TERITORI. Un su doi di chei sot i trente al vote a diestre FPÖ/BZÖE

IL MOTÎF NUMAR UN: I STRANÎRS_ La Grande coalizion, nassude daspò des elezions dal Otubar dal 2006, no à cjatât nissun mût di jessî de sô crisi interne: i doi partîts, cun a cjâf il cancelîr socialdemocratic Alfred Gusenbauer, a àn barufât dal prin dì. I gjornâi a scrivevin di un continui de “passivitât dal guvier” o dal “guvier che nol lavore”. Gusenbauer al veve di metisi simpri plui dispès su la difensive. Logjic, ancje se no spietât, al fo il putsch dentri dal partît socialdemocratic: ai 16 di Jugn dal 2008, il gnûf president dal partît al deventà Werner Faymann. I popolârs (Oevp) a àn volût meti a pro la gnove crisi personâl de Spoe.  Ai 7 di Lui dal 2008, il vice cancelîr dal Oevp Wilhelm Molterer, al anuncià cu lis peraulis “Es reicht” (Vonde!) lis elezions anticipadis.
Il risultât des balotazions e la gnove de vitorie de diestre a son ladis pal mont. Cuasi un austriac su trê al à votât a diestre: il Fpoe, cun a cjâf l’arlêf di Joerg Haider Heinz-Christian Strache, al è cressût dal 11,4% al 17,5%, e il Bzoe di Haider al è rivât a 10,7%. I Socialdemocratics a restin la prime formazion, però a colin dal 35,3% al 29,3%. Pai Popolârs, mancul nûf ponts (26,0%), e jù ancje i Verts, dal 11,5% al 10,4%.
IL CANDIDÂT DE MINORANCE SLOVENE AL RESTE FÛR_ I slovens no si son metûts adun intun moviment politic; in rie dome un partît dai slovens, la Liste Unitarie (Enotna Lista EL) che e à partecipât tant che partner dal Forum liberâl (LIF). Il 2,1% pal LIF al jere masse pôc, cussì il candidât sloven, l’avocat clanfurtês Rudi Vouk, al reste fûr. Vouk al è restât malapaiât e preocupât dal sucès de estreme diestre: “Un fat alarmant, nuie di bon pe Austrie.”
Il risultât al à cjatât grant rivoc ancje di là dai confins austriacs. I gjornâi europeans a àn metût in prime pagjine la foto di Haider o di Strache cul titul  “grande vitorie de estreme diestre” o “ultra diestre al 30,0%”.
Secont i ultins dâts statistics, il tierç cjamp cun FPÖ e BZÖ adun al à rivât a cjapâ, te categorie dai zovins sot dai 30 agns, il 43,0%. Ancjemò plui clâr al è il consens pe diestre di chei che a àn votât pe prime volte: il 44,0% dai zovins tra i 16 e i 19 agns al à dât il vôt par Heinz-Christian Strache.
Ancje se i partîts di diestre no jentrin tal prossim guvier, il president de FPÖ Strache si pues calcolâlu  tant che il vêr vincidôr des balotazions.
BALANT E CJANTANT, CHE GUEVARA E IL RAP “VIVA HC”_ No podìn spiegâ il sucès semplicementri cul passât nazist dal paîs. Nuie di gnûf, anzit il program populistic al è classic: cuintri il capitâl, il carierisim, la UE e i imigrâts, e a pro de patrie. Gnûf al è il mût di presentâsi, l’imbalaç. Strache al cirive il contat diret cui zovins, balant intes discotechis o cjantant il rap “Viva HC” (si cjate ancje su YouTube cul titul “Viva HC”) doprant la figure di Che Guevara. Haider si meteve fûr invezit tant che politic madûr cuntun gnûf compuartament plui moderât, avocat dal om comun.
Il motîf numar un pai zovins e jere la cuistion dai stranîrs. Intun clime di pression e cu la pôre di vuadagnâ simpri mancul, la tolerance viers la concorince sociâl e cale. “Ancje chei altris partîts si ocupin dai stranîrs, ma il plui eficaç di ducj al è Strache”, a disin i zovins.
Tai nestris dîs, il sisteme bipolâr ideologjic socialist viers il cjamp clericâl conservatîf al à pierdût la sô significance storiche in Austrie, ma ancje in Gjermanie; soredut i zovins, il nestri futûr, si interessin mancul pes cuistions ideologjichis, ma invezit di plui pes cuistions concretis che a rivuardin il lôr avignî mancul sigûr.
Il messaç dai austriacs al è une vore clâr: vonde cu la Grande coalizion, però si spiete propit la formazion di une gnove Grande coalizion sot il cancelîr socialdemocratic Werner Faymann.
Alore: dut tant che prime.
JANEZ ERAT