). E a planc a planc, o soi daûr a cjapâ lis distancis di chel mont là. Ancje se inte cantine o ai simpri une rie di motos parcadis».
Tropis?
(Al pense un pôc, lis conte a cjâf) «Cinc. Di strade, di fûrstrade e une e je un ricuart, un regâl dal president de Honda».
Ma tal to palmares a son ancje tantis garis vintis cu lis cuatri ruedis.
«Sì, o ai simpri vude la passion pes machinis, pai rally. E o ai corût ancje sîs Parigi-Dakar cun lôr».
Cemût isal tacât il to amôr pai motôrs?
«Pal diplome di tierce medie gno pari mi à regalât une moto, une Gori 50 di seconde man. E je stade la mê palestre. Cori mi plaseve e o jeri ancje brâf. O ai fate la prime gare a 14 agns, a 16 o ai vint il Titul talian di enduro e a 17 il prin Campionât di cope dal mont ae «6 giorni». O jeri fûr di me pe contentece, ancje se gno pari dopo ogni corse al tornave a puartâmi cjase a studiâ».
I tiei gjenitôrs no vevino pôre a vioditi lâ cussì di corse?
«No, no. Cuant che tu fasis une ativitât a nivel agonistic e devente une dissipline. Alenaments, costance, e la sere prime des garis a durmî aes dîs, no aes cuatri di buinore come i miei amîs».
Il moment fondamentâl de tô cariere.
«La dì che Massimo Ormeni, diretôr sportîf de Honda, mi à domandât di partecipâ ae Parigi-Dakar. Al jere il 1986. Chê gnot no ai durmît».
Parcè?
«Parcè che o stavi par realizâ un gno sium e no savevi se o jeri ae altece. In chê volte, si viodeve dome cualchi fotografie di chescj coridôrs che a lavin in Afriche: par me, une aventure misteriose e fassinante».
Invezit chê sere, Edi, al podeve durmî ben. La altece le veve dute. Al è stât il re dal desert par cuatri agns: la prime volte tal 1988, e ancjemò tal 1990, tal 1994 e tal 1996. Orioli al faseve rime cun Afriche.
Adiriture un an, che no i plasevin lis motos disponibilis, al à fate la Parigi-Dakar tant che gjornalist, inviât di Italia1. Al à contât che la dificoltât plui grande e je chê dal adatament cul clime e cul teritori. Si pense che tal desert al sedi cjalt, invezit te prime part de gare si patìs soredut il frêt, in Maroc, in Algjerie e in Libie. Li l’invier al è invier. Dopo, tal centri dal continent, al rive il cjalt, chel umit e fastidiôs. Bisugne savê sorevivi.
Ce si mangje dilunc de gare?
«Si fâs di gulizion tor cinc di buinore e dopo si cene la sere. I prins agns si leve a cirî poleç e patatinis tai ristorants dal puest, cumò al è cambiât dut. A esistin lis cusinis di cjamp de organizazion, cun pastesute, pan, dut ce che ti covente».
Trop ise cambiade la organizazion de Parigi-Dakar tai agns?
«Masse, purtrop. Une volte e jere vere aventure. Bisugnave rangjâsi in dut e par dut. Tu vevis une bussule, une tende, e un percors di fâ, bessôl. Cumò la scuadre ti ven daûr cu lis carovanis, tu âs il gps: ancje se tu ti pierdis a san dulà che tu sês…dute une altre robe».
Ma cemût si orientisi tal desert?
«Disìn che il gps tu puedis doprâlu dome in cierts moments dal percors, se no al podarès fâ la gare ancje un frut, al sarès masse facil. Il motociclist al à il «roadbook», il libri de strade, che al è une specie di rodul di cjarte igjeniche: al è posizionât su la moto e al à dentri lis indicazions di seguî par rivâ ai passaçs obligatoris. Si srodole a man a man che si va indenant».
Une specie di navigadôr rudimentâl?
«Esat. A son lis frecis che a disin se lâ a drete o a çampe, e dopo indicazions dal gjenar «va indenant par 10 chilometris e cuant che tu viodis une cjase dute rote zire a drete», o pûr «va viers la ponte des dunis e dopo 5 km lasse il percors e va fûr piste par 130° di bussule». Nol è facil, parcè che se e je fumate o brut timp, la ponte des dunis no tu le viodis! Disìn che e je une sorte di cjace al tesaur.
