SPECIÂL – Liet 2009: ancjemò une volte un grup Sami

LA CLASSIFICHE FINÂL DAL LIET 2009
1. SomBy, Sami, Finlandie;
2. Dr. Drer & CRC Posse, Sardegne, Italie
3. Lino Straulino, Friûl, Italie
4. Fiach, Irish Gaelic, Irlande
5. It Langstme & de Dea, Frisian, Frisie
6. Sattuma, Karelian, Federazion Russe
7. Sunrise Not Secular, Scottish Gaelic, Scozie;
8. De fofftig Penns, Low German, Gjermanie;
9. Alfredo Gonzalez, Asturian, Spagne;
10. Zine, Occitan, France;
11. Sovvalniks, Latgalian, Letonie
Daspò di Leverkusen, il Friûl al stave par vê une altre gnot pardabon magjiche, cheste volte a Leuwardeen (non pôc difarent), li dal teatri De Harmonie dulà che si è davuelte la finâl dal Liet International, il 31 di Otubar stât.
Come che al capite dispès ancje ae nestre scuadre di balon, se denant di un aversari plui fuart, de sfortune nere e di un public forest tu sês bon di tirâ fûr il cûr, il risultât al vâl come une vitorie.
LA SFORTUNE DI LINO_ Plui o mancul chest al è sucedût al nestri Lino Straulino, che si è cjatât denant une schirie di grups dal fuart impat senic e di sunôr, intun teatri jemplât di almancul mil personis.
La rispueste dal nestri rapresentant no podeve jessi plui fuarte e convincente… Creant un stac cun dut ce che si à scoltât prime e dopo, Lino si è presentât sul palc di bessôl cu la sô ghitare, sunant il  so classic “Doman”
e otignint dal public une concentrazion e un cidinôr sbrocâts tun batimans finâl liberatori e emozionât (une des reazions plui entusiastis de serade).
Ma come in ogni epiche sfide di balon, la sfurtune e a zuiât la sô part, condizionant il funzionament dal microfon che al à tacât a sgreseâ propit te ultime part de so esecuzion. La organizazion frisone, consapevule di cheste penalizazion, e à decidût di ripeti la esibizion di Straulin a fin serade, ma cu la tension che si sblocave e la strachetât che e tacave a fâsi sintî, no si podeve pretindi miôr di ce che Lino al veve za savût esprimi in prime batude.
CUART PREMI SAMI_ E cussì, la jurie internazionâl e à decidût di premiâ la enesime operazion ben confezionade de bande di un grup Sami. Pe cuarte volte, la minorance etniche linguistiche de Laponie e à puartât a cjase une vitorie cul grup cuasi dut feminin dai SomBy… Une sorte di Iron Maiden nordics e adolessents, cun intor une simpatiche divise tradizionâl.
Dentri di une classifiche une vore strente, il nestri Lino Straulino al rive dome tierç dopo dai sarts Dr Drer & Crc Posse, che a àn vinçût il premi dal public e che a son rivâts seconts te classifiche de jurie.
Come simpri, il nivel medi de cualitât artistiche esprimude de bande dai artiscj al è stât une vore alt; forsit al è mancjât un vêr toc, une vere melodie di puartâsi a cjase daspò di tante musiche (e di chest pont di viste il nestri Lino al reste il vincidôr morâl).
Ancje il nivel cualitatîf de organizazion al è stât come simpri une vore alt (i popui nordics a son simpri une garanzie), cussì come la ospitalitât e il clime viert di condivision jenfri lis diviersis minorancis che a partecipavin.
Insome, il Friûl si puarte a cjase une mieze vitorie, stant che a plaçâsi al secont e al tierç puest de classifiche finâl a son stâts propit doi grups saltâts fûr de semifinâl furlane di Suns, tal Setembar passât.
Intun festival dulà che i tocs presentâts a samein simpri plui progjets calcolâts a taulin, sperìn che a rivi prest ancje une nestre vitorie uficiâl! Cheste volte o sin lâts une vore dongje, batint il nestri troi cun braure… jentrant cence fâ scjas de puarte di servizi di chest grant festival, in gracie de sensibilitât di un dai artiscj plui sclets e poetics che il Friûl al vedi mai vût.
Leo Virgili