Il cjant e la coralitât a son une des plui grandis espressions di identitât di un popul, struments antîcs di apartignince che a àn simpri rispuindût a un bisugn di vivi coletîf, comunitari, artistic e ricreatîf. A ’nd è cetancj di côrs tal nestri Friûl, di tant timp e di ogni gjenar, tant che vuê si contin cirche tresinte di chei associâts ae Usci FVG (Union des societâts corâls) e la plui part a son amatoriâi, une tipologjie che e costituìs la vere grande ricjece dal patrimoni de musiche vocâl.
Côrs parochiâi, di mont, di alpins, formazions piçulis e grandis che a cjantin programs musicâi tant diferents tra di lôr, che a van de musiche gregoriane ae polifonie, passant pes vilotis, pal cjant spontani e pes operis vocâls dai nestris compositôrs, di Mainerio a Candotti, Tomadini, Cossetti, fin ai contemporanis, ai côrs gospel e chei de musiche moderne.
Une realtât cetant vivarose duncje, e presint tal tiessût sociâl furlan, buine di slargjâsi al internazionâl e di fâsi preseâ cun premis, ricognossiments e vitoriis a concors impuartants.
IL PROBLEME GJENERAZIO-NÂL_ Tal stes timp però, nancje la coralitât furlane e rive a scjampâ ae crisi gjenerâl che e tocje il probleme dal scambi gjenerazionâl, ven a stâi ae carence de jentrade di gnûfs coriscj, dedits e apassionâts, interessâts a continuâ la strade inviade dai anzians e dai coparis fondadôrs di societâts corâls, tantis di lôr costituidis bielzà cincuante, sessante, setante agns fa.
Cui plui cui mancul, ogni côr al sofrìs di masse pocjis vôs zovinis e intant che chês che a son za a deventin vecjis, ancje i progjets a riscjin di fermâsi, e cun lôr dute la ativitât corâl.
Par fortune che a son ancje ecezions dovudis e benvignudis, côrs che si dimostrin bogns di stimolâ interès e voie di cjantâ, prime di dut te int de proprie comunitât, e che si autoalimentin midiant di une vision de musiche corâl leade tra tradizion e presint.
LA INOVAZION DI RUDE_ Un di chescj côrs, simpri atîf e propositîf di novitâts, ecelence furlane che no à bisugne di presentazions, al è il Côr Polifonic di Rude, diret de maraveose Fabiana Noro, che propit in chest mês al ven presentât il so ultin progjet. Un progjet inmaneât propit par investigâ la funzion de musiche corâl intal tiessût contemporani, par une antologjie che e cjape il non di Riflès, Riflessi.
I tocs presints in cheste lôr ultime fadie che e siere la trilogjie discografiche scomençade cun Perle (2009) e Ricuardi un timp (2013), a son ducj di autôrs contemporanis, interpretâts des vôs di Rude cun chê di stimolâ la atenzion viers un patrimoni atîf che al met in zûc lis dinamichis dal vivi di vuê, dal cuotidian che si spiele tal veri da la art corâl.
UN VOLI SUL MONT_Cutuardis tocs, sintesi di une panoramiche mondiâl su la vôs e sul so tratament, par autôrs che a vegnin no dome de Italie ma ancje dal Gjapon, de Americhe, de Norvegje e de Spagne, par cjants no dome a capele ma ancje cun acompagnaments strumentâi, tant che il pianoforte, il cuartet di arcs e la armoniche. Une altre impuartante dimostrazion de versatilitât di cheste formazion virîl, plene di sintiment intes interpretazions e dotade di capacitâts tecnichis siguris, par un binomi vincent, cressût daûr il stîl di une diretore cetant esperte e amade tant che Fabiana Noro.
Autôrs come Kentaro Sato, Ola Gjeilo, Morten Lauridsen, Eric Whitacre, Javier Busto, fin ai nestris Giovanni Sollima, cui Canti Rocciosi inte bielissime version di Daniele Zanettovich, Bruno Lauzi e Lucio Dalla, chescj ultins presints cun doi tocs, Almeno tu nell’universo e Caruso, rangjâts cun magjistralitât di Valter Sivilotti, si presentin tant che rais di soreli che si rifletin inte nestre esistence di ogni dì.
COLABORAZIONS_ A intervignî inte realizazion di chest progjet, altris personalitâts dal panorame musicâl furlan: il pianist Ferdinando Mussuto, il violoncelist Antonio Puliafito, l’armonicist Sebastiano Zorza, i violiniscj Nicola Mansutti e Lucia Clonfero, la violiste Margherita Cossio e il tenôr solist Peter Gus, par un prodot regjistrât dut intîr dal vîf sot dal voli atent di Stefano Amerio di Artesuono. Un Cd che dal sigûr nol pues mancjâ inte discoteche di cjase nestre. ❚
Alessio Screm
Contile juste / Plebissît pustiç
Diego Navarria
“MMandi, nono.” “Mandi frut!” “Dai mo, nono, no soi un frut. O ai disenûf agns e o ai pene finît il liceu!” “Par me tu sarâs simpri un frut, il prin nevôt. Però e je vere, tu sês deventât grant, une anime lungje. Se tu cressis ancjemò tu varâs di sbassâti par jentrâ in cjase, […] lei di plui +
Presentazion / Presentazion dal libri “Fûc su Gurize”. Intal ambit dal Cors Pratic di Lenghe e Culture Furlane inmaneâtde Societât Filologjiche Furlane
Redazion
Joibe ai 17 di Avrîl dal 2025 aes sîs e mieze sore sere (18.30)SALE CONFERENCIS DE BIBLIOTECHE COMUNÂLVie Rome 10, Vile di Ruvigne / Via Roma 10, S.Giacomo di Ragogna A intervegnin: DIEGO NAVARRIA colaboradôr dal mensîl ‘La Patrie dal Friûl’e DREE ANDREA VALCIC president de Clape di Culture ‘Patrie dal Friûl’Jentrade libare lei di plui +
Cungjò / Mandi, Bruno.
Redazion
Al declarave “che nol è dificil fâ telecronachis in marilenghe e che il furlan al à peraulis e espressions di pueste par fâlu”. lei di plui +
L’EDITORIÂL / La lezion de bandiere par dismovisi dal letarc
Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +
La piçade / Fevelìn di autonomie pluio mancul diferenziade
Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +
Grant suces di “Stin dongje ae Patrie”, la tierce edizion de fieste dal nestri gjornâl
Redazion
Pe rassegne Avostanis, li dai Colonos a Vilecjaze di Listize, il mont des associazions, de culture, dal spetacul, dal sport si è strenzût intor dal gjornâl dut par furlan fondât tal 1946 A an partecipât: Glesie Furlane, i Bakan, Claudio Moretti – Elvio Scruzzi – Fabiano Fantini (Teatro Incerto), Serena Fogolini e Raffaele Serafini (Contecurte), […] lei di plui +