Il moment plui brut che tu âs passât.
«Une volte mi soi pierdût di brut, o jeri in Niger, dongje il confin cul Ciad. O vevi rot i struments, dome un litri di benzine tal serbatori e une tampieste di savalon in vore. La mê salvece e je stade un pastôr, che mi à indreçât pe vie juste».
E cemût âstu fevelât cul pastôr?
«A mots, i disevi il non dal vilaç che o cirivi e lui cu lis mans mi faseve segn di dulà lâ».
Lis robis plui bielis, invezit.
«I paisaçs e la solitudin».
La solitudin ise biele?
(Al riduce un pôc prime di rispuindi) «Sì, parcè che o pues fâ ce che o ai voie, no ai di spietâ nissun. E une altre robe biele al è il contat cui locâi, ancje se tu âs di stâ atent a no dâur masse confidence, se no tu tai cjatis a cjase cun dute la famee daûr. Dut câs, a Timbuktu o ai fat amicizie cuntun grup di zovins che a àn fondat ancje un fan club in gno onôr».
Tu âs vivût a Montecarlo par dîs agns e tu ses stât simpri a torzeon, ma la marilenghe no tu le âs dismenteade.
«No, o feveli furlan dut il dì, e je la mê lenghe. In diviersis ocasions o soi stât content di fâ di testimonial pe regjon e di rapresentâ il Friûl e i furlans. Int pragmatiche, nostrane».
Puartavistu alc di cjase ancje in Afriche, dilunc des garis?
«Une robe non mancjave mai: il persut di Sant Denêl, ben imbustât. E ancje une butilie di vin, di chel bon. Pronte par cuant che al jere alc di fiestezâ».
Blanc o neri?
«Il blanc nol è un vin di desert, al va bevût fresc. Miôr un bon Merlot».
Valentina Pagani
Apontaments / Tarcint, Vinars 6 di Setembar aes 18, Presentazion dal libri “Feminis furlanis fuartis” di Erika Adami te terace de Biblioteche Comunâl
Redazion
L’apontament si tignarà doman, Vinars ai 8 di Mai, aes 18, te terace de Biblioteche Comunâl, vie Divisione Julia a Tarcint. La Aministrazion Comunâl di Tarcint cun la Comision de Pari Oportunitât nus invide ae presentazion dal libri di Erika Adami “Feminis furlanis fuartis” che viodarà la partecipazion di une protagoniste dal libri e de […] lei di plui +
L'EDITORIÂL / LETARE AL GNÛF VESCUL. LA LEZION DI AQUILEE NO VA DISMENTEADE
Walter Tomada
Preseât bonsignôr Riccardo Lamba, gnûf Arcivescul di Udin, “La Patrie dal Friûl” i da il benvignût e i fâs i auguris pe so gnove mission. La miôr robe che o podìn sperâ, par lui e par nô, e je che al rivi a colp a jentrâ in sintonie cu la storie di cheste tiere, che […] lei di plui +
L’EDITORIÂL / Letare al gnûf Vescul la lezion di Aquilee no va dismenteade
Walter Tomada
Preseât bonsignôr Riccardo Lamba, gnûf Arcivescul di Udin, “La Patrie dal Friûl” i da il benvignût e i fâs i auguris pe so gnove mission. La miôr robe che o podìn sperâ, par lui e par nô, e je che al rivi a colp a jentrâ in sintonie cu la storie di cheste tiere, che […] lei di plui +
Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin
Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +
Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.
Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +
Gnovis / A tornin a jessi in volum li “LETARIS AI FURLANS” di Pre Bepo Marchet
Redazion
Une biele gnove pe nestre int! A tornin a jessi in volum li “LETARIS AI FURLANS” di Pre Bepo Marchet Intune edizion curade e comentade di Davide Turello, a saran presentadis MIERCUS AI 3 DI AVRÎL aes 5 e mieze sot sere inte sale consiliâr dal Comun di Glemone No stei a mancjâ! Us spietìn! […] lei di plui +