SPECIÂL. Il sium di une Ladinie unide

Dilunc i agns daspò des vueris, lis popolazions ladinis di Souramont, dutis lis voltis che a àn domandât di mudâ regjon a àn simpri mostrât di vê une buine scusse e une grande convinzion tal volê tornâ a unîsi culturalmentri cun chês altris comunitâts ladinis dolomitichis.
Di resint però, in ocasion dai apontaments referendaris di Fodom, Dampieç e Cuel, al è stât fat dai media un tentatîf di disinformazion che al smirave a ridusi dut a une pure cuistion di palanchis. Cheste azion naturalmentri e je nassude di dute chê schirie di personaçs che, par resons politichis, a son deventâts esperts di storie e che si son dâts cetant da fâ par confondi lis motivazions di une sielte referendarie volude par tutelâ une minorance che e riscje di pierdisi.
I CONTRARIS_ Chei contraris al mudament di regjon a fevelin di federalisim fiscâl, di anticostituzionalitât, di antistoricitât, di gjavâ i privileçs aes regjons confinantis a statût speciâl e di revisionisim storic, cence tignî cont però di un malstâ che jenfri lis popolazions ladinis al è simpri plui evident.
LA STORIE_ Fasint un piçul viaç indaûr (… nancje tant) tal timp, si pues fâsi une idee clare di cetant che a son fondis lis lidrîs dai popui ladins e cetant che a son legjitimis lis reson dal referendum.
Daspò dai agns di apartignince al popul tirolês, i comuns dal Souramont (che a àn fat part de diocesi di Brixen par dibot 1000 agns) dilunc de prime vuere mondiâl a son stâts separâts des comunitâts ladinis dal Sella. Tal non di une fuarte identitât e culture ladine tirolese, di subit a àn domandât di tornâ a jessi part integrant dal Sudtirol, cjapant però tant che rispueste dal guvier fassist talian, une dolorose tripartizion (agns 1923-27). Intai agns 1943-45, cuintri la volontât des popolazions ladinis di “Souramont”, il guvier democratic talian al à finît la opare, agregant in maniere definitive i trê comuns di Fodom, Dampieç e Cuel ae provincie di Belun.
IL RICAT_ Tal 1945, cuntune petizion, i comuns interessâts a domandin di tornâ sot de provincie di Bolzan ma il guvier talian, par distudâ la iniziative, cuntun at di ricat, al menace di suspindi lis operazions di tratative pe autonomie dal Sudtirol se la Sud Tiroler Volks Partei e la Austrie a vessin sostignût ancjemò la cause ladine.
Di resint, daspò i risultâts plui che positîfs dai ultins referendums, e fuarte de poie di une part dal guvier in carghe (che tant a àn fât stiçâ il governatôr dal Venit), lis popolazions ladinis di Souramont a tornin a cjalâ un tic di lustri e a viodin sbassâsi chei confins che lôr propite no àn mai volût.
Sandri Olivetto