Sfuei Mensîl Furlan Indipendent
Archivi de Patrie

TERITORI – SLOVENIE. Ancje in Slovenie un esercit di volontaris

............

Stant a stimis fatis di resint, plui di 100 milions di citadins europeans di dutis lis etâts, professions e nazionalitâts si impegnin ogni dì tal mont dal volontariât: par dâur il just ricognossiment, il Parlament european al à declarât il 2011 «An dal volontariât» tal Continent Vieri. E sarà la ocasion par tirâ il belanç di une part cetante impuartante di chel che al è clamât il «Tierç setôr» che al procure une ricjece ecuivalente al 5 par cent dal Prodot interni al sporc dai 27 stâts membris de Ue.
Dopo une cressite continue tai ultins dîs agns, in Slovenie lis Organizazions no governativis (NVO, Nevladna organizacija) a son passe 20 mil: stant che tal paîs nestri vicin a vivin pôc plui di doi milions di lôr, si pues dî che lenti e je une socie ogni cent abitants. Pe plui part (98 par cent) si trate di associazions che si ocupin di events culturâi, di inmaneâ sagris e apontaments locâi: insome, une sorte di «pro loco». Jenfri dutis chês altris, si cjatin uns vincj cooperativis, plui di sîscent sociis peadis ae Glesie, plui di cent che a stan daûr ai invalits.
La associazion di volontariât plui cognossude in Slovenie e je la Slovenska filantropija di Lubiane (www.filantropija.org): organizazion no governative nassude tal 1992, il so obietîf al è sei chel di promovi il concet di volontariât jenfri la int, sei di coordenâ il jutori par chei che a ‘nd àn bisugne, lavorant adun cun altris sociis che a àn il stes intindiment. Slovenska filantropija e sta dongje ancje ai sfolâts e ai migrâts, tant che e à metût in pîts un Centri di pueste par sigurâ jutori psicologjic: il Centri, istituît tal 1994 biel che tancj di lôr a scjampavin de vuere de ex Jugoslavie e po dopo, magari cussì no, al à viodût rivâ int dal Kosovo tal 1999, al ufrìs asîl a cui che a ‘nd à bisugne e ju jude a integrâsi te lôr gnove societât. Il Centri al gjolt de poie (ancje finanziarie) de Comission europeane, dal Unhcr (la Agjenzie pai sfolâts de Onu), dal Font european pai sfolâts, dai ministeris pai Afârs internis e pal Lavôr dal guvier sloven e dal comun di Lubiane.
Sul sît internet de associazion si cjatin ancje cetancj avîs li che si cîr int che e vedi timp par fâ volontariât, tant che insegnants di inglês e sloven par imigrâts. Un dai avîs plui interessants di chei metûts di resint al è un li che si cîr un insegnant che i stedi dongje a un zovin che al studie te prime classe des mediis di Isule/Izola/Isola: il scuelâr al ven dal Afghanistan, i coventarès un jutori par imparâ miôr sloven, talian, inglês e matematiche.
La Slovenska filantropija si môf ancje fûr dai confins slovens: i contats cu lis sociis di volontariât dal forest a son cetancj, e tal Avrîl dal 2008 cheste organizazion e à inmaneade la assemblee gjenerâl anuâl dal Centri european pal volontariât, dant acet a Lubiane a plui di cent partecipants in rapresentance di 24 paîs de Ue.
Fâ volontariât al vûl dî ancje lâ daûr a cierts principis che a marchin la totâl gratuitât des ativitâts di cheste sorte: par chest, za tal 2003, in ocasion dal cuart congrès sloven dal volontariât che al è stât davuelzût a Novo Mesto, al è stât butât jù un Codiç etic che fin cumò lu àn firmât 345 organizazions. Tal 2004 e je po nassude la Rêt des associazions di volontariât de Slovenie par meti adun ideis, progjets e sfuarçs par judâ cui che al à bisugne: par cumò si son dadis dongje 565 sociis.
ALESSIO POTOCCO

Contile juste / Plebissît pustiç

Diego Navarria
“MMandi, nono.” “Mandi frut!” “Dai mo, nono, no soi un frut. O ai disenûf agns e o ai pene finît il liceu!” “Par me tu sarâs simpri un frut, il prin nevôt. Però e je vere, tu sês deventât grant, une anime lungje. Se tu cressis ancjemò tu varâs di sbassâti par jentrâ in cjase, […] lei di plui +

Presentazion / Presentazion dal libri “Fûc su Gurize”. Intal ambit dal Cors Pratic di Lenghe e Culture Furlane inmaneâtde Societât Filologjiche Furlane

Redazion
Joibe ai 17 di Avrîl dal 2025 aes sîs e mieze sore sere (18.30)SALE CONFERENCIS DE BIBLIOTECHE COMUNÂLVie Rome 10, Vile di Ruvigne / Via Roma 10, S.Giacomo di Ragogna A intervegnin: DIEGO NAVARRIA colaboradôr dal mensîl ‘La Patrie dal Friûl’e DREE ANDREA VALCIC president de Clape di Culture ‘Patrie dal Friûl’Jentrade libare lei di plui +

L’EDITORIÂL / La lezion de bandiere par dismovisi dal letarc

Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +

La piçade / Fevelìn di autonomie pluio mancul diferenziade

Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +