Chest an l’Ateneu furlan al fiesteze i siei prins 30 agns, une date impuartante che e rive intun moment dificil par dut il sisteme universitari. Il probleme dai finanziaments si lu sint fuart ancje in Friûl e al à impegnât subit la gnove Retore, Cristiana Compagno, elete dome pôcs mês indaûr. Par cognossile miôr e capî la sô posizion par ce che al tocje lis cuestions che zaromai di mês si lein sui gjornâi, le vin intervistade.
LA PLUI ZOVINE COMERCIALISTE DAL NORDEST_ Il percors che al à puartât Cristiana Compagno a deventâ Retore a Udin al è pardabon interessant. Daspò di jessisi laureade tal 1981 ae facoltât di economie de Universitât di Triest, e je jessude dal ambient academic e e à lavorât prime tant che comercialiste (e jere la plui zovine dal Nord Est), e daspò e à seguît la introduzion dal sisteme di certificazion dai belançs tes grandis aziendis. E torne tal mont universitari al inizi dai agns ’90 tant che ricercjadore in Economie e gjestion des impresis, simpri tal Ateneu triestin. Daspò di cualchi an, e vinç il concors par professôr associât in Organizazion e direzion aziendâl.
LA RIVADE AE UNIVERSITÂT DAL FRIÛL_ Il trasferiment di Triest a Udin al rive tal 2000, cuant che il retôr Magnific di chê volte, il prof. Marzi di Strassolt, al clame a Udin professôrs e ricercjadôrs furlans sparniçâts par dute Italie, cul fin di potenziâ l’Ateneu e di ridusi il numar di docents pendolârs che nol zovave ae cressite de Universitât. La sielte e fo juste parcè che, come che e dîs la Retore stesse, vivi te citât dulà che si insegne al permet di jentrâ ad implen te vite universitarie, e chest al zove ae cressite e al disvilup de istituzion.
GRANCJ RISULTÂTS_ Tal 2002 la professore Compagno e vinç il concors par professôr ordenari e, cun di plui, e ven delegade ae inovazion e al trasferiment tecnologjic. Une deleghe pardabon impuartante, viodût che cheste e je ancje la tierce mission fondamentâl de Universitât. E i bogns risultâts si son viodûts, come che jê stesse e marche cuntune cierte braure:
“O vin vinçût ducj i premis pe inovazion, e o vin i miôrs indicadôrs a livel talian”.
Insome la disfide sul plan de cualitât l’Ateneu le à vinçude, cumò si àn di frontâ problemis di altre nature: chei dai finanziaments. Il probleme dai tais al interesse dutis lis universitâts talianis, ma tal câs di Udin si inserìs intune situazion ancjemò plui grivie, di un sotfinanziament anuâl di 15 milions di euros. Dal 2001 in ca, la Universitât dal Friûl e à madurît un credit tai confronts dal stât di 95 milions di euros; di mês si fevele di fonts insuficients e lis cifris a fasin pardabon impression.
“Al è fondamentâl capî che dut chest al è un pericul pe evoluzion stesse dal Ateneu. A mi mi sta une vore a cûr che la int e deventi consapevule dal pericul sociâl che la Universitât e cor: o sin une istituzion zovine ma impuartante pe societât furlane, tai ultins 30 agns o sin stâts un motôr fondamentâl di cressite pal nestri teritori. Anzit, o podìn dî di jessi l’unic vêr vantaç competitîf dal Friûl”.
Sì, parcè che lis dificoltâts finanziariis a metin in pericul sedi la capacitât di mantignî une ufierte didatiche in linie cun ce che al domande il mont dal lavôr, sedi la capacitât di fâ ricercje di cualitât. Ven a stâi, si met in crisi la capacitât di creâ cognossince e di formâ lis gnovis classis dirigjentis de societât furlane (ma no dome): in pratiche, la mission de istruzion academiche.
IL RISI PAL ATENEU_ Tai ultins mês chest argoment al è stât frontât di plui bandis, ancje de stesse zonte regjonâl. La Assessore ae universitât e ricercje Alessia Rosolen e à fevelât plui voltis sedi di une fondazion regjonâl sedi di une uniche universitât regjonâl. Nissun dai doi progjets però al è stât spiegât tal detai, ma il risi di une pierdite di autonomie pal Ateneu furlan al è saltât subit tai voi. O vin domandât ae Retore une opinion su chestis cuestions e, se di une bande – par chel che al inten la fondazion regjonâl – no si è esprimude, propit parcè che il progjet nol è par nuie clâr, di chê altre – par chel che al rivuarde la cuestion de autonomie – e je stade pardabon clare.
“Une robe e je la razionalizazion des risorsis par cualificâ la ufierte didatiche e par liberâ risorsis pai ateneus, e su chest no pues che jessi in acuardi. Dute une altre robe invezit e je le autonomie des istituzions, che e je un valôr sociâl e che no pues jessi metude in discussion. Cun Triest o vin une sorte di “coopetizion”: o cooperin li che o sin plui debui, ma o sin in competizion su la ufierte formative”.
