Ca di nô, la iconografie musicâl
e je une materie inmò di scuvierzi
Fevelant di robis di art, musicâls e figurativis che o vin in Friûl, al risulte che a son tantis e di grande cualitât lis testemoneancis che a metin insiemi musiche e piture, su la fonde di chê dissipline che si clame iconografie musicâl. Une materie cuasi inesplorade ma che e merte studis aprofondîts e magari une scuadre di esperts, tant che musicolics, storics da la art, archeolics, antropolics, par produsi insiemi ricercjis che a dedin il valôr just a chest patrimoni che par tancj al è inmò scognossût. ◆ A son di fat pôcs i nestris studiôs che tal passât si son dedicâts a frontâ la iconografie musicâl, une materie che e indaghe su reperts figuratîfs, tant che incisions, frescs, pituris, miniaturis, mosaics, statuis, ritrats e dut ce che si pues viodi in forme bi o tridimensionâl, e che al rapresente in cualchi maniere il fâ musiche. Senis coreutichis, corâls, figuris cun struments musicâi imortalâts intant che si sune, o si acuarde, o si preparin a sunâ. Int vivente, spirts, agnui, dut chel che si vûl, o che l’artist al à volût rapresentâ intun determinât contest.◆ O disevi, ben pôcs in Friûl si son dedicâts a chest ram dal savê, e in ambits ristrets: pre Gilberto Pressacco, Vittorio Fael, Renato Della Torre e il costrutôr di struments musicâi Paolo Zerbinatti. Chescj a son chei che a àn dât alc di significatîf a cheste ricercje che e je cuasi dute di scomençâ e che jo o ai gust di fâ di almancul sîs agns incà. ◆ In ocasion di un apontament di Avostanis ai Colonos di Vilecjaze di Listize, par un incuintri dal titul “Musica Picta”, o ai vût la ocasion di presentâ al public une panoramiche des mês ricercjis, pal moment in ambit sacri e no profan, fatis midiant di un lunc pelegrinâ in glesiis, plêfs, munistîrs, lûcs sacris e bibliotechis dapardut in Friûl. O ai regjistrât cetancj elements di nature iconografiche musicâl fin cumò mai studiâts, e i esits di chestis ricognizions a son une vore interessants.◆ Gjavant fûr il teme dai struments musicâi che nus son restâts des epochis antighis – parcè che in chest câs si fevele di organologjie – o vin, tra i reperts plui antîcs, sistris di epoche celtiche: ma tant che iconografiis e je le Aquilee romane che e tache a dânus sodisfazions. Une piçule statue dal diu Atis, dal I secul p.d.C. cirche: chest diu de feconditât al sune platuts, cimblis, nus da memorie de sacralitât di chei timps di politeisim, come il sunadôr di dople tibie, un dopli aulos, doi flauts insome, sculpît intun piçul diademe, un cameu di pieris preziosis cetant significatîf. E inmò la urne cinerarie che e mostre un altri sunadôr di dopli aulos. Par no dî, in ete plui resinte, viers il IV – V secul d.d.C., dai mosaics di Aquilee, là che si viôt rapresentât il bon pastôr che al ten in man un flaut di Pan a vot canis, inte ale diestre dai paviments de Basiliche, e il soldât sunadôr di tubicen, une tube antighe, inte palestre des grandis termis. ◆ Chest dome par dâ cualchi cerce. Passant ae Ete di Mieç, a fasin grande impression lis miniaturis dai codiçs antîc, tant che il Salteri di Sante Elisabete e chel di Egbert, par dî il vêr ben studiâts dai ricercjadôrs internazionâi sot diviers aspiets, ma no masse in chei che o stoi metint in lûs. Re David cul kinnor, une lire antighe, senis gjavadis des sacris scrituris, come chê che e cjate ispirazion dal Salm 136 là che i cristians, su la rive dai flums di Babilonie, a àn dovût picjâ i lôr struments musicâi. E alore intal Salteri di Sante Elisabete dal secul XIII, ve poiâts tra i ramaçs di un salgâr un salteri, une arpe, une lire, une sorte di ribeche. Intune altre rapresentazion si viodin ancje lis cjampanis sunadis cun martieluts, un sunadôr di tube e un sunadôr di orghin, cuntun om che al tire i soflets par fâlu sunâ. ◆ A son senis di grande impuartance pe comprension sedi des formis rituâls di chei timps, sedi par cognossi la nature ancje fisiche di chei struments musicâi, come che e jere, e cemût che a vignivin fats e sunâts. ◆ Lant plui inlà tal timp, al maravee il splendôr di chescj sogjets inte opare di Gianfrancesc di Tumieç o miôr il Del Zotto, Pelegrin di San Denêl, Antonio de’ Sacchis cognossût tant che il Pordenon, Pomponi Amalteu, Zuan De Cramariis, e inmò Zuan Martini, Bernardin Blaceo, Josef Furnio, il Pilacorte. E si podarès lâ indenant, nomenant par esempli ancje Zuan di Udin che, al servizi di Raffaello, al à dissegnât la plui part dai struments musicâi inte produzion dal pitôr di Urbin, tant che inte “Estasi di Sante Cecilie”. ◆ Ancje il Sietcent nus ufrìs tancj esemplis de iconografie musicâl in Friûl, come inte opare di Zuan Batiste Tiepolo, su ducj i agnui cjantôrs inte capele dal Santissim Sacrament tal Domo di Udin, o lis sunadoris di tamburel tal Oratori de Puritât. In Cjargne al lavorave Domeni Schiavi che al à piturât diviers sunadôrs, come su la cupule dal presbiteri dal Domo di Tumieç; e plui inlà, tal Votcent, al è par esempli Filip Giuseppini che, a Trep di Cjargne, al à dissegnât La Glorie di Sant Antoni di Padue cuntun agnul cu la clarine, une trombe lungje e drete, tant che la stesse Catarine Percude e à contât di cheste opare intune sô letare. Tite Gori di Nimis inte glesie dal so paîs al à dât il so contribût ae piture sul teme musicâl, cussì ancje Francesc Pellizzotti a Paulâr, e la liste e je lungje, tant che mi fermi cul codroipês Renzo Tubaro, mestri di piture e amant dai sunôrs dissegnâts cul pinel. E je musiche di sintî cui voi e che e pues ben slargjâ il rai di azion su lis cognossincis che o vin, mai tant siguris a dî il vêr, parcè che a son une vore lis suposizions cence provis ciertis, intor e dentri de musiche in Friûl. Tante, di scoltâ ma ancje di viodi. ❚
