✽✽ Se o vessin i “atribûts”, o varessin di inçopedâsi devant de basiliche di Aquilee a zigâ dut il nestri disdegn cuintri la ipotesi di fâ un parc fotovoltaic bocognon ator di chês muris.
✽✽ Se o vessin “i atribûts”, no delegaressin dome ai comitâts la difese dal Tiliment des manovris di cui che al vûl l’enesim fisc ambientâl.
✽✽ Se o vessin i “atribûts”, o daressin il benvignût berlant “çondars, çondars” i rapresentants di une zonte che e compre, a colps di milions, edificis par ospitâ gnûfs uficis de Regjon, cuant intai nestris comuns al mancje il personâl.
✽✽ Se o vessin i “atribûts”, no varessin permetût che chel che al jere tra i miôr sistemis sanitaris europeans, al vignìs ridusût aes cundizions che si cjate vuê par vie di dirigjents nomenâts par merits di partît e no di competence.
✽✽ La liste dai “se” e podarès slungjâsi in ogni setôr de vite e de robe publiche.
✽✽ Ma, se o vessin pardabon “i atribûts”, par prime robe o varessin di recitâ un “mea culpa coletîf” par no vê capît che al Friûl e ai furlans nol ur è mai stât dât nuie, se no a presit di lavôr e sacrificis.
✽✽ Al veve forsit reson cui che, dopo dal taramot, nus visave dal pericul che al derive dal flus di tancj bêçs pe ricostruzion e cemût che chest al varès podût creâ une sorte di indurmidiment des cussiencis.
✽✽ La storie de nestre tiere nus à insegnât simpri che dome devant de disgracie, dal pericul di sparizion tant che popul, o sin stâts bogns di replicâ cun fuarce, unitât di intindiments par dopo vinci lis sfidis.
✽✽ Intai decenis dopo no si sin acuarts che un altri Orcolat nol veve molât di scjassâ intes vissaris de politiche e che cumò al è pront par mostrâ la sô muse piês: chê de distruzion des cussiencis. Al à dislontanât la nestre storie, al à fat de omologazion il so credo, al gote fûr prepotence e paronance come che dome un diaul al savarès fâ. Al inmaghe i stupits cun promessis che mai al mantignarà, al ingaie sierfs in cambi di fedeltât vuarbe.
Si clame Podê, di là dal colôr dal tabâr, e vuê al pense di podê agjî cence fastidis e cence reazions.
✽✽ “Furlans sveaitsi” al diseve un vecjo volantin. E je ore di tornâ a stampâlu. ❚