Plui cjare la vite in Tirôl e Salisburc, plui a Jevât si vîf a bon presit_ Jessi a stâ in Austrie al vûl dî vivi cun comut, almancul se si cjape in pareli lis altris metropolis europeanis tant che Oslo, Copenhagen, Londre, Dublin e Zurì: si viôt daurman che la vite a Viene e coste mancul, e purpûr si manten un nivel economic e sociâl alt.
No dome par chest, il marcjât imobiliâr austriac al è un dai plui cirûts in Europe: cun di fat, la Austrie e ufrìs al investitôr sigurece, stabilitât economiche e une infrastruture svilupade. Secont une analisi resinte de imprese di consulence Mercer (www.mercer.com), Viene e je la citât cu la cualitât di vite plui alte dal mont; daûr a vegnin lis citâts svuizaris di Zurì e Gjinevre, mintri che al 41n puest o cjatìn Milan e al 55n Rome.
La situazion legâl_ Lis condizions par cuistâ un imobil a dipendin des disposizions in vigôr tes rispetivis regjons. La leç Grundverkehrsrecht e proviôt che l’acuist di un imobil di bande dai forescj nol sedi pussibil cence la autorizazion di pueste. Une des resons principâls e je la tutele dal caratar tradizionâl dal teritori, soredut te part alpine in Tirôl, in mût di contignî il pitic dai grancj investitôrs stranîrs. Lis disposizions di leç a stabilissin che dutis lis personis cu la citadinance di un paîs de Union europeane a sedin tratadis al stes mût tant che chei che a àn la citadinance austriache: chest al vûl dî che lis restrizions no valin pai furlans.
In Carinzie si cirin spazis in rive al lât_ La Carinzie e somee un paradîs par chei che a vuelin vivi dongje des grandis localitâts turistichis, sei dilunc dal Invier sei te stagjon cjalde, dongje dai grancj lâts cu la romantiche corone des Alps a pôcs minûts des perifariis des grandis citâts, tant che Vilac e Clanfurt, tacadis di autostradis modernis che a puartin a Munic e Viene. Lis plui bielis localitâts si cjatin in rive a un dai lâts carinzians: la plui domandade e je la regjon tor di Velden.
Velden: agjenziis imobiliârs in ogni cjanton_ Ancje se Velden e je une piçule citât sul lât Wörthersee, in ogni cjanton si cjatin agjenziis imobiliârs che a proponin ai clients une vore di ufiertis. In pratiche però al è scuasit impussibil vê informazions concretis su apartaments che si vendin in rive al grant lât: in cheste aree a vegnin ufiertis in vendite mancul di une dozene di cjasis par an. Stant che i presits alts a sigurin ancje buinis comissions, ogni agjenzie e trate lis informazions su costruzions gnovis in mût criptic.
Fuart disvari est-ovest_ (dâts di www.immobilien.net, la plui grande plataforme imobiliâr)
La alte cualitât de vite, la ufierte limitade e une fuarte domande a puartin a un disvari est-ovest dai presits pai imobii residenziâi. A Soreli bonât, si paie une vore di plui che tes regjons mancul svilupadis dongje dal confin cu la Cechie, la Slovachie o la Ongjarie. Tai ultins doi agns, par vie de crisi economiche, si à vût un moviment viers lis citâts: lis zonis plui prestigjosis a restin tor Innsbruck e Salisburc.
Plui cjâr a Innsbruck e Salisburc_ I apartaments plui cjârs (3.220 € al metri cuadrât, +7% rispiet al an passât) a son a Innsbruck. Al secont puest Salisburc cun 2.921 €/m² (+12%), po la capitâl Viene cun 2.688 €/m² (+6 %).
Tal centri di Viene 8 mil euros al metri cuadrât_ I apartaments plui economics si cjatin a Soreli jevât, a St. Pölten te Basse Austrie (1.290 €/m²) e a Eisenstadt tal Burgenland (1.217 €/m²). A Graz si paie 2.134 €/m² e a Clanfurt 1.950 €/m². I plui costôs invezit a son li des regjons turistichis: tal distret di Kitzbühel si partìs di 3.000 €/m² e si rive ancje a 4.876€. Numars astronomics si pain tal centri di Viene, li che si tocjin i 8.000 €/m².
I presits dai terens a plombin jù_
In dute la Austrie si note une recession de domande di tiere, tant che i presits medis a son lâts jù dal 9 par cent a pet dal 2008: in medie il metri cuadrât di tiere al coste in dì di vuê 89 euros. Inte Basse Austrie al ven il 6 par cent di mancul rispiet al 2008 (94 €/m²), in Stirie 50 €/m² (mancul 5 par cent); tes regjons mancul svilupadis si paie mancul di 20 €/m². Dome in Tirôl si regjistre une cressite continuade dal valôr.
Plui in sù dome i afits_ Par colpe de fuarte domande di apartaments, i presits a son cressûts in medie dal doi par cent. Innsbruck al reste la citât plui cjare ancje par chel che al rivuarde il fit cun 10,7 €/m²; po al ven Salisburc cun 9,5 €/m² (+9%), Viene cun 9,3 €/m² (ma tal centri de capitâl si passin i 15 €/m²). A Clanfurt, St. Pölten e Eisenstadt invezit la medie e je di 6,6 €/m².
JANEZ ERAT
Contile juste / Plebissît pustiç
Diego Navarria
“MMandi, nono.” “Mandi frut!” “Dai mo, nono, no soi un frut. O ai disenûf agns e o ai pene finît il liceu!” “Par me tu sarâs simpri un frut, il prin nevôt. Però e je vere, tu sês deventât grant, une anime lungje. Se tu cressis ancjemò tu varâs di sbassâti par jentrâ in cjase, […] lei di plui +
Presentazion / Presentazion dal libri “Fûc su Gurize”. Intal ambit dal Cors Pratic di Lenghe e Culture Furlane inmaneâtde Societât Filologjiche Furlane
Redazion
Joibe ai 17 di Avrîl dal 2025 aes sîs e mieze sore sere (18.30)SALE CONFERENCIS DE BIBLIOTECHE COMUNÂLVie Rome 10, Vile di Ruvigne / Via Roma 10, S.Giacomo di Ragogna A intervegnin: DIEGO NAVARRIA colaboradôr dal mensîl ‘La Patrie dal Friûl’e DREE ANDREA VALCIC president de Clape di Culture ‘Patrie dal Friûl’Jentrade libare lei di plui +
Cungjò / Mandi, Bruno.
Redazion
Al declarave “che nol è dificil fâ telecronachis in marilenghe e che il furlan al à peraulis e espressions di pueste par fâlu”. lei di plui +
L’EDITORIÂL / La lezion de bandiere par dismovisi dal letarc
Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +
La piçade / Fevelìn di autonomie pluio mancul diferenziade
Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +
Grant suces di “Stin dongje ae Patrie”, la tierce edizion de fieste dal nestri gjornâl
Redazion
Pe rassegne Avostanis, li dai Colonos a Vilecjaze di Listize, il mont des associazions, de culture, dal spetacul, dal sport si è strenzût intor dal gjornâl dut par furlan fondât tal 1946 A an partecipât: Glesie Furlane, i Bakan, Claudio Moretti – Elvio Scruzzi – Fabiano Fantini (Teatro Incerto), Serena Fogolini e Raffaele Serafini (Contecurte), […] lei di plui +