SPECIÂL – Une art popolâr

Spetacui di musiche e recitis a son presints in Friûl di plui secui, ma par viodi a nassi une leterature teatrâl in lenghe furlane si à di rivâ al 1800. Une ete tarde pal teatri, tignint cont che la lenghe furlane e nas cuasi mil agns prin e che i prins scrits lirics a son dai secui XIV-XV.
Il spetacul te Ete
di Mieç
In dute Europe, e ancje in Friûl, za tal secul X d. di C. si rapresentin dramis liturgjics: ispirâts ai Vanzelis, a levin in sene intant des fiestis cristianis plui impuartantis, massime tal timp di Pasche.  Di dentri des glesiis, il drame liturgjic al passe fûr, tal sagrât, tes placis, e dal moment che la int no fevelave par latin, lenghe de glesie e de culture, si tacà a meti dentri lis primis peraulis des fevelis locâls, inviant chel che al deventarà il teatri tes lenghis plui diferentis. A son tantis lis testemoneancis che a integnin il drame liturgjic in Europe e fra i tescj plui vieris e complets a son tocs aquileiês dal secul XIV, tant che la Anunciazion, la Resurezion e il plui famôs Planctus Mariae, conservât intun codiç cividin, e che si pense che al sedi stât scrit un secul prin.
In cheste ete, tai Cuaders dai Cjamarârs di Glemone, si cjate ancje la rapresentazion sacre intitulade Lu zug de l’agnul: ma di jê nus reste dome il titul par furlan.
Il timp de Comedie de Art
Tal 1400 la rapresentazion tal viert e devente spetacul risiervât aes fiestis tai palaçs e tes corts. In Italie lis manifestazions plui vivarosis si fasevin tes corts di Ferare, Mantue, Milan, Florence e Vignesie. Cul lâ dal timp, i comedeants a lassin la ativitât di cort par esibîsi fûr e meti sù lis primis compagniis di teatri e la lenghe e devente simpri plui locâl e regjonâl. Che si sepi, une des primis compagniis di Comedie de art e nas a Padue sù par jù a metât dal 1500 e par padoan al recitave il Ruzzante. Ma il Friûl nol à vivude cheste evoluzion. Tal 1420 al cole il Stât patriarcjâl furlan: Udin e buine part des comunitâts furlanis a passin sot dal domini de Republiche di Vignesie. Dome tal 1601, dentri de Loze dal Lionel, si ve la concession pal ûs teatrâl di une sale, là che si presentà Irene, spetacul par talian dal autôr udinês Vincenzo Giusti. Al è probabil che chest al sedi stât il prin spetacul fat a Udin intun spazi risiervât al teatri.
Lis lotis par dividi il Friûl tra Vignesie e Austrie, la mancjance di spazis e la pocje presince di spetacui de Comedie de art a blocarin la creazion di une scuele e di une tradizion teatrâl furlane. Tra i secui XVI e XVIII cualchi leterât si butà a scrivi teatri, ma di lôr nus restin dome i nons o i titui di cualchi comedie, scrite par talian e, salacor, nancje rapresentade.
La nassite de comedie
in lenghe furlane
Il secul XIX al pues sei tignût tant che il prin periodi di une scriture teatrâl in lenghe furlane. Pietro Zorutti al fo il poete e autôr plui rapresentatîf dal secul; al fo il prin a scrivi un test par furlan. Tal 1847 al publicà Il trovatore Antonio Tamburo, une comedie alegoriche cun parts musicâls: une novitât pe dramaturgjie furlane. Tal Friûl dal Votcent a son tancj i poetis e cualchidun, lant daûr di Zorutti, al prove a scrivi pal teatri. O podìn ricuardâ Pacifico Valussi, Francesco Leitenburg, Giuseppe Edgardo Lazzerini, Francesco Nascimbeni e Caterina Percoto. Cun chescj autôrs, al nas il teatri furlan. Finide la prime vuere mondiâl, tal 1919, e nas a Gurize la Societât Filologjiche Furlane che e je atente ancje al teatri, parcè che lu ten tant che un imprest di svilup e di difusion de lenghe: e inmanie concors par tescj teatrâi e e jude i grups teatrâi amatoriâi a nassi in tancj paîs.
