STORIE DI CUVIERTINE – CUINTRISTORIE DAL NÛFCENT 1900-1910

CAPITÂL DE MODERNITÂT
Al scomence pardabon cul bot il prin deceni furlan dal ‘900: di fat, ai 27 di Avost dal 1903 si scree a Udin la grande fiere campionarie, la Esposizion Regjonâl, calcolade tant che l’avigniment economic, culturâl e mondan plui impuartant dal an di bande di dutis lis cronichis no dome dal Ream di Italie, ma di Europe. Il nastri de scree al è stât taiât in presince des maestâts graciosis” Vitori Emanuêl III di Savoie e la regjine Eline, che in chei stes dîs si cjatavin intal Padoan par une rassegne aes trupis dal III e IV Cuarp di armade impegnadis intes grandis manovris militârs. Al pâr che i sovrans – e in mût particolâr la regjine – si fossin declarâts un grum curiôs de rassegne, batint par abandonâ i gjenerâi ai lôr zûcs di vuere, ben plui atrats dai bancuts udinês che a esponevin il miôr di ce che a podevin ufrî chê volte la agriculture, la industrie, l’artesanât, il cumierç e la culture di dute la nazion. La capitâl furlane e jere deventade par cualchi dì il centri di dibatiments animâts, di spetacui, di dimostrazions publichis su chel che sience, tecnologjie e inovazion a prometevin al gjenar uman. Fotografiis de citât a cimiavin su lis pagjinis des rivistis parisinis, londinesis e vienesis.
UDIN CITÂT DE LÛS_ No je stade ciert casuâl la sielte di Udin par ospitâ tant vivôr. Di fat, di agns la capitâl furlane e jere daûr a dâ prove di une vocazion straordenarie ae modernitât. A jerin stâts fats adiriture tal 1880 i prins esperiments di iluminazion eletriche di place Vitori Emanuêl II (cumò place Libertât) par opare de Edison Taliane e de Siemens. Un Artûr Malignani une vore zovin, che nol veve nancje vincj agns, al restà tant inmagât che intal zîr di pôcs agns dai siei laboratoris udinês al varès fat saltâ fûr i progjets che a àn fat di Udin la tierce citât in Europe a vê la iluminazion eletriche. Curt il pas viers sperimentazions che a àn il savôr di un romanç di Juli Verne: la invenzion e la realizazion di machinis eletrichis a cuatri ruedis, dotadis di dinamo a pilis ricjariabilis cuntune autonomie di 60 km e buinis di tocjâ i 16 Km/h: il model al è stât espuartât in numars limitâts a Berlin, e doprât li tant che taxi fin al sclopâ de Grande Vuere; la edificazion de dighe di Crosis sul torint Tor, screade propit intal 1900, progjetade e ancje volude a fuart dal stes Malignani, che e à furnît a Udin la eletricitât necessarie no dome par iluminâ viis e cjasis ma ancje par consintî a Luîs Roatto, amì personâl dai fradis Lumière, di vierzi in vie Belloni l’Edison, un fra i prins cines stabii in Italie; chê stesse energjie e à dât impuls al prin tram eletric de citât, che al à scomençât a sdrondenâ tacant dai 14 di Zenâr dal 1908.

IL LEDRÔS DE MEDAIE_ Ma a restin tal Friûl de epoche stradis, viis e cjasis là che dute chê lûs no rive. No son lampadinis inte cusine in tiere batude de famee ritrate intun clic dal 1900 ator di une taule cuasi vueide, cun masse fîs di dâur di mangjâ e cence un pari, pierdût pes viis dal mont a cjapâ sù cualchi carantan par no murî di fam. E somee pardabon une altre dimension, un mont paralêl che al reste impresonât inte ombre di une storie dificile di gloti. Epûr e je chê la foto plui evocative dal prin deceni dal ‘900. Parcè che cun chê o vin di convivi, confrontâsi vuê che lis intuizions eletrichis di chei agns a son deventadis monts virtuâi eletronics e cibernetics. Parcè che e sta dute chi la straordenarie alteritât de int furlane: e je simpri une cocule di miserie dignitose, un vistît fruiât, une man calose dentri la manece che e fâs sù il Friûl di vuê, une anime in tiere batude buine di convivi cu lis sfidis straordenariis che la modernitât nus impon. Vuê come chê volte, il dovê morâl di no dismenteâ chê taule desolade, anzit di riclamâ cun braùre la condivision di chê dignitât, al è il scart che nus à di fâ diviers, bogns di no pierdi mai chê anime di dignitose puaretât e di fadie che di chê o sin partîts e che nus à fat bogns di fâ siums plui grancj di nô.
Un principi di secul plen di contradizions
Blanc e neri. Lûs e ombris. Il prin deceni dal ‘900 furlan al è un impast di no crodi di inovazion e di miserie, il paradigme di une tiere che par tancj aspiets e somee proietade viers il futûr, intant che par altris e je impastade ancjemò di tiere e di fam, costrete ae migrazion in regjons dal mont ancje tant lontanis: Argjentine o Siberie che a sedin. Al è il Friûl che al cjamine a dôs velocitâts, che al met sù ancjemò dalminis di len par passâ i agârs des campagnis, epûr al viôt cori dilunc des stradis di Udin lis primis liniis eletrificadis dai trams. Al esist un denominadôr comun, une cifre che e unìs cheste anomalie di no crodi: si lei in filigrane une indurance uniche, une dignitât fuartone, une coerence di solide, pragmatiche fermece che dut câs no rinunzie mai al sium, ae idee che e sburte a cambiâ e a miorâ. Cussì la migrazion no je mai fughe, pluitost ricercje di alc che al permetarà di tornâ. Une matetât lustre e apassionade, no lontane di chê che intal stes zîr di agns e sburte a imagjinâ e a costruî un Friûl diviers, fintremai cuasi futuribil, fantasientific, bon di gjenerâ maravee no dome in Italie ma ancje in Europe: un sium imbulonât di mans che a san di concretece solide, di fadie, di passion e di veretât.  (A.F.)
Angelo Floramo