Cun Nicole Coceancig la ricostruzion di une galarie di dîs ritrats di fantatis e sioris che a àn provât a butâsi in impresis che nissun al pensave si podessin fâ
Storiis di feminis che a àn savût jessi cuintri curint. Feminis ribaltonis, resistentis, bastiancontrariis. Insome, feminis di Cjargne. O in maniere plui semplice e sclete “Cjargnelas,” come che a disaressin lôr, vignudis sù intune tiere ruspiose, tragjiche e maraveose, pensade di un diu dispetôs che le à creade dute di “rive sù”, là che fam, fadie, braùre e fuarce a van simpri indevant braçolantsi insiemi, par no colâ dulinvie. Magari cuinçadis ancje cun chê braùre dute feminine che e permet di cjalâ il Mont di buine ande, fasint dut ce che al covente, e magari cussì no parfin di plui, par resisti ancje cuant che ducj chei altris a àn decidût di scjampâ vie lontan. I oms par cirî “pan e gaban” vie pal mont, i fîs clamâts a scombati in vuere par chê “porca Itaglia” che e pretindeve di spandi il lôr sanc cence jessi nancje buine di dâ in cambi la farine par fâ la polente, come che al cjantave Giorgio Ferigo, cjargnel ancje lui. E come lui altris inteletuâi coragjôs nassûts di Damâr insù. E no pues fâ di mancul di pensâ a Leo Zanier, par dî un non, o pûr a Siro Angeli, par meti insiemi un altri. Lôr par prins a àn vût il coragjo e la onestât inteletuâl di contâle juste, crude e monde, ancje a cost di jevâ sù il polvaron e lis critichis dai benpensants, che a preferivin invezit une Cjargne mancul impegnative pe cussience, magari plui dongje aes cartulinis di Arturo Zardini, là che “lis puemis” a son simpri legris e contentis di puartâ la cosse sù pe schene, di fâ fen, di puartâ a passon lis vacjis e di intonâ dutis insiemi un “falalele” intant che a fasin la mirinde distiradis sui prâts, involuçadis tai biei costums colorâts de tradizion. Insome, plui pipinutis che no feminis fatis di cjar e di gnerfs, di sudôr e di vues. In cheste piçule galarie, us visìn, no si cjataran fufignis di chê fate li. Pe ocasion o sin lâts a sgarfâ fûr dai archivis, dispès taponâts inte panze des bibliotechis, une tipologjie cetant lontane di chê ingomeose idealizazion, avonde buine pes pagjinis di une antologjie di secont ordin o pal manifest sempliçot di un ufici turistic a “marchio FVG”. I personaçs che nus compagnaran a son duncje fats di dute une altre paste. Insome, feminis sculpidis intal cret, profumadis di bosc e ancje di tabac, chel mastiât e spudât cun rabie, che a àn savût dimostrâ par dute la lôr vite passion e cûr, sgrifis e riviel, un amôr profont pe famee e pe Comunitât, buinis di vê la sapience juste, che e pie lusôr ancje tal scûr, ancje cence vê studiât sui libris di scuele. Ma o contarìn ancje la vite e lis impresis di Cjargnelas che a vevin studiât, e tant, scrivint libris, poesiis, tratâts di economie. Maris che a àn savût cjapâ sù il racli par difindi i vecjos e i fîs dai dincj dal lôf, ancje cuant che il lôf al veve intor la divise dal prepotent di turni, che al fos stât un curiâl roman, un patrizi venezian o un gjenerâl talian. Chest an duncje e va cussì. Di mês in mês o fasarìn la cognossince di une galarie pardabon mâl cognossude di une storie che par solit no si le sa, forsit ancje parcè che la Storie uficiâl, chê promovude dentri des scuelis, le firmin i mascjos che a àn dimostrât di jessi fedêi e ubidients ae autoritât costituide. Cence