Sfuei Mensîl Furlan Indipendent
Archivi de Patrie

SPECIÂL – Lis bufulis des previsions meteorologjichis

............

«Preparait manecis e siarpis parcè che chel di chest an al sarà un Invier frêt e nevôs». Tropis voltis pal telegjornâl no si viodino servizis che a sparin previsions a drete e a çampe, che a sunin cuasi tant che profeziis e che a fasin pôre a chei che a àn simpri lis mans fredis? Nuie pôre, a son dutis balis. I previsôrs no àn ancjemò i struments par previodi ce timp che al fasarà tra doi o trê mes, e forsit nancje Diu lu sa.
PREVISIONS PÔC CRODIBILIS_ «Lis previsions si podin fâ al massim pai prossims 10 dîs: chês stagjonâls no son ancjemò avonde credibilis – al spieghe Marcellino Salvador, che al lavore al Osservatori meteorologjic regjonâl (Osmer) – ma a son dome ipotesis, soredut chi in Friûl, dulà che lis robis a cambiin di un moment a chel altri par vie dai piçui moviments de atmosfere». Insome, a son di cjapâ cun prudence, ancje se al esist un centri european di previsions dal timp, dongje Londre, dulà che si studiin modei matematics climatologjics che a dan cualchi rispueste. «Ma a son informazions cence garanzie, no avonde siguris par sei dopradis – al va indenant Salvador – . Pe stagjon 2009-2010 a disin che la tindince e  sarà chê di un Invier a pene un pôc plui cjalt de norme e cun plui ploie e nêf su pes monts». Ma, come che o vin capît, cheste tindince e pues sei smentide benon.
CJALANT INDAÛR_ Dant une cjalade indaûr, invezit, si pues capî cemût che a son cambiadis lis stagjons tai agns. «Dal 1960 in ca, i Inviers a son plui cjalts – al spieghe Salvador –, une tindince che o stin regjistrant in maniere costante». Nol bisugne pensâ a cuissà ce: si fevele di a pene mieç grât, che par un che no si intint di previsions al somee une monade, ma vuai a dîlu al previsôr: «Mieç grât in cincuante agns al è tant», ti rispuint.
L’Invier passât al è stât storic. No si viodeve cussì tante nêf su pes monts di almancul cincuante agns in ca. «A ‘nd è vignude jù cussì tante che e à fat strât par mês e mês – al dîs il metereolic – . Sul Gilberti si son regjistrâts cutuardis metris di nêf frescje che e à formât un strât di plui di sîs metris, che al à durât dute la stagjon. Sul Pramuel o vin vût vot metris di nêf, come ancje sul Çoncolan».
In planure, la situazion e je difarente. Cui che al à lis nonis o i gjenitôrs che a contin di cuant che a jerin zovins, dal sigûr al à sintût a dî: «Cuant che o jeri piçul jo, e vignive tante di chê nêf che si zuiave a balonâsi par mês». E di fat, timp indaûr, al sucedeve. «Dusinte agns fa, a Udin e colave une medie di sessante centimetris di nêf par an. Cumò o sin passats a sîs – al precise Salvador, dal Osmer – . Chest par colpe des temperaduris plui altis che a fasin butâ la nêf in ploie».
NÊF DIFICILE TE PLANE_ E cumò al capitarà ben che cualchidun, intune zornade grise e cul cîl pesant, al cjali adalt e al disi: «Al è timp di nêf». Dait un cuc al termometri prime di fasi stranis ilusions. «Al è di tredis agns che inte plane no regjistrìn une zornade dulà che la temperadure e sedi a pâr o sot dai zero grâts par dut il dì – al conclût Salvador – . La ultime volte e je stade tal ’96, cuant che o vin vût cuatri dîs, un daûr chel altri, sot zero ancje di dì, tra Nadâl e l’ultin dal an».
Valentina Pagani

L’EDITORIÂL / La lezion de bandiere par dismovisi dal letarc

Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +

La piçade / Fevelìn di autonomie pluio mancul diferenziade

Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +

L’EDITORIÂL / No stin a colâ inte vuate de indiference

Walter Tomada
Al à fat une vore di scjas l’articul scrit su la “Patrie” di Setembar di Marco Moroldo, furlan che al vîf in France e che al à insegnât ai siei fîs la marilenghe. Tornât a Mortean pes vacancis di Istât, al à provât a cirî cualchi zovin o cualchi frut che al fevelàs furlan cui […] lei di plui +