TERITORIS – AUSTRIE. Potence mondiâl dai timps di Mozart

LIS GRANDIS STELIS AUSTRIACHIS SCOGNOSSUDIS SUL PLAN INTERNAZIONÂL_ La Austrie e ven clamade ancje Musikland, tiere di musiche: lant indaûr cul timp te ete dai imperadôrs al è just che la Austrie e vegni considerade protagoniste, cun di fat cui nol cognossial Mozart, Haydn, Schubert, Liszt e altris. Di là dai confins de lenghe todescje al ven iniment alc altri: la musiche popolâr, la armoniche in man cul cjant tipic austriac-suizar Yodel e cjantants Schlager folk tant che l’ex campion tirolês di schi Hansi Hinterseer. Pôcs i austriacs cognossûts vie pal forest: Falco, DJ Ötzi o il composidôr di jazz Joe Zawinul, in Gjermanie i musiciscj schlager Udo Jürgens, Peter Alexander, i rapresentants dal Austropop tai agns  Setante-Otante Rainhard Fendrich, Wolfgang Ambros, Georg Danzer e altris che a dopravin pal gjenar Austropop soredut il dialet di Viene.
In part e je colpe dai austriacs stes, soredut dai mass media. “A’nd è une vore di artiscj e di band in Austrie, che se nol fos internet no si varès nancje mai sintût di lôr. La Austrie e à il cliché che e je costituide dome di yodel e di musiciscj folk…. Però e à pardabon une biele musiche di ufrî:  Pop, Rock e vie indevant… Se i artiscj no si scoltin, il stereotip nomenât al reste par simpri!”: cussì e critiche la situazion atuâl Christina Stürmer, la musiciste plui popolâr su la plataforme SOS-Musikland.
PÔC SPAZI TES RADIOS_ Tes radios austriachis la musiche “fate in cjase” si cjate al ultin puest. La radio nazionâl ORF e sune dome il 14,2 par cent di composizions locâls. La emitente Ö3, chê che e à la plui grande difusion in Austrie, e à invezit dome il 18 par cent, mintri che Radio Wien e trasmet ogni dì dome 9 lavôrs musicâi “fats in cjase”. La stazion nazionâl Ö1 si ferme a pene al 6,3 par cent. Dopo di protestis e petizions, i artiscj austriacs unîts te plataforme SOS-Musikland e la radiotelevision nazionâl ORF a àn cjatât ai 29 di Dicembar dal 2009 un acuardi par aumentâ la cuote di musiche austriache al 30 par cent des interpretazions e al 20 par cent des composizions.
AL TACHE L’ISTÂT DI FESTIVAL_ La stagjon dai festival si è vierte cul plui grant event rock austriac a viert clamât Novarock:  160 mil visitadôrs a àn scoltât 72 oris di musiche dai 11 ai 13 di Jugn su lis Pannonia Fields II a Nickelsdorf dongje il confin ongjarês.
DONAUINSELFEST: LA PLUI GRANDE FIESTE MUSICÂL A VIERT DI DUTE LA EUROPE_ Il Festival de Isule de Danau chest an si è davuelt dai 25 ai 27 di Jugn: si trate di un event musicâl a viert cun jentrade libare, dal 1984 in ca si ten ogni an ae fin di Jugn. Cun trê milions di visitadôrs dentri di trê dîs, e je la plui grande fieste a viert di dute la Europe.
Dut al tacà tal 1983 tant che fieste culturâl kulturelles Frühjahresfest te zone tor dal puint di Floridsdorf e sul teritori de isule artificiâl de Danau costruide jenfri il 1972 e il 1988 a nord di Viene. La fieste locâl e je cressude vie pai agns deventant un event di trê dîs suntun teritori di cirche 6,5 km cuadrâts. Su 27 palcs si presentin musiciscj di diviers gjenars musicâi.
OGNI DÌ PLUI DI MIEÇ MILION DI VISITADÔRS_ Za di timp i organizadôrs a contin ogni dì plui di mieç milion di visitadôrs: tal 2007 par esempli si ve un totâl di 2,6 milions, vâl a dî par vie de ploie uns 300 mil di mancul rispiet al an prime. Tal 1992 Udo Jürgens al à cjantât denant di 220 mil spetatôrs, tal 1993 al fo il storic conciert de leiende Falco cun plui di 150 mil fans e sul palc tal 2006 Christina Stürmer di front di 180 mil spetatôrs. Stant al organizadôr, il partît politic SPÖ, l’apontament si siere ogni an cuntun belanç di 40 milions di euros: di chest event al profite soredut il turisim vienês.
____________________________________________________
Eurofestival cence i austriacs
Daspò il sucès todesc de zovine Lena, si è vierte in Austrie daurman su lis primis pagjinis dai gjornâi une discussion su la necessitât di cjapâ part al concors european di musiche, soredut pal fat che la prossime Eurovision si davuelzarà propit in Gjermanie. E cui che al cognòs la anime austriache al sa che dut ce che al è leât al grant fradi todesc si trate intun mût une vore competitîf. La Austrie e à partecipât pe prime volte tal 1957 ae seconde edizion dal concors di cjançon Eurovision. Tai agns 1973-1975 i austriacs si ritirin par vie di disinterès, tal 1998 e tal 2001 par vie di risultâts negatîfs, tal 2006 di gnûf assents come che al è sucedût tai ultins trê agns.
Prin puest cun Udo Jürgens tal 1966
La Austria e vincè il concors european tal 1966 cun «Merci, Chérie» di Udo Jürgens. La cariere di Udo Jürgens, composidôr e cjantant di musiche popolâr dal stîl schlager e pop, e dure za di plui di 50 agns. Al à scrit plui di 900 cjançons e vendût tor 100 milions di copiis, fasintlu deventâ un dai artiscj di plui grant sucès tal mont e il cjantant plui vendût in Austrie.
JANEZ ERAT