tignî cont che lis feminis che o vin decidût di contâ a son lis fiis di une regjon che parfin ai voi dai Furlans, i bassarûi, come che nus clamin lôr, e je simpri someade lontane, periferiche, dure di gloti e adiriture di imagjinâ. E mighe dome intai secui passâts! Ancje cumò. O cognòs plui di cualchidun che no si è mai slungjât di là dal centri comerciâl di Vile di Cjargne, o che si contente di fermâsi li de buteghe di formadis di Denemonç. Cjargnei cence Diu, no mo? Come se cheste tiere, di miârs di agns, e fos platade di chê “alteritât” tant foreste che si varès miôr fâ di mancul di cognossile, o ancje dome di capîle. Miôr pluitost sfrutâle, o pûr sbeleâle intun umorisim di cjochetons. Cussì si le piture doprant il pinel dal sium, estetizant, o chel che al tire sù ducj i colôrs dal coionament. Cualchi setemane fa, propit sot Nadâl, cjapant la idee di une mê ricercje metude insiemi par une publicazion storiografiche, o ai domandât a Nicole Coceangig, che i letôrs de Patrie a àn vût maniere di preseâ in cetantis ocasions, di compagnâmi intun spetacul a Tumieç, inmaneât cuintri de miserie e de puaretât. Come che ognidun aromai al sa ben, Nicole e je une artiste zovine e brave che in chescj agns e à cjapat sù la ereditât dai nestris plui grancj poetis cjantautôrs, chei di proteste e di riviel, chei che cu la musiche a àn rivât ancje a stiçâ la cussience sociâl e a pandi cussience civîl. Par di plui la zovine e à decidût di lâ a stâ in Cjargne, là che ancje e insegne a scuele, e vîf, e scrîf e e compon lis sôs oparis. Insome, la persone juste. E par fâle curte, il spetacul lu vin clamât propit cussì: “Cjargnelas”. Come la rubriche di chest an. Ogni volte o varìn la ocasion di cognossi une cjargnele. Dai timps plui antîcs, a partî de Ete di Mieç fin ae stagjon dai nestris timps. Ma par rispiet o lassarìn che e sedi jê a presentâsi, a contâsi cu la sô stesse vôs. In dute la sô grandece e fuarce. Si contentarìn dome di presentâle cuntune piçule schede introdutive, butade jù in ponte di pîts, par no gjavâi nancje un moment. Juste par che si sepi cui che e je, ce che e à fat, dulà che e je nassude e parcè che al è impuartant fâ la sô cognossince. Ma la lûs dal rifletôr e sarà dute pontade sul personaç in cuistion, che intes intenzions al varès di cjapâ vite un pôc par volte, jentrant in confidence cul letôr. Une narazion pensade par jessi compagnade dal cjant, come che in efiets e je stade e o sperìn che e torni a jessi, une specie di balade antighe ma scrite ae buine, pai timps di vuê e ancje par chei che a saran. In cheste maniere a vignaran fûr dîs profîi di feminis cjargnelis. Dîs al è un numar feminin, a pensavin i antîcs. Il numar che leât ae Dee Mari. L’an lunâr al conte dîs mês. Dîs al è il timp che al siere i nûf mês de gravidance. E cussì a saran dîs i nestris ritrats. Muiniis, veduis, maris. Fiis che a àn savût ribelâsi ai paris. Testardis e plenis di amôr, resistentis, che a àn savût, tal câs, ribelâsi, butâsi in impresis che mai nissun prime al veve nancje pensât che si podessin fâ. Coerentis cu la lôr anime e par chest mai ubidientis. Mai sotanis. Feminis di ogni sorte: di pinsîr e di azion. Puaris o sioris. Contadinis, migrantis, operariis, scritoris. Partigjanis. Ancje imprenditoris, poetis. Intune peraule, “Cjargnelas”: 10 Cjargnelas. Anzit di plui: Cjargnelas 10 cun Laude! ❚
