✽✽ Nol bastave che l’Istât nus confermi che il cambiament climatic al è il teme centrâl pal nestri Friûl e par dute la umanitât, e al è preocupant il fat che la cuistion e pâr no tocjâ gran i sorestants di Triest; nol bastave nancje un guvier regjonâl che prime si augure une riforme radicâl dal sisteme sanitari regjonâl e dopo al lasse tal puest di comant chei dirigjents incapaçs e responsabii dal stes disastri che a àn creât. Lassìn, par lâ intes piçulis robis, la miserie dal gnûf logo di Friuli Doc dulà che l’impront digjitâl al prefigure za la prossime denominazion in Doc Fvg, in barbe ae identitât ancje enogastronomiche dal teritori; e sorvolìn ancje su chei sindics de mont pronts a cimentificâ ancje l’ort di cjase pûr di vê i contribûts finanziaris. Se dopo nus informin che e je rivade ae cifre di 14 milions la spese par sistemâ “Ursus”, l’imbarcjadôr mobil che o viodês sore vie su lis aghis dal puart a Triest, chel vanzum industriâl dut rusin che al creve i ancoraments a pene che e sofle buere fuarte e che al varès di deventâ une sorte di Tor Eiffel de citât juliane, o varessin di metisi lis mans intai cjavei, pensant a cetancj miedis e infermîrs che o podaressin assumi par fâ calâ lis listis di spiete.
✽✽ Une schirie di incongruencis? Propit parcè che a son tantis – e chês citadis a son dome cualchidune tra chês plui resintis – il dubi al devente ciertece sul fat che o sin daûr a movisi suntun plan che nol à nuie di positîf, no dome pal Friûl ma nancje par dute la regjon. Ciert, alc si môf: e je oposizion cuant che si notin terens agricui trasformâts in superficiis di panei solârs, intant che interiis zonis industriâls dismetudis a àn filis di capanons darots che a podaressin benon ospitâju. Par ce che al tocje la sanitât, a scomencin lis manifestazions di proteste devant dai ospedâi, la rêt e disforne coments cuotidians e marum dai pazients. Nol baste. Nol è pussibil che al passi dut sot vie, cidin, e che si stedi a cjalâ in maniere passive il degrât de nestre tiere.
✽✽ E alore no stin a pierdi timp daûr di polemichis ridiculis sul furlan doprât inte cartelonistiche stradâl a Pordenon. Cui che si opon nol merete la nestre atenzion suntune cuistion che in maniere cicliche e torne fûr par marcâ diferencis tra lis rivis dal Tiliment.
✽✽ E à reson la pordenonese Cristina Amirante di Fratelli d’Italia, assessore regjonâl aes infrastruturis – includudis duncje lis stradis cui lôr cartei – che, cuant che i àn domandade une opinion su la cuistion e à rispuindût: “E je une leç che no ai fat jo”. Tant che a domandâ scuse, e al mancjave dome che si metès a vaî.
✽✽ Che se meti vie. Il façolet par suiâ lis lagrimis jal regalìn nô. ❚