Interviste a Leonardo de Biase, president de Libertas, impegnade tes Finâls di Cope Italie
Un progjet dut al feminin, un pinsîr di valorizazion dai tancj inzens furlans colôr di rose, un slanç di no crodi pal so lavôr e pe capacitât di vignî sù, ogni an che al passe, fintremai a deventâ un sodalizi che al sedi un pont di riferiment par dute le bale tal zei in Friûl-Vignesie Julie. Dant une cimiade ai grancj events di fâ rivâ a Udin e intai contors.
Il protagonist di dut al è Leonardo de Biase.
Al è president de Libertas Basket School di Udin, societât di bale tal zei feminine, che e à la scuadre principâl tai prins puescj de graduatorie de serie A2. Intai ultins timps, lis Bolps, come che a clamin lis zuiadoris de Basket School, a àn ancje cjapât il dirit di zuiâ lis Finâls di Cope Italie, previodudis a Udin, intal mês di Març.
Par altri, i biei risultâts rivâts di vuê a doman no son l’obietîf principâl dal Paron furlan, che al à a cûr prin di dut i mioraments des zuiadoris.
La volontât e je che di formâ lis plui zovinis, pôc par volte, par che a deventin lis fondis de scuadre dal futûr, par lâ a cirî la promozion in serie A1. Une eventualitât che e fasarès tornâ a vivi ae bale tal zei feminine furlane il sflandôr de fin dai agns Cincuante e dal principi dai agns Sessante, cuant che la Associazion Pallacanestro Udinese e cjapà trê Scudets un daûr chel altri.
_ Leonardo de Biase, parcè propit la bale tal zei feminine? “O ai doi fîs: Stiefin, che al à scomençât a zuiâ di bale tal zei cuant che al jere piçul, e Sara, che e à doi agns di mancul e che e je lade daûr di sô fradi. Di zovin, jo o zuiavi di bale a svol a nivel nazionâl, e pûr o ai lassât ai miei fîs la pussibilitât di sielzi la ativitât sportive che a vevin miôr. Sara e la sô amie Patrizia De Gianni (che dopo e je deventade zuiadore ancje de Nazionâl U18, ndr), intant des partidis di Stiefin, e zuiavin cu la bale: di chel moment, dut al è rivât di consecuence. O ai tacât cul fâ fotografiis aes partidis dai miei fruts, daspò o ai capît che al coventave un jutori pe societât. Prime tant che sponsor e daspò tant che dirigjent, fin a deventâ ce che o soi cumò. O soi cetant braurôs di jessi rivât fin achì, stant che nol è sempliç jentrâ come invezit te la bale tal zei masculine, indulà che e je plui atenzion e a son numars plui grancj. Dal 1999 a vuê, o ai mateât par tirâ sù e par insaldâ une paritât reâl di gjenar, ancje parcè che la scuadre feminine e fâs dut câs fature compagne di chê masculine. O ai cirût di jessi un bastion di difese dai valôrs dal sport feminin inte bale tal zei. No sai se il gno risultât al è positîf, ma dal sigûr o soi daûr a cirî di cumbinâ cun dut il cûr”. _
Isal un moment determinant par definî une aventure che e dure za di vincj agns?
“Miôr che di un moment, o fevelarès di une stice personâl. A jessi franc, inte bale tal zei furlane, o ai cetantis voltis cjatât personis, impuartantis e cualificadis, ma dut câs duris di çucje. Mi àn simpri dite che la bale tal zei feminine no je pardabon un sport. No tu sâs in trops che mi àn domandât parcè che o buti vie risorsis cussì. Otusitât e ignorance: elements che mi àn sustât a difindi la bale tal zei feminine. Un pôc ae volte o stin rivant ae paritât di gjenar e lis feminis a cjapin funzions cetant impuartantis: forsit si varà di spietâ agns, ma o ai la sensazion che il futûr al sarà plui feminin che masculin. O soi content di vignî vieli parcè che cussì, di president de Basket School, o rivarai a dâ il gno testemoni a une femine”.
_ Dilà dal stimul iniziâl, i tiei fîs trop impuartants sono stâts in chest percors? “Stiefin al zuiave intune scuadre cetant fuarte, cun compagns tant che Michele Antonutti e Michele Ferrari, e nol veve lis cualitâts di fisic e tecniche che, invezit, e veve Sara. Mê fie e jere nassude par fâ sport e e podeve rivâ a fa ben in dutis lis dissiplinis. Cun acutece, Stiefin al à decidût di deventâ un arbitri e vuê al sivile in serie A1 feminine e in serie A2 masculine. Di bande sô, Sara e à continuât a zuiâ e, cul menâ ator jê e lis sô compagnis cu la mê machine a siet puescj, mi soi cjatât dentri intune esperience une vore formative e o ai vivût il mont feminin. O ai fat il fal che tancj gjenitôrs a fasin: pretindi simpri masse di mê fie, cul risultât di indusi un disinamorament dal sport che e preferìs. Il mont feminin al è svariât, a pet di chel masculin, massime inte psicologjie, e dut al ven viodût in maniere diferente. O ai pensât che al fos indispensabil rivâ a fâ alc di plui pes frutis che no rivavin a pandi lis lôr capacitâts sportivis in relazion ae fature che a fasevin”. _
La scuadre principâl de Basket School e je in serie A2 dal 2015, e in curt o vês di zuiâ lis finâls di Cope Italie che o sês daûr a organizâ a Udin. Obietîfs?
