TERITORI. Lis cuatri universitâts de Slovenie

Lubiane, Maribor, Cjaudistrie e Gnove Gurize. In chestis citâts a àn la lôr sede lis cuatri universitâts de Slovenie, un paîs di a pene doi milions di abitants che al crôt te ricercje, te inovazion e soredut tai zovins. Te nestre regjon invezit, cuntun milion 200 mil di lôr, nol passe dì che no sedi alc ce cuestionâ rivuart ai doi ateneus di Udin e di Triest.
Ancje in Slovenie a son magari cussì no problemis di finanziaments publics, ma lis cuatri universitâts a convivin pluitost ben.
E il numar dai iscrits al cres cence padin.
UNIVERSITÂT DI LUBIANE
Univerza v Ljubljani
www.uni-lj.si – (sît par sloven e par inglês)
La Universitât de capitâl e je la plui vecje e la plui innomenade de Slovenie; e je ancje chê che e à plui students (uns 60 mil di lôr, tant par capîsi cuasi cuatri voltis chê di Udin).
Za tal Sîscent a esistevin te citât diviersis academiis, soredut di teologjie e di filosofie. Sot Napoleon al jere un istitût clamât Ecoles centrales: nassût tal 1810, al durà dome trê agns. Dilunc dal Votcent a forin cetancj tentatîfs par meti in pîts un ateneu in lenghe slovene, ma l’Imperi dai Asburcs no lu permetè mai, si che duncje si dovè spietâ la colade di Austrie e Ongjarie e la vignude dal Ream dai Serps, Cravuats e Slovens.
La Universitât di Lubiane e nassè cussì il prin di Setembar dal 1919: sul imprin lis facoltâts a jerin cinc (Leç, Filosofie, Tecnologjie, Teologjie e Medisine), i professôrs invezit 18. La istituzion e tignì dûr a pressions politichis sei dilunc de invasion nazifassiste dal 1941 sei sot dal regjim di Tito, deventant tai agns Otante centri de proteste de zoventût slovene che e domandave la indipendence dal paîs.
In dì di vuê lis facoltâts de Universitât di Lubiane a son vincjedôs; trê lis academiis, o ben chê di Musiche, chê di Teatri, Radio, Film e Television e chê di Design.
Dal Otubar 2004 li dal ateneu lubianês si cjate la sede de Iapss, Associazion internazionâl dai students di Siencis politichis, socie che e ten adun dîs mil universitaris di dut il mont.
Come l’ateneu furlan, ancje chel di Lubiane al à tant che retôr une femine: si trate di Andreja Kocijan, che e pues jessi braurose de sô universitât stant che e risulte 480me tal mont, daûr de  graduatorie butade jù ogni an di un stimât istitût di Shanghai (viôt  www.arwu.org).
UNIVERSITÂT DI MARIBOR
Univerza v Mariboru
www.uni-mb.si – (sît par sloven e par inglês)
L’ateneu di Maribor, citât di 113 mil abitants tal nord est dal paîs, al nas tal Setembar dal 1975: e je la seconde universitât plui vecje e plui grande de Slovenie. Za te metât dal Votcent (1859) il vescul Anton Martin Slomšek al fondà une Scuele di teologjie. Jenfri i agns Cincuante e Sessante dal secul stât a forin creâts diviers istitûts superiôrs come chei di tecnologjie, di cumierç, di agronomie e di pedagogjie.
In dì di vuê la Universitât di Maribor e à 15 facoltâts; la plui innomenade e je chê di inzegnerie. A son ancje sedis stacadis in altris citâts come Kranj, Celje e Krško. I students a son uns 28 mil.
Il retôr al è Ivan Rozman: il so mandât al scjadarà tal 2010.
UNIVERSITÂT DAL LITORÂL
Univerza na Primorskem
www.upr.si – (sît par sloven, par talian e par inglês)
I prins pas concrets pe costituzion di un ateneu te Slovenie ocidentâl a forin fats tai prins agns Novante daspò de indipendence dal paîs. Tal 1994 al fo istituît il Centri di Ricercjis sientifichis di Cjaudistrie; doi agns plui tart i tocjà al Centri pai studis universitaris. Il tierç ateneu de Slovenie, daspò chei di Lubiane e Maribor, al è stât creât cuntun decret de Cjamare di Stât ai 29 di Zenâr dal 2003; il prin an academic al tacà ai 15 di Otubar dal stes an. Lis facoltâts dal ateneu cun sede a Cjaudistrie a son cuatri: studis umanistics, pedagogjie, management e siencis matematichis, naturâls e tecnologjiis informatichis. Cun di plui, a son doi istitûts di formazion superiôr e doi istitûts di ricercje.
I students a son cirche siet mil, mintri docents e ricercjadôrs a son in dut uns 260. Il retôr al è l’ex ministri Rado Bohinc.
UNIVERSITÂT DI GNOVE GURIZE
Univerza v Novi Gorici
www.ung.si – (sît par sloven e par inglês)
Al è il plui piçul e il plui zovin dai cuatri ateneus slovens, istituît a pene un pâr di agns za fa cuant che il Politecnic di Gnove Gurize (nassût tal 1995 par man dal comun di Gnove Gurize e dal “Istitût Jožef Stefan” di Lubiane, www.ijs.si/ijsw/IJS) al fo alçât sù a universitât vere e proprie. Al è l’unic ateneu no statâl; lis facoltâts a son cinc, plui une scuele speciâl pe enologjie. I students a son uns votcent.
ALESSIO POTOCCO
______________________________
La cuestion dal non a Cjaudistrie
Plui di cinc agns indaûr e fo inaugurade a Cjaudistrie la Univerza na Primorskem: une bataie lade indevant une vore di agns di bande des istituzions locâls, ma ae fin l’obietîf al fo centrât.
Une part de popolazion de cueste istriane nord ocidentâl, ven a stâi la minorance di lenghe taliane che e vîf culà vie di secui in ca dopo dal domini di Vignesie, no fo però par nuie sodisfate par vie che il non de universitât par talian al fo voltât in Università della Primorska. Une cjosse ridicule, cuasi che i sorestants slovens no vessin volût dâi spazi a un non dut par talian ad hoc.
A scugnirin passâ nûf mês (Lui dal 2004) par che la Cjamare di Stât di Lubiane e votàs par corezi il non dal ateneu a pene nassût di Cjaudistrie, che cumò par talian si clame Università del Litorale. Duncje un non no peât a une singule citât ma a dut un teritori: se si pues fâlu a Cjaudistrie (e a Lubiane), si podarà ben fâlu ancje a Udin (e a Rome)! O no…?
ALESSIO POTOCCO