Sfuei Mensîl Furlan Indipendent
Archivi de Patrie

SPECIÂL – La speculazion imobiliâr in Spagne

............

Za intune fase de ditature franchiste ciertis zonis de Spagne, pal plui de cueste, a jerin stadis tocjadis di grandis speculazions imobiliârs, ma al è tai agns dal Novante che al cjape forme chel fenomen che cumò al è la cause di crisi plui serie.
Par agns la speculazion imobiliâr no à vût nissun fren: la costruzion di tantis cjasis e je stade la fonde dal bum economic spagnûl, che e à riclamât une vore di lavoradôrs ancje dal forest (plui di dut Afriche e Americhe latine) e che par agns e à fat someâ une sorte di meracul economic.
UN SISTEME SBELANÇÂT_ Ma il sisteme al jere sbelançât dal bon principi di abûs, de coruzion solite des lotizazions, e fintremai a son stadis ilegalitâts cuintri di parons pôc contents de edificazion e ancjemò di plui cuintri di incuilins che a gjoldevin di fits vecjos e masse favorevui. La inversion tal setôr imobiliâr e je stade la fiere dal aur che e à svuarbât la plui part dai citadins spagnûi, ancje cuant che si son cjatâts a paiâ lis primis consecuencis une vore negativis, vâl a dî la cressite tremende dal presit des cjasis e dai fits: plui dal dopli o dal tripli di ce che al jere prime.
Ma la convinzion e jere chê de cressite indefinide e infinide dal valôr dai imobii, ancje cuant che al jere clâr che lis costruzions gnovis a vevin une cualitât dai materiâi e dai progjets une vore basse: se intune citât come Udin un citadin spagnûl al veve di paiâ sui 5.000,00 euros par metri cuadrât, al leve in bancje e al faseve cence masse problemis un mutui biel alt par 40 o 50 agns, te sperance che in ogni câs la cjase e varès vût un valôr simpri plui alt, ma in realtât butantsi intune neosclavitût sot dai istitûts di credit.
LIS COLPIS DES BANCJIS_ Di fat lis bancjis a son stadis la clâf di chest fenomen autolesionist di dute une societât: i impresaris a domandavin credit ae bancje par comprâ i terens, za masse cjârs par vie de clime speculative, pal materiâl e par paiâ i lavoradôrs; la int e domandave credit aes bancjis par comprâ la cjase. In sostance lis bancjis a àn drenât lis risorsis dal paîs, molzint di dôs bandis, cence che si rivàs a nissune vere cressite economiche e sociâl: par paiâ i mutuis une vore alts la int o si è indebitade ancjemò di plui cui sistemis plui varis e mancul convenients di cjartis di credit e ae fin e à sbassât i consums, duncje il cumierç locâl si è inviât a une involuzion progressive; di chê altre bande lis bancjis a àn invistît i bêçs che a rivavin dai siei clients o intal setôr spagnûl plui fuart, la edilizie stesse, o ben tes realtâts forestis plui convenientis. Cu lis primis scjassadis de crisi internazionâl si è viodût a colp che il monoivistiment imobiliâr al veve fat de economie spagnole une des vitimis plui debilis: cumò a son uns 3 milions di cjasis vueidis, fatis dome par speculazion e par clients che no varessin mai podût esisti, une disocupazion declarade ator dal 20%, un marcjât imobiliâr pardabon imobil par vie che ducj a vuelin vendi, ma nissun nol pues vendi a un presit plui bas dal 30% di ce che al veve paiât, miârs di cjasis no finidis come monument ae miopie de planificazion e tante part dal teritori vuastadis par simpri.
Sandri Carrozzo

L’EDITORIÂL / La lezion de bandiere par dismovisi dal letarc

Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +

La piçade / Fevelìn di autonomie pluio mancul diferenziade

Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +

L’EDITORIÂL / No stin a colâ inte vuate de indiference

Walter Tomada
Al à fat une vore di scjas l’articul scrit su la “Patrie” di Setembar di Marco Moroldo, furlan che al vîf in France e che al à insegnât ai siei fîs la marilenghe. Tornât a Mortean pes vacancis di Istât, al à provât a cirî cualchi zovin o cualchi frut che al fevelàs furlan cui […] lei di plui +