SPECIÂL – Marketing: dâ lûs al propri lavôr

Aromai dutis lis aziendis a àn un responsabil di marketing. Une mode? No: un lavôr di atenzion a valorizâ il propri prodot. Massime lis aziendis viniculis, ancje se a gjestion familiâr, si son impegnadis tai ultins agns par fâ cognossi i lôr prodots.Un esempli di cemût che si pues fâ, nus rive de Cantine Pitars di Sant Martin al Tiliment (PN) traviers des peraulis di Nicola Pittaro, un dai proprietaris de Aziende.
Cemût isal rivât il marketing inte vuestre aziende e ce aial cambiât?
Il marketing inte nestre aziende al è cressût cun calme, cence improvisazions, partint cence grancj budgets o strategjiis, ma lant daûr simpri ae nestre filosofie e aes nestris sieltis. Il marcjât dal vin e lis abitudins de int a son cambiadis. Intai ultins agns si bêf di mancul ma plui di cualitât, diferenziant tra denominazions e tipologjiis. Un dai risis che si puedin cori al è chel di fidâsi dal marcjât a svuarbon, fidantsi de domande dai grossiscj leâts ae mode dal moment e ae concorince sui presits. Sul lunc periodi e je le standardizazion dal gust e des tipologjiis dai vins che nus preocupe di plui.
Cuai aspiets positîfs vêso notât?
Le nestre je une aziende familiâr, leade ae coltivazion des sôs vignis e al control de filiere interie (de vigne ae butilie). Le nestre filosofie e je semplice: produsi vins di cualitât mantignint presits juscj, cence speculazions leadis ae publicitât, e tignint une direzion precise: protezi la biodiversitât e la tipicitât dal nestri teritori, rispietant l’ambient. Il premi di chest lavôr al rive a ogni vendeme. Il marketing al ven di conseguence. In aziende, jo o ai di fâ in mût che i clients a cognossin lis nestris sieltis e che a puedin preseâ la cualitât dai nestri prodots. Ogni dì o soi impegnât a mostrâ dut il nestri lavôr, de vigne ae butilie. La plui grande sodisfazion e je ricevi i compliments dai furlans pal mont che a àn cjatât une des nestris butilis intune enoteche dal lôr pais. Mi ven tal cjâf une ristoradore a San Antonio (Texas), cjapade de comozion par vie che al jere tant timp che no fevelave furlan cun cualchidun.
Fasi cognossi dome in Italie o ancje tal forest: ce isal miôr?
Une volte al jere facil stâ dome in Italie, cumò il marcjât dal vin al è internazionâl, cun gnûfs paîs che a vuelin cognossi la produzion regjonâl e nazionâl. I marcjâts internazionâi a son dal sigûr interessants ma no si à di dismenteâ i talians che no cognossin la regjon e lis sôs maraveis, e ancje il vicin che al presee par prin lis carateristichis dai vins furlans.
Esistie une cualitât ancje tal marketing?
Aromai cuasi dutis lis aziendis viniculis a àn une persone che si interesse di chest. Lis aziendis a son tantis e la competizion alte. Ancje intal marketing, come inte cantine, e je fondamentâl la cualitât. No si pues lassâ nuie al câs e si à di jessi impecabii se si vûl che la cualitât globâl dai nestris prodots e sedi preseade in plen dai consumadôrs. Un discors al va fat ancje su lis vuidis.  Noaltris o sin simpri a disposizion e interessâts a ricevi preseaments o critichis costrutivis. Ma dut al à di jessi fat cun serietât e trasparence, par evitâ che aziendis pôc seriis a sedin presentadis benon al public, parcè che alore la funzion de vuide e je pierdude.
Mara Piccoli