SPECIÂL – La nêf: il so destin za tal non

Nives Meroi, par cuale escursion si staie preparant in chest moment?
«No, al è masse adore: fin ae prossime Vierte no si pues pensâ a spedizions o a viaçs internazionâi. In chest moment o soi lavorant, o stoi fassint une conference».
Cemût? No vivie dome di sport, di alpinisim?
«Se o vivès intun altri stât, probabilmentri sì, ma o stin in Italie, si che – in gracie dai sponsors – o rivi juste a cuvierzi lis spesis de spedizion. Par une famine al sarès ancjemò plui complicât vivi dome di sport, cussì tocje dâsi da fâ, conciliâ il sport cun altris ativitâts che a detin di vivi».
Passie tant timp a alenâsi?
«Jo e il gno om, che al ven simpri in cuardade cun me, no vin un alenament specific. Pluitost: o vivìn la mont e o gafìn dutis lis oportunitâts che nus capitin sot man, in ogni stagjon».
Ancje di Invier?
«Dal sigûr! Mi plâs un grum l’alpinisim invernâl, al è un dai miei preferîts. Jo o soi ancje patide di schi alpinisim, che no vûl di butâsi jù di une piche, schiant fûr des pistis dopo vê cjapade une teleferiche o un elicotar. Al vûl dî lâ sù su pe mont doprant dome lis piels di foche sot i schîs. Dome tu, la mont e la nêf. Nuie altri».
Te nestre regjon cuâi sono i puescj che je e consee?
«O vin une regjon “speciâl”, che e à dentri di se un condensât di tantis robis: un struc di ducj i paisaçs dal Nordest. No pues fâ un elenc, al sarès ridutîf e o corarès il pericul di lassâ fûr alc. Pensait dome ae bielece des Alps Juliis o aes Dolomitis furlanis: o ai za dite dut».
Sì, ma e varà ben un lûc dal cûr…
«Dome par resons pratichis e di comoditât, o dîs il Mangart».
Ce rapuart aie cu la nêf?
«Eh! (E rît). Un rapuart segnât, si pues dî. I miei gjenitôrs mi àn indreçade pal troi, ancjemò prime di nassi. Il gno non al vûl dî propit “nêf”. Predestinade».
In efiets e je finide propit a Fusinis.
«O vin nêf abondant, po dipent des condizions e dai agns. Ma la nêf, in efiets, no mancje».
Ce aie cjatât chi in Friûl?
«Jo no soi nassude ca. Ma o dîs simpri che o soi stade adotade di cheste tiere. Mi à fate sô fie. Ma no je dome cuistion di monts e di nêf. E je la specificitât di cheste zone: trê popui, trê culturis, paisaçs e condizions climatichis cussì diviersis… ».
Cemût vaie frontade la mont?
«No va cjapade sot pît, mai. Di Istât e tant mancul di Invier. Dal sigûr al covente che no sedi frontade cun impreparazion. Cussì, cjapìn il câs de mont di Invier, dulà che si cjate ancje la nêf. Bisugne cognossi lis situazions specifichis, lis condizions de nêf, il pericul di une slavine, lis dificoltâts, il clime. Pluitost: vicinâsi in mut coret, cun personis che a cognossin la situazion e che a vedin un minin di esperience, di mût di cjaminâ, scjalâ o schiâ in maniere sigure».
Jê, cemût aie imparât?
«No ai fat nissun cors tecnic di preparazion, ma o ai imparât cetant dal vivi in mont, cun umiltât, cuntun “svicinament” lent, in grât di cognossi l’ambient, lis dificoltâts e di frontâ la nature che ti sta dulintor tal mût mancul azardôs pussibil».
Il nestri mût di frontâ la mont isal diviers dal rest dal mont?
«Culì di nô no je competizion. Invezit, par esempli, sul Himalaya e je une sorte di corse a cui che al fâs miôr e a cui che al concuiste plui pichis: no sai trop che chest al sedi funzionâl al aspiet mediatic. Jo però no le vîf cussì: no mi interesse di jessi par fuarce la prime femine a rivâ dulà che altris no son rivadis, par me scjalâ la mont al à un altri significât».
Cuâl?
«Esploratîf. Lâ in mont par scuvierzi, no par consumâ. Lu ai imparât chi di nô».
In ce sens?
«Il mût di lâ in mont che o dopri sul K2 o sul Himalaya al è il stes che o ai doprât su lis Alps Juliis. A cambiin i ambients, ma no il mût di lâ in mont».
A proposit: jê e je nomenade ancje pal so stîl lizêr di lâ in mont.
«Jo o met in vore dute une schirie di azions che a vuelin dî alpinisim a impat ambientâl “zero”: o puarti a cjase lis mês scovacis, no dopri i puartadôrs, no dopri ossigjen, no dopri cjamps base prestabilîts. A son regulis semplicis che jo e il gno om o vin adotât, imparantlis propit de stesse mont. Scjalâ tant che un confront franc e onest cu la mont. Il persac al pesarà di plui, ma o sin ancje plui rispietôs dai puescj che o visitin e dai popui e de int che o incuintrin sul nestri troi».
