Nestre interviste a un pescjadôr di Grau, imberdeât tai problemis dal vuê
Ferruccio Polo al è pescjadôr a Grau dal 1979. Cun lui o vin fevelât di cemût che al è in dì di vuê il so mistîr e dai problemis, ancje resints, de pescje in Friûl.
Siôr Polo, cemût isal gambiât il mistîr di une volte a vuê?
Cuant che jo o ai tacât, dal ’79, si leve in mâr cuant che al cricave il dì e si tornave tal dopomisdì, vuê i oraris a son gambiâts par dâ un prodot plui fresc: si jevisi a dôs e mieze di buinore e si torne a siet e mieze.
Alore rispiet a timp fa il prodot al è adiriture miôr, par une volte chei dal “agns indaûr si mangjave miôr” no puedin dîlu pal pescjât…
Il prodot al à lis stessis carateristichis, ma al rive 24 oris prime sul marcjât.
Un altri element di difarence di cuant che al lavorave gno pari al è che cumò si colabore une vore di plui jenfri lis comunitâts. Cumò e esist une uniche OP (Organizazion Produtôrs) di Chioggia a Monfalcon, passant par Maran e Grau. Une volte jenfri i paîs di pescjadôrs a jerin dome barufis.
E trops dîs lavoraiso par setemane?
Nô che si ocupìn di vongulis e fasolaris – jo in particolâr o soi un fasolâr – o lavorìn cuatri dîs par setemane, chei che si ocupin di pescjât, cinc dîs sui siet.
Tant che fasolâr o dopri un mieç clamât “draga motosoffiante” impen di une vere barcje, che a doprin chei dal pescjât.
Rispiet ai problemis che si à sintût fevelâ di resint, il gasoli costôs, vualtris cemût sêso?
Il probleme dal gasoli al è ma nol è l’unic. Al è il caric intune situazion bielzà penze. Par chei che si ocupin di pescjât si zonte al fat che no rivin plui a fâ la cjame di pes avonde buine di jessi economichementri vantagjose. Simpri di plui si viodin barcjis che a stan fermis leadis.
Par vie?
Par vie de Cravuazie: une volte lôr no vevin une flote di nâfs pe pescje in mâr e duncje il pes al faseve il zîr par là come se al passàs intune oasi naturâl, al rivave dut chi di nô. Di cuant che al è lât jù il comunisim, nô i vin vendût lis vecjis barcjis, lôr lis àn metudis a puest e cumò si subìs chê concorince. Zontìn l’incuinament e altris fatôrs ambientâi: il fat al è che no ‘nd è plui pes.
E ce soluzions si podaressie vê?
La uniche soluzion che o viôt praticabile e je la ferme de pescje par cualchi an.
Par voaltris “fasolârs” il probleme al è dome chel dal gasoli, alore…
Nô no vin scjarsitât di prodot: o vin bancs selezionâts li che o lin a pescjâ, e ancje chei metûts a polse. Il probleme dal gasoli di zonte però a un probleme di vendite dal prodot: o cjapìn masse pôc par chel che o fornìn e no rivìn a puartâ fûr un vuadagn adeguât. Al è il problem de cussì clamade filiere: masse passaçs par rivâ al consumadôr e il produtôr nol cjape avonde.
Rispiet al Friûl lui ce si sintial tant che apartignince?
O disarès che no si sintìn furlans, o fevelin un altri lengaç. Jo no capìs cuissà ce di furlan: o sai ce tant miôr il todesc. Furlans a son chei di là a Maran, che a fevelin in maniere divierse.
Redazion
________________________________________________
Il puart di Grau
Chel di Grau al è un “puart canâl” par barcjis cu la pescje basse. A son 6 bancjinis destinadis a la pescje, pe conservazion dal pescjât a son presint 4 implants di produzion di glace, 2 conzeladôrs, 2 frigos e 2 glaceris. A son presints distributôrs par riforniment di gasoli.
LIS BARCJIS_ La marinerie di Grau e je formade di 21 barcjis di pes di 10 e 20 toneladis. Altris 23 barcjis tra 6-10 toneladis, a son impegnadis te pescje piçule. Il puart al ospite ancje 29 barcjis che a pescjin moluscs cu la draghe “turbo soffiante”, i armadôrs di chestis unitâts di pescje a son dâts dongje intun consorzi di gjestion che al cjape dentri dut il compartiment di Monfalcon. Lis cualitâts di pes plui pescjadis a son: passaris, fasolârs, capis santis, canestrei, vongulis, sfueis e calamârs.
CURIOSITÂTS_ A Grau e je la sede dal Istitût statâl pes ativitâts marinis “Leonardo da Vinci”. La prime domenie di Lui si ten la procession religjose “El Perdon de Barbana”. Si ricuarde l’avôt che al cole ogni an dal 1237 cunt che une pestilence teribile e cjapà la citadine. Di in chê volte i citadins si impegnarin a visitâ in pelegrinaç il santuari di Barbane che e je la piçule isule li dongje dentri de lagune. Ogni an si fâs la procession di barcjis fint al santuari li che si fâs messe e po dopo si fâs fiest.
IL MARCJÂT DAL PES DI GRAU_ Costruît dal 1975, al è fat di detaiants, grossiscj, ristoradôrs, ambulants e pescjeriis. Il presit dal prodot al è fissât midiant di une aste a vôs a orele. L’ 80% dal pescjât produsût dal puart al ven metût sul marcjât, il 20% al ven invezit mandât viers altris marcjâts o trasformât.
________________________________________________
Marin, il poete di Grau
No si pues fevelâ di Grau cence memoreâ
il so grant poete (Grau, 1891- Grau 1985).
O publichìn une sô poesie, piçul omaç
ae sô citadine tal dialet gradesan.
PAESE MIO
Paese mio,
picolo nío e covo de corcali,
pusào lisiero sora un dosso biondo,
per tu de canti ne faravo un mondo
e mai no finiravo de cantâli.
Per tu ‘sti canti a siò che i te ‘ncorona
comò un svolo de nuòli matutini
e un solo su la fossa de gno nona
duta coverta d’alti rosmarini.
gjavât fûr da Cansone picole, 1927
