Il percors che al puarte ae gnove edizion di Suns Europe, il festival des arts intes lenghis minorizadis di Europe che al ven inmaneât de cooperative Informazione Friulana, societât editore di Radio Onde Furlane, cu la poie di diviers subiets publics e privâts locâi e internazionâls, al è stât inviât ai 21 di Fevrâr stâts.
◆ In chê che di passe vincj agns, par iniziative de Conference gjenerâl de UNESCO e ven memoreade tant che Zornade Internazionâl de Lenghe Mari, al è stât publicât il bant pal concors de sezion musicâl dal festival, che al è dedicât ai grups e ai soliscj che a son espression des comunitâts linguistichis minorizadis e che a doprin la lenghe proprie inte lôr produzion artistiche.
◆ Par fâ indenant lis candidaturis al covente compilât il modul, che al è in linie ae direzion www.sunseurope.com, dentri dai 26 di Març. La propueste di partecipazion e previôt la spedizion dal curriculum dal grup o solist in formât pdf, di almancul une foto dal grup o solist in formât jpeg cun alte risoluzion, de regjistrazion di dôs cjançons in formât mp3, dai tescj des cjançons in lenghe origjinâl e acompagnâts des traduzions par inglês in formât word e de liberatorie pal ûs dai dâts.
◆ Suns Europe al à chê di promovi lis miôr produzions contemporaniis intes lenghis minorizadis e la sezion musicâl de manifestazion si propon di dâ visibilitât aes produzions che a son stimadis tant che plui origjinâls e inovativis. La selezion e vignarà fate dentri dai 16 di Avrîl dal 2023 e a chei che a àn presentât lis lôr candidaturis ur vignarà dade comunicazion dal risultât midiant di un messaç di pueste eletroniche.
◆ La edizion di Suns Europe di chest an si davuelzarà tal mês di Otubar. ❚
Suns Europe 2023, al è in rêt il bant pe sezion musicâl
Marco Stolfo