A son tancj mûts di cjaminâ in mont, ma mi pâr che ognidun sul Himalaya al fasi un pôc cemût che al vûl, o che al dopri i mieçs che al vûl.
«Dipent di cemût che o considerìn l’alpinisim. Par me, al è un mieç che mi permet di cognossi, di sperimentâ: libertât e fantasie. Duncje, ognidun al va in mont cemût che al vûl. Jo o voi cussì, cemût che
o ai juste dite».
Ce vantaçs i aie procurât?
«Une miôr gjestion de fature e dal stress.
E duncje control plui grant des risorsis fisichis e psicologjichis».
Un fat là che la nêf e sedi stade protagoniste tes sôs vicendis alpinistichis?
«La nêf e je une vore presint. Ancje chest an, intant che o stavin cirint di rivâ sul Annapurna, a 7.000 metris di altece. In che dì, jo, il om Romano e Luca Vuerich si sin cjatâts di front di un conoit di nêf, là che a vignivin jù metris cubis di glace, dilunc la parêt. Po, part di cheste discjamade e à sbatût cuintri un spiç e e à cambiât direzion: e vignive viers di nô. Luca al à tacât a scjampâ, corint te nêf altone – pensait che o jerin a 6.000 metris e che il so persac al jere cetant pesant! -. Invezit jo e Romano si sin scrofâts e o vin metût il persac sore il cjâf. E someave la fin, ma l’Annapurna nus à graciâts: la masse e à sbatût di une altre bande e o sin restâts taponâts dome di un sbuf di nêf. Si sin capîts cuntune voglade: o vin lassade la mont e o sin lâts a ringraziâ la “dee mari dai racolts”, cemût che la int dal puest e clame cheste mont».
Oscar Puntel
_________________________________________________
BIO_ LA FEMINE DAI RECORDS
Nives Meroi e je nassude a Bonate di Sot (in provincie di Bergamo), ai 17 di Setembar dal 1961. Di passe vincj agns in ca a sta in Friûl, a Fusinis, dulà che a à cognossût il so om, Romano Benet.
I doi a son ancje compagns di scjaladis, di passe 20 agns. Si son dedicâts a impresis memorabilis, par esempli la «prime» invernâl al Pilastri «Piussi», te parêt nord dal Piçul Mangart di Coritenza e chê de «Cengia degli Dei», sul Jôf Fuart. No dome monts: ancje crets, discjadudis di aghe, schi estrem e schi in alte cuote. Cul timp, il lôr amôr pe mont ju à pocâts a scuvierzi i gnûfs lûcs dal alpinisim, i puescj dulà che l’aiar al comence a deventâ plui srarît.
Je e sosten un alpinisim lizêr e net: cence ossigjen suplementâr, sherpa che a puartin i bagais par te, cjamps fis. In sumis, cjaminâ tant che moment di confront cun se stes e cu la mont.
Jenfri Andis, Himalaya, Karakorum, il so percors tant che atlete de mont al è stât un sucès  continui. Tal 2003, in 20 dîs, e à scjalât trê dai 14 «Vot mil de tiere» (Gasherbrum II, Gasherbrum I, Broad Peak): e je stade la seconde cuardade a realizâ alc dal gjenar e la Meroi, e je stade la prime femine in assolût,
te storie dal alpinisim.
In dut, a son 11 i «Zigants de Tiere» che Nives Meroi e Romano Benet a àn scjalât: cumò a ‘ndi mancjin dome cuatri par completâ il progjet. Chestis lis pichis za concuistadis: Nanga Parbat (8.125 m – 1998), Shisha Pangma (8.046 m – 1999), Cho-Oyu (8.202 m – 1999), Gasherbrum II (8.035 m – 2003), Gasherbrum I (8.068 m – 2003), Broad Peak (8.047 m – 2003), Lhotse (8.516 m – 2004), Dhaulagiri (8.164 m – 2006), K2 (8.611 m – 2006), Everest (8.850 m – 2007), Manaslu (8.163 m – 2008).
Dut câs, e reste la femine dai «records». Miôr di jê, cun 12 «Vot mil», a àn fat dome la spagnole Edurne Pasaban, la todescje Gerlinde Kaltenbrunner e, cun 13 monts, la coreane Oh Eun-Sun. Il scritôr Erri De Luca al à contât intun libri («Sulla traccia di Nives», Mondadori) dute cheste storie. Al à scrit: «Dove più schiacciante è la superiorità della natura, lei e suo marito mettono in gioco il loro corpo e nient’ altro sostegno. Praticano regole di ostinata lealtà con la montagna. Le altre due alpiniste intendono diversamente l’impresa, una ha impiegato ossigeno, l’altra adopera portatori di alta quota che si sobbarcano di tutto il peso sulle spalle, scavano la piazzola, montano la tenda e fanno trovare il tè caldo già pronto». (O. P.)