TAL ETERE. Timp scjadût pe Rai

Tignît a ments une date: ai 5 di Març. Parcè che la conte e sta par finî. Anzit. Cuant che o learês chest articul, e sarà za finide. Di Palaç Belgrât, al moment, a comentin: «Cumò, o sin in spiete». E la spiete, il moment de veretât, e sarà une volte passâts i 30 dîs di chê date. Di cuant che, ven a stâi, la Provincie e à dât mandât – su at formâl aprovât de zonte Fontanini – al so Ufici legâl di mandâ une seconde letare di difide sedi al Ministeri dal Disvilup Economic che ae Rai.
PRIME BOLZAN?_ Dentri di chel timp, si impon ai doi sogjets di fâ buine la convenzion par che a sedin metudis in vore trasmission radiofonichis in marilenghe. No si capìs parcè, ma tai plans alts di Viâl Mazzini – cussì a riferissin – a vuelin spietâ che e passi prime la convenzion cu la Provincie di Bolzan pe sede Rai di Bolzan. No si veve mai sintût di precedencis o graduatoriis jenfri lis minorancis. Ma se nissun segnâl al rivarà dentri di chê dì, la Provincie e doprarà l’imprest judiziari par otignî in vie costritive l’adempiment de normative di tutele de lenghe furlane, in plui di un eventuâl risarciment dai dams. «Se al jere un segn di passâ – al comente Fontanini –, chest al è za stât passât. A passe 10 agns de jentrade in vore de leç 482, i furlans a spietin ancjemò che e sedi previodude e garantide une programazion stabile pes trasmission televisivis in lenghe, tal ambit dal Friûl. A dispiet des tantis atestazions di bande dai sorestants romans». Di no dismenteâ che, ae fin di Zenâr, si jere dât dongje un incuintri a Udin fra il president Fontanini, il diretôr de ARLeF William Cisilino (che in chê ocasion al deventà ambassadôr plenipotenziari des istancis dai furlans su Rome, in mert ae cuestion de radio tv), il diretôr comerciâl di Raitrade Luigi De Siervo, e il diretôr de sede Rai di Triest, Roberto Collini. E al sameave che la robe e fos fate. Invezit, i dîs a son passâts cence nissun cambiament, ingnervosint Cisilino e Fontanini che, a reson, si son sintûts cjapâts pal nâs, daspò la aparizion e lis assicurazions dai funzionaris de tv di Stât.
TANTE FADIE DOME PE RADIO_ Ciert, e salte ai voi une stramberie. Pe prime volte si è rivâts adore di inserî il furlan tal contrat di servizi, dome pes trasmissions de Radio. E ce fature, par otignîle. Cumò e mancje, par dâi aplicazion, che e sedi firmade la convenzion ad hoc tra Servizi radiotelevisîf regjonâl e Presidence dal Consei dai Ministris. Insome, ae fin al mancje simpri alc prime che si rivi a meti in vore in maniere concrete la leç. Isal un impasse politic? E sì che in comission di Vigjilance Rai a son sentâts doi nestris rapresentants, Vanni Lenna (di Fors Disot)
dal Pdl e Mario Pittoni (di Udin) de Leghe. E in cuote, tal stes partît di chest ultin e di Fontanini, tal Cda de Rai, e je sentade ancje Giovanna Bianchi Clerici, che e dovarès tignî ben presints lis esigjencis des minorancis linguistichis. Invezit ancjemò nuie.
CLASS ACTION_ Stant che sul cjaval cjonçât de Rai e pindulave za une prime difide, se dopo la seconde nol sucedarà nuie, la Provincie e fasarà cause ae Rai e e domandarà di «risarcî i dams al popul furlan che si è viodût dineât par agns un dirit», al à dite  Fontanini. A chest pont, ducj i furlans a podaran partecipâ a une class action: ducj chei che si sintaran danezâts tal ricognossiment di un lôr dirit a podaran domandâ risarciment al judiç, une volte inviade la cause legâl. ■
Oscar Puntel