Tra i autôrs, o podìn ricuardâ Bruno Pellarini, Giuseppe Marioni, Ercole Carletti, Arturo Feruglio, Maria Gioitti del Monaco, Pietro Someda de Marco, Anna Fabris, Costantino Smaniotto e Lea D’Orlandi. A jerin comediis lizeris e di costum, ambientadis tal mont contadin dal Votcent, cun dialics legris e sempliçs, centradis sui confronts tra gjenerazions. I autôrs dal prin Nûfcent si fasevin condizionâ de semplicitât de vite che a vevin tor ator, no cirivin une creativitât leterarie lôr ma si limitavin a meti jù tramis facilis, buinis di rispietâ il costum e coretis dal pont di viste sociâl.
Par difindi chescj autôrs dal prin Nûfcent si à di dî che no vevin une tradizion leterarie di riferiment: i inteletuâi a calcolavin il teatri une forme artistiche minôr, e che la lenghe furlane no fos in stât di pandi concets alts ma che e fos buine dome par un ûs folcloric e disimpegnât.
Il teatri gnûf al tache
cui agns Cincuante
Il test plui armonic e inmagant de leterature teatrâl furlane al nas sul finî de seconde vuere mondiâl: I Turcs tal Friùl. Lu scrîf Pier Paolo Pasolini. Il drame al è il so unic test teatrâl par furlan, scrit tal 1944 e publicât dome tal 1976 di Luigi Ciceri. Al conte la storie di un paîs intant de invasion dai Turcs dal 1499 e al dopre il fat par traspuartâ il so paîs ai timps de seconde vuere mondiâl, diventant metafore de ocupazion naziste. Però la presince di Pasolini in Friûl e à condizionât la poesie ma no la scriture teatrâl par furlan, tant che e à lassât i Turcs come une opare isolade. Si à di rivâ a autôrs gnûfs tant che Renato Appi, Alviero Negro e Aurelio Cantoni, l’ultin plui cognossût tant che Lelo Cjanton, che a rompin la tradizion e a bandonin lis tramis popolârs e contadinis.
De fin dal Nûfcent
in dì di vuê
I agns Otante e Novante a marchin une cressite grande de ativitât teatrâl furlane e a son ancje scritôrs cun buinis capacitâts leterariis tant che Gianni Gregoricchio, Giovanni Morsan, Alberto Luchini. Roberto Ongaro o Luciano Rocco a scrivin tescj comics o satirics. Di ispirazion religjose a son i dramis di pre Pietro Biasatti e doi autôrs che si ispirin ai classics e ai fats storics a son Paolo Sartori e Carlo Tolazzi. Traduzions par furlan di scritôrs talians o forescj tant che Goldoni, Pirandello, Molière, Feydeau, Ionesco, Cechov e altris, a completin la ufierte teatrâl a cjaval tra il mileni vieri e chel gnûf.
I agns Otante a viodin a nassi compagniis di professioniscj. La prime e je il Teatro Incerto cun Claudio Moretti, Fabiano Fantini e Elvio Scruzzi. Tal 1988 a Udin si met adun la Civica accademia d’arte drammatica «Nico Pepe», nassude su la fonde di chê che e jere la Civica scuola di recitazione, inmaneade dal atôr Pepe. La Academie e organize cors di recitazion e di leterature furlane, dant cussì struments di cognossince gnûfs a chei che a deventaran i operadôrs dal setôr. Dopo dal diplome ae «Pepe», cualchi atôr tal 1996 al met adun la Academia de Gli Sventati, grup che al fâs pal plui teatri di mascare e comedie de art. Chescj atôrs a son Giuliano Bonanni, Nicoletta Oscuro, Luca Quaia e Massimo Somaglino.
Un ricognossiment a part i va a Elio Bartolini, scritôr e senegjatôr di innomine taliane che tal 2000, adun cun Paolo Patui, al scrîf Bigatis, opare teatrâl preseade su la condizion des feminis in Friûl sul principi dal Nûfcent, impegnadis tai lavôrs de filande.
Struc par cure de redazion, gjavât fûr dal libri «Friulano lingua viva. La comunità linguistica friulana» (Ed. Forum) realizât de Provincie di Udin