TERITORI. Cjargne cence aghe

Deflùs minim vitâl, dulà sêstu? Legambiente le à batude di stâ sul chivalì, daspò de racolte dai dâts de iniziative “Caravane des Alps” che di tant timp in ca e fâs i pulçs ae politiche ambientaliste de mont. Dî che la fotografie che e salte fûr e met in pinsîr, al è pôc: cirche otante chilometris di jets sut in Cjargne, par colpe di un disfrutament dai cors di aghe che il Comitât pe tutele des aghis dal Tiliment al declare disastrôs. Doi a son i teritoris alpins plui in dificoltât e che a patissin di plui cheste situazion: la Cjargne juste apont, e un toc de Val Cjanâl. Lis presis de aghe – al spieghe Franceschino Barazzutti dal Comitât – a son bielzà setante, e no je finide. Al è stât fat un progjet che al previôt di fâ sù trê centralinis sul riul Cjarsò, tal Cjanâl di Incjaroi, o sei te zone di Paulâr, che cussì e varà bondance di corint ma e larà dilunc a vê pocje aghe pai siei acuedots.
LIS COLPIS DE POLITICHE_ La colpe, simpri daûr dai ambientaliscj, e sarès propite de politiche che prime no à limitât lis concessions, e daspò e à ancje “dismenteade” la spine vierte. Nissune imputazion a lis zontis Illy e Tondo ma al implant burocratic dal palaç di Triest, che di almancul cuindis agns in ca al da fûr concessions cun masse facilitât. «A mancjin simpri lis valutazions coretis sui dams ambientâi che lis oparis a puedin procurâ» a disin chei di Legambiente. Par cirî di ripaiâ lis popolazions che, no cate la lôr volontât, a àn di fâ di mancul dai flums a front dal sfrutament idroeletric, tal 1962 – in gracie de leç 959 dal 27 di Dicembar 1953 – e je stade creade la Federazion dai Bacins Imbrifers Montans, par rapresentâ a nivel istituzionâl lis problematichis dai Consorzis Bim. In Friûl a son cuatri i Bim: chel de Drau, chel de Livence, chel de Plâf e chel dal Tiliment, che a cirin di ripaiâ i dams e a fasin paiâ une soretasse aes concessionariis che a disfrutin la aghe. Chest impuart si lu dopre intal cjamp des oparis publichis. Ma par Legambiente nol baste. Propit par sconzurâ che lis centralinis idroeletrics a fasedin restâ i flums cence aghe cun grues problemis no dome pe flore e pe faune ma ancje pal aspiet gjeologjic e climatic, e je stade promovude une leç pal “deflùs minim vitâl”, che al previôt di lassâ tai flums e tai riui une cierte cuantitât di aghe. E alore dulà isal il probleme? «Dome che nissun al controle, e nissun al rispiete chest limit».
Tiziano Gualtieri