Lis ostariis, chês che une volte in Friûl a jerin – tant che la latarie, la cooperative, la scuele, in part la canoniche – lûc di incuintri, di confront, di coments, di judizis e di costum di une comunitât, sono dome un ricuart e un cuadri di picjâ sul mûr de storie e des tradizions?
FINALMENTRI SI «TIRE FLÂT»_ Enzo Driussi, president dal «Comitato friulano difesa osterie» che juste chest an al finìs 25 agns, al rispuint intune cjalde zornade sul finî di Avost cjalant svintulant i siei impegns: «Mi vês juste brincât biel che o stoi lant ae scree de ‘Ostarie furlane’, propit dongje la abitance de Regjon a Udin; po dopo, tra doi dîs o ai di lâ ae scree de ‘Antica Trattoria Maddalena’, che e torne a vierzi in vie Pellicceria». Duncje? «Dopo agns, chestis olmis ti fasin tirâ flât». E se propit si intint di continuâ la liste des ultimis vierziduris, Driussi nol intint di dismenteâ «Gnagne Sese» in vie Marsala.
Si capìs, dutis logadis tal cjâf lûc dal Friûl, ma dal sigûr une rispueste avonde precise ae domande di fonde: «La ostarie no je muarte, che anzit – al zonte il president –, cumò a son ancje i zovins che lis frecuentin, par un tai onest».
Sodisfazion, duncje, par un Comitât che tal 1984 si jere dât dongje par sconzurâ il pericul che al les pierdût un patrimoni storic, culturâl e sociâl e che in chescj agns al à contât passe 150 ostariis che si son dadis dongje, di dutis trê lis provinciis dal Friûl, Udin, Gurize e Pordenon (a Triest la ostarie come che si le intint chenti no je), cence dî che a ‘nd è dal sigûr altris che no son iscritis al Comitât.
Tantis lis iniziativis, une soredut, che di vê proponût chel che po al è stât fat bon dal Consei regjonâl tal 2005: la leç pe difese, pupilance e rivalutazion dai locâi storics. Une vore dulà che il Comitât des ostariis al ricognòs ancje l’impegn e la determinazion dal conseîr regjonâl Giorgio Venier Romano.
IL RICOGNOSSIMENT_ La fonde che e à puartât la Regjon, juste tal Març di chest an, a ricognossi i locâi storics dal Friûl Vignesie Julie cuntune targhe, di aur o di arint, ai prins 296 esercizis comerciâi che a vedin almancul doi (trê, par jessi di aur) dai sîs recuisîts metûts te leç. Vâl a dî, jenfri chescj, une ativitât di almancul sessante agns documentabii, di jessi logâts intun sît significatîf dal pont di viste architetonic e storic, e di vê mantignude la mobilie origjinâl.
Po ben, di chescj scuasit tresinte esercizis, passe un centenâr a son ostariis, e sù par jù sîs siet a àn vût la tabele di aur. No dome: «O sai par sigûr che e à fate domande di ricognossiment une altre sdrume, scuasit un centenâr, e che la Regjon e varès di ricognossi sul principi dal an che al ven – al conte Driussi –. Segn che i ustîrs a àn capît la impuartance di chest distintîf».
La cuestion, però, e van ben oltri lis targhis, par vie che ce che al è di mantignî, al rimarche il Comitât, al è il «profum» de ostarie. Che al à carateristichis un grum precisis.
«Un tai di vin onest; la pussibilitât di zuiâ di cjartis; int daûr il banc che ti da un bon acet e ti salude simpri vulintîr; un ambient che al vierç di buinore e no scuasit a misdì o sore sere», al continue Driussi, e dulà che si mangje ancje ben.
UNE BUINE CUALITÂT_ Su chest cantin, il Comitât cuant che al è nassût al veve vût ancje un progjet, che nol è rivât po a bon puart ma che al reste ancjemò valevul: «Par savê cuale che e jere une buine ostarie – al pant Driussi – o vevin pensât di fâ un concors tra chei che a savevin fâ la miôr polpete, che al è il miôr spieli di une ostarie. Se si cjatin lis polpetis fatis dutis cu la cjar, inalore si è propit intune ostarie di lus».
Dut câs, cumò, l’espert al sigure che «si mangje ben dapardut, anzit, Udin al à ce sielzi par cont di ostariis cun cusine». E po, une altre olme dai timps di vuê: «I gjestôrs a stan curant in maniere particolâr la cualitât dal vin. O disarès miôr di simpri».
Si che duncje sparît il pericul di estinzion? «Chel mai, par vie che al pues simpri rivâ cualchidun, comprâ l’ambient e meti sù un spaç di alc altri. Dut câs, però, i segnâi di sperance a son, par continuâ a viodi e a frecuentâ chescj lûcs».
In agns passâts segnâts a dêt ancje tant che «lûcs di pecjadôrs», al pâr duncje che a vedin resistût tal lôr spirt di jessi pluitost puest di agregazion, un pont di riferiment pe cjacarade, lûcs dulà che si sta ben par fevelâ di alc di impuartant o par sviâ un moment i pinsîrs.
E daûr dal banc, un ripiâsi de tradizion, rignuvide però cuntun mistîr che al ponte ae cualitât dal acet, ae cure dai particolârs tal servizi e tes propuestis di proferî ai ospits.
Antonella Lanfrit
Apontaments / Tarcint, Vinars 6 di Setembar aes 18, Presentazion dal libri “Feminis furlanis fuartis” di Erika Adami te terace de Biblioteche Comunâl
Redazion
L’apontament si tignarà doman, Vinars ai 8 di Mai, aes 18, te terace de Biblioteche Comunâl, vie Divisione Julia a Tarcint. La Aministrazion Comunâl di Tarcint cun la Comision de Pari Oportunitât nus invide ae presentazion dal libri di Erika Adami “Feminis furlanis fuartis” che viodarà la partecipazion di une protagoniste dal libri e de […] lei di plui +
L'EDITORIÂL / LETARE AL GNÛF VESCUL. LA LEZION DI AQUILEE NO VA DISMENTEADE
Walter Tomada
Preseât bonsignôr Riccardo Lamba, gnûf Arcivescul di Udin, “La Patrie dal Friûl” i da il benvignût e i fâs i auguris pe so gnove mission. La miôr robe che o podìn sperâ, par lui e par nô, e je che al rivi a colp a jentrâ in sintonie cu la storie di cheste tiere, che […] lei di plui +
L’EDITORIÂL / Letare al gnûf Vescul la lezion di Aquilee no va dismenteade
Walter Tomada
Preseât bonsignôr Riccardo Lamba, gnûf Arcivescul di Udin, “La Patrie dal Friûl” i da il benvignût e i fâs i auguris pe so gnove mission. La miôr robe che o podìn sperâ, par lui e par nô, e je che al rivi a colp a jentrâ in sintonie cu la storie di cheste tiere, che […] lei di plui +
Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin
Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +
Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.
Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +
Gnovis / A tornin a jessi in volum li “LETARIS AI FURLANS” di Pre Bepo Marchet
Redazion
Une biele gnove pe nestre int! A tornin a jessi in volum li “LETARIS AI FURLANS” di Pre Bepo Marchet Intune edizion curade e comentade di Davide Turello, a saran presentadis MIERCUS AI 3 DI AVRÎL aes 5 e mieze sot sere inte sale consiliâr dal Comun di Glemone No stei a mancjâ! Us spietìn! […] lei di plui +