SPECIÂL – I 27 agns dal Teatro Incerto

«Forest», tal dopli significât: se si lu lei par inglês, «foreste», se par furlan «strani», che al ven di fûr.
Al è il spetacul dal Teatri Incerto, produsût dal Css Teatri di Inovazion dal Friûl-Vignesie Julie, che juste in chescj mês al va ator pe regjon in tourné, daspò la sflandorose «prime» dal mês di Mai. Fintremai dal titul, al pant la complessitât dal teatri che nus àn usâts Fabiano Fantini, Claudio Moretti e Elvio Scruzzi, i trê atôrs di Gradiscje di Sedean che, dal 1982, a continuin a dâ spessôr e modernitât al teatri par furlan. In cheste ocasion, tornant a fâsi dongje ae dramaturgjie inglese.
LA PÔRE DAL FOREST_Une piéce un grum interessante par vie che, si ben te olme de comedie «nere» e dal paradòs, e conte di une realtât che si lei tes pleis de societât dal dì di vuê, ancje chê furlane: ven a stâi il torment dal sei cerclâts, la pôre dal forest, dulà che «forest» nol è dome chel che al rive di cuissà indulà, baste aromai che al sei difarent.
Di fat, sul palc di sene si cjatin doi siôrs contadins furlans, Elvio Scruzzi e Fabiano Fantini, e il «forest», ma furlan ancje lui, Claudio Moretti, che dut un bot al rive in cjase lôr. Ae fin, la sô presince e je masse intrigose e sfrontade e, te ultime sene, i doi fradis a rivin sul palc cul fusîl e il badîl e un di lôr al conte di vê fate la «robe miôr», vint gjavât dai pîts il forest (no si sa in ce forme), che al riscjave di savoltâ la lôr «fuartece» di afiets e di sigurecis.
Un Friûl plen di pôre, chel contât dal Teatro Incerto cun grande maestrie, cence dâ judizis morâi, ma cu la capacitât di lei e presentâ ai spetatôrs, tant che intun spieli, la realtât dulà che a son impastanâts. Dut chest par mieç ancje de lenghe di ogni dì, un furlan diret, doprât cussì ben tal meti in risalt sei il drame, sei il paradòs, e bon di gjavâ fûr al public la ridade.
LA CARIERE_ In 27 agns di ativitât, il Teatro Incerto al à segnât un troi artistic un grum interessant dal teatri di autôr, cuntune olme comiche iresistibile, sei par talian, sei par furlan.
Tal 1985, la scree cu «Le scarpe prendono piede». Po, ducj i trê i atôrs a partecipin ae esperience di «I Turcs tal Friûl» di Pier Paolo Pasolini, cu la regjie di Elio De Capitani. La glagn comiche e continue cun «In confin di vite» (1992), par rivâ ae innomenade trilogjie dai spetacui «Four» dal 1997 (par inglês «cuatri», par furlan «fûr» dal ordenari, di cjâf), «Laris» (1997) e «Dentri» (2001), dulà che i trê si impegnin ancje intune personâl scriture dramaturgjiche. Tal 1995, po, il fâsi dongje, teatralmentri fevelant, ae poesie di Pasolini, cu doi spetacui: «Tal cour di un frut» e «Mandi tiere me». Dilunc chei agns e scomence par dongje une riflession su la emigrazion furlane che si mostre tai spetacui «Letaris di amôr e di fadie», gjavât fûr di un epistolari dai prins dal Nûfcent, e «Isoke-appunti per una storia d’amore fra una prostituta nigeriana e un meccanico friulano» (2003).
Tal 2002 la regjiste Rita Mafei e dirêç Fabiano Fantini e Claudio Moretti te piéce «Maratona di New York», un test di grande fortune in dut il mont, voltât in 11 lenghis e, cun lôr, pe prime volte recitât par furlan cu la traduzion di Paolo Patui.
Dal incuintri dal Teatro Incerto cun Claudio de Maglio, tal 2003, al nas «I Mosaiciscj», un spetacul che al grampe il public e al puarte ae riscuvierte dal patrimoni de storie di Aquilee e des origjinis dal Cristianisim chenti.
Al è dal 2007 il spetacul «Garage», une comedie esilarante sui siums e su lis bataiis di trê amîs che si cjatin sul liminâr dai cincuante agns. Un an dopo, il grup al torne a meti sul palc un test di Edoardo Erba e al volte par furlan «Muratori», che al devente «Muradôrs». L’an passât, il debut di «Bessôl – Un arbitro tal bunker» e, chest an, come che o vin dit, il gnûf spetacul «Forest»: une olmade su un aspiet de vite di vuê che al permet al spetatôr, forsit, di ricognossisi; dal sigûr di rifleti, cuntune bocje di ridi.
Antonella Lanfrit