SPECIÂL. Tellini e la identitât furlane

Cuant che si à iniment la figure di Achille Tellini par chei – no tancj – che lu cognossin al è avonde sempliç insuazâ la sô figure tal contest de ete là che al à vivût, preseâ la sô ativitât di naturalist (soredut, ma no dome, gjeolic), amirâ la grande capacitât di lavôr tal cjapâ sù documents che si riferissin aes tradizions popolârs, fintremai no dâsi tant di maravee pe sô ferbinte azion par promovi la lenghe internazionâl ausiliarie esperanto. Ducj cjamps dal savê o de pratiche culturâl  plui o mancul “comprensibii” tal panorame inteletuâl a cjaval dal XIX e dal XX secul: il ritrat di un inteletuâl, che al va daûr de scuele di pinsîr positiviste, cuntun grant interès par un mont pacjific e inviât su la strade dal progrès.
MATETÂT O PROFEZIE?_ Chel che a plui di cualchidun, ancje te ete li che al à vivût, i è someât invezit une matetât  al è stât il so pinsîr di une diviersitât radicâl, di ordin nazionâl, tra Friûl e Italie, che al à cjapât la strade di un “panladinisim” no dome linguistic e culturâl, ma politic: la idee duncje di une “Patrie Ladine” che e cjapàs dentri lis trê sezions ladinis dai Grisons, de Ladinie centrâl e dal Friûl.
Idee cence sucès e cence fîs, almancul in linie drete, e nol podeve che jessi cussì stant la ete di fier e di fûc li che e je stade semenade e l’isolament di Tellini dal mont politic e culturâl (e dal Friûl ancje fisic, considerant che al viveve a Bologne).
Ma fevelâ di matetât al pare vie dal biel principi parfin la idee che la teorie teliniane e fos invezit la rispueste razionâl di un inteletuâl rigorôs, ancje se astrat des fuarcis sociâls e politichis e cuntune formazion par cierts aspiets di une ete passade, a di une grande domande che e vignive di une grande tragjedie, la prime vuere mondiâl: – “Cuâl isal il puest dal Friûl in chest panorame fiscât, cuntune umanitât scunide, e confusionade sul avignî?”
Par cetancj la rispueste e jere, e e je: “In Italie, jessint il Friûl in dut e par dut Italie”, anzit la sô “fedele sentinella ai confini orientali”, “l’antemurale della civiltà latina”. Altris a jerin pal plui interessâts a movisi sul plan dai interès di classe: par chescj Italie, Friûl, Austrie e vie indenant  cu la cuestion leade des nazions o nazionalitâts, a rapresentavin nons, conflits no reâi che no vevin di interessâ lis classis popolârs, che invezit a vevin di indreçâsi dome che ae rivoluzion (ancje se une teorie mancul licuidatorie dal fat nazionâl e esist, di divignince leniniane, e no mancjin vôs tal moviment operari ancje furlan che a àn une sensibilitât diferente).
LA DIVIERSITÂT FURLANE_ Ma e esisteve ancje, par cui che nol rivave a dismenteâsi des carateristichis distintivis dal Friûl, une posizion ideologjiche di part de borghesie furlane che e cirive di salvâ il lat e la cite ven a stâi il nazionalisim talian e la considerazion pe diviersitât furlane. La identitât furlane e sarès cussì, pai sostenidôrs di cheste teorie, il spieli de funzion storiche a pro de Italie dal Friûl; une funzion che e je difensive tai moments bruts, ofensive tai moments di espansion come che al è chel dopo de prime vuere mondiâl. I furlans in sostance, cu la lôr culture e la lôr lenghe, a saressin chel che a son, e a varessin di vê une grande braure, par vie che a son i plui savints difensôrs de talianitât (daûr de ecuazion “imperi roman=latinitât=talianitât”) e i plui bulos tal snazionalizâ todescs e slovens. Duncje une funzion militâr o li dongje.
Cheste ideologjie che o podìn clamâle “de grande e de piçule patrie” e à une lungje storie , cun inteletuâi di valôr, pal plui une vore conservadôrs e sôs istituzions: si podarès dî cuntune cierte sigurece che la Filologjiche tal 1919 e ven fondade in buine part su chestis coordenadis ideâls.
UNE NAZION IN NUCE_ Tellini al cjape in considerazion chescj mûts di viodi il Friûl e nol reste convint. No lu convinç soredut la idee di un patriotisim secondari e derivât e la funzion militâr che a ‘ndi diven.  Al scrîf:  “Un popul al forme une nazion cuant che al abite un teritori limitât, al à comuns tradizions, costumancis, storie, leçs, lenghe, leterature, al à analogo sentiment morâl e gust artistic, al è solidâl tai dolôrs e tai gaudios e al tint a un scopo istès” e par lui chestis carateristichis, platadis de situazion dal moment, che e je il risultât di injustiziis storichis, a son lis carateristichis de nazion ladine; e “al è sucedût te ultime vuere di sterminio che ladins a combatessin cuintri ladins” par causis che nissune di lôr e jere la sô. Ma alore, propite par slontanâ il pericul di une gnove vuere mortifare, la presince, framieç di stâts agressîfs, di une tiere biele, plene di risorsis naturâls e turistichis, cuntune sô identitât nazionâl diferente, e pues fâ in maniere che “la Europe (se noaltris o savarìn cultivâ oportunamentri la idee) e cjati convenient creâ une Ladinie neutrâl”, une sorte di “prolungjament de Svizare (che e à vût une funzion cussì benefiche, come un oasi di pâs e di caritât fraterne in mieç da la Europe in flamis)”.
Daûr di cheste impostazion si sint il revoc di riflessions che dentri dal mont gjermanic, soredut austriac, a ricognossevin, ancje in maniere politichementri orientade, la esistence di une nazionalitât ladine, e al è ancje clâr il riferiment ae Svuizare, tiere democratiche, libare e neutrâl che e viodeve cressi il sintiment dai Romançs di no volê considerâsi ni Talians ni Todescs.
Ma la diference, e no di pôc, e je che Tellini al è dal dut lontan di ogni simpatie austrofile (dal rest l’imperi asburgjic al è lât in fas) e che al viôt la rispueste aes sôs domandis intune dimension panladine e intune prospetive che e viôt la “Ladinie neutrâl” tant che sogjet di dirit internazionâl.
LA CUESTION LADINE_ Al è tal Istât dal ‘14 che Tellini al visite il Cumieli, Cortine, Fodom e il Cjadovri e in chê volte al tache il so “interessament ardent a la cuestion ladine e romance” ma si pues dî che la formulazion plene dal so program politic si à tor dal 1921 cul nassi de riviste “Patrje Ladine”. Al è ancje l’an de scomuniche de Filologjiche che tal congrès di S.Denêl e fâs tiere brusade ator di lui, che pûr al jere stât un dai siei fondadôrs; dal rest come che al marche Chiurlo, un dai plui ecuilibrâts sorestants de Filologjiche: “la posizion di Tellini e da cuintri in maniere direte ae nestre”.
Di chel an e fin ae strente dal Fassisim si svilupe la ativitât teliniane, impressionante considerant l’isolament e lis fuarcis di un om cuasi bessôl: in plui dal gjornâl, contats cun sociis e inteletuâi  sedi dai Grisons, che de Ladinie centrâl; partecipazion a incuintris di Grisonês che a jerin a stâ a Firenze; publicazions di documents e  apei;  organizazion di  caravanis pai zovins furlans par visitâ lis valadis ladinis;  ideazion di une bandiere panladine; traduzion e publicazion di poesiis e materiâl lessicografic ladin. Fintremai la redazion di trê librets scolastics, che po a vignaran blocâts za pronts pe stampe, titulâts “La Ladinia” là che si devin esemplis di tescj e traduzions intes varietâts ladinis centrâls : Val di Non, Gardene, Fasse, Badie, Fodom, Cortine e Cumieli.
Une ereditât lontane di cheste ativitât, daspò de ditature, de vuere e de muart dal nestri, e restarà tai agns cui incuintris periodics interladins, pûr cence vê la radicalitât di impostazion di Tellini. La radicalitât e la schene drete di un om che te ultime publicazion, une gramatiche di esperanto pai ladins furlans, dal 1935, tal biel mieç de retoriche talianone e imperiâl de ditature fassiste al scrîf: “In ultin no si esortaran mai avonde lis piçulis nazionalitâts [! N.d.r.] come la ladine e a plui fuarte rason la furlane, a studiâ e a meti in pratiche la lenghe ausiliâr”.
Donato Toffoli