“O vin voie che la bale tal zei feminine furlane e sedi parone di une scuadre che e fasi pardabon bale tal zei. O vin colaborât, intai agns passâts, cun cetantis realtâts che a àn organizât manifestazions, ancje internazionâls, sedi masculinis che femininis. O ai simpri domandât che la identitât feminine e fos rimarcade: nol è mai sucedût, parcè che ogni event al jere dome di chei, dut câs straordenaris, che lu organizavin. O ai decidût di fâ alc di bessôl, salacor falant, ma cu la pussibilitât di imparâ, come un brâf furlan, a meti adun ben dutis lis robis. Intal 2021, in plene pandemie, o vin puartât a Udin la uniche manifestazion di bale tal zei feminine pai zovins, la Cope Italie par Under 18, cun dodis scuadris, e e je vignude fûr cetant ben. O vin fate une esperience impuartante e, chest an, o vin domandât e o vin vuadagnât cence masse fature la organizazion des Finâls di Cope Italie di serie A2. A Udin a rivaran lis vot miôr formazions talianis, comprendude la Basket School Delser”.
_ In scuadre o vês ancje frutis forestis e no dome furlanis. Ce impuartance aie la internazionalitât des zuiadoris intal vuestri progjet? “E je une sfide complicade, sedi dal pont di viste economic, sedi di timp e di impegn di metii parsore. A rivin a Udin frutis che no san une peraule di talian, figurìnsi di furlan. Dut câs si à di cjatâ fûr un mût di rivâ a gjestî dut. Sot dal aspiet sportîf, a dan la oportunitât di fâ zuiâ atletis che a àn prospetivis miôr, in confront aes frutis che si cjatin sul nestri teritori. Di chê altre bande, il cont economic nol va mai in paritât. Intai ultins timps o vin mudât il nestri orientament, cjalant massime al nestri teritori”. _
Cjalant plui lontan, rivâ in serie A1 podaraial jessi un obietîf di smirâi?
“A nivel di zovins, la nestre realtât e à cualchi atlete interessante. Anna Turel e je lade fûr de U20, Valentina Braida e Eva Lizzi, dutis dôs nassudis intal 2003, lis 2004 Vittoria Blasigh e Gaia Codolo e la 2005 Giulia Agostini a son dutis atletis metudis dentri intes listis di élite de Federazion Internazionâl de bale tal zei. Intai ultins timps, ancje la 2005 Matilde Casella e à tacât a vê atenzions gjenerâls. Di Foian, inte Bisiacarie, e je rivade la 2005 Sofia Ceppellotti, che e je daûr a alenâsi une vore ben. Su la fonde dal statût de Societât, o scugnìn zuiâ massime cu lis zovinis di sburtâ in prime scuadre. O vin il desideri di rivâ in A1, dentri di un pâr di agns. Par rivâ, o vin di insaldâ la Societât. In plui, o vin l’intindiment di fâ vivi al teritori furlan moments che a dedin ocasions di cressite al moviment de bale tal zei feminine. Ducj obietîfs di grande ambizion, che a àn un sens ancje se tu ju cjapis un par un”. ❚
::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::
Une storie che e ven di lontan
La bale tal zei feminine a Udin e in Friûl e à une tradizion che e rimonte almancul ae prime metât dal secul passât. Sui libris di storie sportive, lis primis gnovis si cjatin intai agns Trente, cuant che si zuià il prin campionât zonâl cu lis scuadris di Udin, Triest, Gurize, Pola e Flum di Istrie. Chel campionât al è stât vinçût di Udin.
◆ Cu la denominazion di Grup Universitari Fassist, une scuadre de citât di Udin si è rimpinade fin in serie A intai agns Cuarante. Dopo de seconde vuere mondiâl, e je vignude fûr la Associazion Pallacanestro Udinese che e à vinçût trê titui talians dal 1958 al 1961: il miôr moment in dute la storie de bale tal zei locâl.
◆ Daspò alts e bas, intai agns Otante, la scuadre di Codroip e je rivade fin in serie A2, par tornâ indaûr intai campionâts regjonâi intai agns Novante, intiziant un biel antagonisim massime cun Pasian di Prât.
◆ Sul tacâ dal Doi mil, il Sporting Club Udin al à puartât la citât in serie A2 une altre volte, e il moment plui impuartant al è rivât intal 2009 cuant che, tal palasport Benedetti, lis frutis furlanis a àn cjapât il titul talian under 18, propit cun Sara de Biase e Patrizia De Gianni in formazion.
◆ Distudade la lûs ancje sul Sporting Club, il Basket School di Leonardo de Biase al à cjapât il testemoni de bale tal zei feminine a Udin e al cîr cumò di lâ sù in Serie A cu lis zovinis furlanis, come ai biei timps. ❚