Fevelâ di autonomie tant che valôr sociâl nus puarte a rifleti sul rûl che la nestre Universitât e à propit tai confronts dal Friûl, come che al ven sclarît ancje tal articul 26 de leç 546/77 che le à istituide. La volontât dal popul furlan e je stade il motôr pe nassite dal Ateneu, che al à propit il fin di favorî “il progrès civîl, sociâl e la rinassite economiche dal Friûl e di deventâ […] strument pal disvilup […] de culture, de lenghe, des tradizions e de storie dal dal Friûl”. E la Retore Compagno e je convinte che dut chest al sei stât rispietât ad implen.
“O vin promovût il disvilup dal teritori, par chest o vin i indicadôrs di cualitât jenfri i plui alts a nivel talian. A livel statâl o sin viodûts tant che un model di integrazion Universitât/teritori. Il scambi di cognossincis, fuarcis, ideis e sburts cul teritori al è costant, e continui, o sin presints in dutis e trê lis provinciis furlanis e chest al è fondamentâl. In cheste otiche, la sielte di voltâ par furlan il non dal Ateneu cun Universitât dal Friûl, mi somee plui che induvinade”.
No son dubis sul fat che la Universitât e sei stade un motôr pe economie e pe societât furlanis, ma trop Friûl e trop furlan sono jentrâts te Universitât? E je vere che e esist une struture stabile di ricercje, il Centri Interdipartimentâl di Ricercje su la culture e la lenghe dal Friûl (CIRF), che e puarte indevant diviers progjets, soredut in gracie dai fonts regjonâls e statâi, però no si pues dineâ che i problemis no mancjin. Il CIRF par esempli al à pôc personâl e pal plui precari, e chest nol permet ciert di fâ une politiche linguistiche costante. Cun di plui, daûr de leç regjonâl 29/07 su la promozion e la tutele de lenghe furlane, la Universitât dal Friûl e à ancje il compit di formâ i insegnants. E pûr, se si cjale la ufierte didatiche di Siencis de formazion, no si pues no viodi che il numar di cors su la didatiche dal furlan e su la lenghe furlane in gjenerâl, al è pardabon bas. Ducj problemis che a saran simpri plui dificii di risolvi, viodûts i tais dai finanziaments.
“Il CIRF al à cence dubi un rûl fondamentâl no dome pe istituzion academiche ma par dut il teritori” e dîs la Retore, “al è necessari rinfuartîlu e potenziâlu, ma cul 2009 no si podaran fâ assunzions e, fale che no saltedin fûr risorsis in plui, il procès di impuariment al rivuardarà ancje chest Centri. Par chel che al inten i insegnaments invezit, al è impuartant clarî che no si trate di une strategjie dal Ateneu o de facoltât. O vin vincui ministeriâi une vore fuarts e par podê ativâ i cors si àn di rispietâ cierts recuisîts minims. Chest al è propit il risi leât al tai dai fonts: l’indeboliment de ufierte didatiche, un bas numar di cors. Il nestri orientament al è chel di tignî vîf il studi de lenghe e de culture furlanis parcè che a caraterizin la nestre identitât e chê de nestre tiere. O vin un dovê morâl viers il Friûl e il nestri obietîf al chel di assolvilu”.
La fevelade si siere cuntun bon avôt, la situazion e je dificile e i furlans a varan di lavorâ une vore par mantignî salde la lôr Universitât, ma i prins pas de Retore a somee che a vadin inte direzion juste.
Federica Angeli
Apontaments / Tarcint, Vinars 6 di Setembar aes 18, Presentazion dal libri “Feminis furlanis fuartis” di Erika Adami te terace de Biblioteche Comunâl
Redazion
L’apontament si tignarà doman, Vinars ai 8 di Mai, aes 18, te terace de Biblioteche Comunâl, vie Divisione Julia a Tarcint. La Aministrazion Comunâl di Tarcint cun la Comision de Pari Oportunitât nus invide ae presentazion dal libri di Erika Adami “Feminis furlanis fuartis” che viodarà la partecipazion di une protagoniste dal libri e de […] lei di plui +
L'EDITORIÂL / LETARE AL GNÛF VESCUL. LA LEZION DI AQUILEE NO VA DISMENTEADE
Walter Tomada
Preseât bonsignôr Riccardo Lamba, gnûf Arcivescul di Udin, “La Patrie dal Friûl” i da il benvignût e i fâs i auguris pe so gnove mission. La miôr robe che o podìn sperâ, par lui e par nô, e je che al rivi a colp a jentrâ in sintonie cu la storie di cheste tiere, che […] lei di plui +
L’EDITORIÂL / Letare al gnûf Vescul la lezion di Aquilee no va dismenteade
Walter Tomada
Preseât bonsignôr Riccardo Lamba, gnûf Arcivescul di Udin, “La Patrie dal Friûl” i da il benvignût e i fâs i auguris pe so gnove mission. La miôr robe che o podìn sperâ, par lui e par nô, e je che al rivi a colp a jentrâ in sintonie cu la storie di cheste tiere, che […] lei di plui +
Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin
Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +
Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.
Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +
Gnovis / A tornin a jessi in volum li “LETARIS AI FURLANS” di Pre Bepo Marchet
Redazion
Une biele gnove pe nestre int! A tornin a jessi in volum li “LETARIS AI FURLANS” di Pre Bepo Marchet Intune edizion curade e comentade di Davide Turello, a saran presentadis MIERCUS AI 3 DI AVRÎL aes 5 e mieze sot sere inte sale consiliâr dal Comun di Glemone No stei a mancjâ! Us spietìn! […] lei di plui +