TERITORI. La Slovenie e il cine, un leam lunc plui di un secul

Il prin al fo l’avocat Karol Grossmann (1864-1929) che, passionât di cheste gnove forme di art clamade par sloven kino, al zirà cualchi riprese te sô citât, Ljutomer, tal nord est de Slovenie. O sin tal 1905: Grossmann al filmà la fiere di Ljutomer, la int che e vignive fûr di messe, il zardin di cjase sô. I prins filmâts di Lubiane a son invezit dal 1909: in chestis ripresis di un autôr no cognossût si podin viodi par cualchi minût une parade dilunc lis viis de citât e une panoramiche de capitâl de Slovenie.
Tai agns Vincj dal secul passât, a son stâts zirâts doi filmâts une vore interessants. chel su la seconde edizion dai campionâts di schi dal ream di Jugoslavie, davuelts a Planica (1922), e chês che salacor a son lis primis ripresis soteraniis di dut il mont, ziradis te innomenade grote di Postumie tal 1926.
Juste chest an, l’Archivi cinematografic sloven (Slovenski Filmski Arhiv-SFA) al à fat fieste pai 40 agns de sô nassite, risultant cussì un dai plui vieris archivis di cheste sorte te Europe di mieç. L’Arhiv al cjape dentri ducj i plui impuartants cines dal paîs nestri vicin, tacant dai pionîrs tant che Grossmann, Bester, Jakac, Badjura. Dal 1990 in ca, dopo de indipendence, al SFA i tocje chel di tirâ dongje filmâts di ents publics, istituzions o ben di privâts e di colezioniscj; in graciis dal so lavôr, l’Archivi al fâs in mût che la Slovenie e sei un dai paîs li che si tutele miôr il patrimoni cinematografic nazionâl.
Magari cussì no, a diference di chês altris republichis de ex Jugoslavie (par esempli la Cravuazie), la Slovenie no je mai stade indevant cui timps par chel che al inten la produzion di cines. Dut câs, par un ciert periodi dopo de Seconde Vuere mondiâl e je rivade a dâ fûr ogni an uns dîs cines di cualitât: par esempli, Kekec di Jože Gale (1951) e La valade de pâs di France Stiglic (1956) a vincerin diviers premis internazionâi.
Vie pai agns Cincuante, la filmografie slovene e à vût a ce fâ soredut cun sogjets come la lote partigjane (Na Svoji Zemlji – Su la lôr tiere di Stiglic dal 1948 e Akcija – Azion di Jane Kavcˇicˇ dal 1960) e la vite de borghesie slovene sot dal Imperi austrongjaric (par esempli Jara Gospoda – I ariviscj di Bojan Stupica dal 1953). Cui agns Sessante, il cine sloven al à cognossût une fase moderne li che a son vignûts fûr i lavôrs di Boštjan Hladnik Il bal inte ploie dal 1961 e di Matjaž Klopcˇicˇ (Na Papirnatih Avionih – Su alis di cjarte, 1967).
A screâ chê che i critics a clamin “la Vierte dal cine sloven” a son stâts doi films de fin dai agns Novante: Ekspres, Ekspres di Igor Šterk (1997), pelicole pluripremiade che e à tant che fîl dal discors un metaforic viaç in tren, e Autsajder (simpri dal 1997) di Andrej Košak, storie dal amôr nassût tra une fantate slovene e un “outsider” bosniac. A àn vût sucès po ancje Sladke Sanje – Dolçs siums (2001) di Sašo Podgoršek e Damjan Kozole cun Rezervni Deli – Tocs di cambi (2003), denuncie dal tratament teribil che a patissin i imigrâts clandestins che a traviersin la Slovenie.
Tai ultins agns si è fat cognossi un zovin regjist di Lubiane, Jan Cviktovicˇ (viôt la foto). Cun Kruh in mleko – Pan e lat  al à vinçût il Leon dal avignî ae mostre dal cine di Vignesie tal 2001. Al à fat scjas il so Odgrobadogroba – Di tombe in tombe, candidât al premi Oscar dal 2007 tant che miôr cine forest e miôr film al 23m Torino Film Festival dal 2005. L’innomenât cine di Cviktovicˇ al è une tragjicomedie che e à tant che protagonist un oratôr funerari professionist.
ALESSIO POTOCCO
_______________________________________________
Il gnûf guvier di Borut Pahor
Ai 21 di Novembar stâts, juste doi mês dopo des ultimis elezions, al è nassût il gnûf guvier di Borut Pahor. Te Cjamare di Stât di Lubiane il novesim esecutîf sloven al pues gjoldi de poie di une coalizion di cuatri partîts di centriçampe: i Sociâldemocratics (che a àn 29 seçs), Zares (9), il Partît dai pensionâts
(7, ma che te legjisladure passade al jere tal guvier di centridrete) e i Liberâi democratics (5). In ocasion dal vôt di fiducie, i “sì” a son stâts 56, cuintri 30 “no”.
I ministris a son disevot; di chescj, cinc a son feminis, che a ocupin dicasteris impuartants tant che chel dai Afârs internis, de Difese,
de Culture, de Aministrazion publiche
e de Autonomie e Politichis regjonâls.
Rispiet al guvier di prime (premier Janša, centridrete), te scuadre di Pahor al è ancje un Ufici pes minorancis slovenis che a vivin tai paîs dulintor e pai Slovens vie pal mont: a cjâf di chest ufici al è il ministri Boštjan Žekš.
ALESSIO POTOCCO