Sfuei Mensîl Furlan Indipendent
Archivi de Patrie

TERITORIS – INTERNAZIONÂL. Novitâts positivis pai partîts nazionalitaris

............

E je une situazion dal dut gnove chê che e je saltade fûr des elezions gjenerâls che si son davueltis intal Ream Unît ai 6 di Mai. Cun di fat, nissun dai partîts in cjamp al à otignût une maiorance che i permetès di guviernâ di bessôl. I Conservadôrs a son stâts i plui votâts, ma par imbastî un guvier di maiorance a varessin vût di vê almancul 326 deputâts e invezit si son fermâts a 306. Cussì – fat pardabon storic – i Tories a àn metût sù un guvier di coalizion cui Liberâi Democratics. Chest ultin partît al à vût il 23% des preferencis (+ 1%) e 57 elets (- 5). I Laburiscj, cul lôr 29% dai vôts (-6,2%) e 258 elets (- 91), si ricjatin invezit ae oposizion. Tra lis novitâts di segnalâ ancje il prin parlamentâr elet tra lis filis dai Verts. I partîts nazionalitaris a àn cressût un tic la lôr presince intal Parlament di Londre, ma no àn rivât a jessi decisîfs pe formazion dal guvier cemût che a speravin prime dal vôt.
Lis novitâts plui impuartantis a rivin de Irlande dal Nord, dulà che il front unionist al tache a pierdi colps. Il Democratic Unionist Party al à pierdût il 8,7% des preferencis e il plui impuartant dai siei 9 deputâts, ven a dî il prin ministri nordirlandês Peter Robinson batût de candidade dal Alliance Party che al rive a mandâ pe prime volte un dai siei a Westminster. I Ulster Conservatives and Unionists a àn pierdût il 2,6% des preferencis e no à rivât a elei nancje un deputât. Dute une altre ande, invezit, sul front dai nazionaliscj irlandês. Il Sinn Féin cui siei passe 170 mil vôts (25,5%) al è deventât il partît plui votât de Irlande dal Nord e al à otignût 5 elets. Il Social Democratic and Labour Party al à pierdût cualchi vôt, ma al à mantignût i siei 3 deputâts.
In cuintritindince cul rest de Grande Bretagne, la Scozie e viodût a cressi i vôts pai Laburiscj (42%) e pai nazionaliscj (19,9%). Nissun mudament, invezit, inte composizion de rapresentance scozese a Londre: 41 pal Labour, 11 pai Liberâi Democratics, 6 pal Scottish National Party e 1 pai Conservadôrs. Di notâ che, ancje se il numar di elets al è plui bas, i vôts pal SNP a àn passât chei pai Liberâi Democratics.
In Gales, invezit, i Conservadôrs a son rivâts al 26,1% dai vôts (+ 4,7%) e a son passâts di 3 a 8 elets. Ancje i LibDems a son cressûts (20,1% des preferencis), ma a àn pierdût un dai 4 deputâts che a vevin. I Laburiscj a restin il partît plui fuart dal Gales cul 36,2% dai vôts e 26 elets, ma a àn pierdût 4 parlamentârs e il 6,5% dai consens. I nazionaliscj dal Plaid Cymru, invezit, a àn pierdût il 1,3% des preferencis (cumò a son al 11,3%), ma a àn cressût il numar dai elets di 2 a 3.
In Cornualie si à vût un salt indenant dai Conservadôrs che a àn concuistât 3 des 6 circoscrizions di cheste piçule nazion celtiche che, te legjislature stade, a jerin ladis dutis ai Liberâi Democratics. Pe prime volte i nazionaliscj dal Mebyon Kernow a àn rivât a presentâsi in dutis lis circoscrizions, ma a àn otignût percentuâls che no van plui innà dal 4,2%.
Carli Pup

Contile juste / Plebissît pustiç

Diego Navarria
“MMandi, nono.” “Mandi frut!” “Dai mo, nono, no soi un frut. O ai disenûf agns e o ai pene finît il liceu!” “Par me tu sarâs simpri un frut, il prin nevôt. Però e je vere, tu sês deventât grant, une anime lungje. Se tu cressis ancjemò tu varâs di sbassâti par jentrâ in cjase, […] lei di plui +

Presentazion / Presentazion dal libri “Fûc su Gurize”. Intal ambit dal Cors Pratic di Lenghe e Culture Furlane inmaneâtde Societât Filologjiche Furlane

Redazion
Joibe ai 17 di Avrîl dal 2025 aes sîs e mieze sore sere (18.30)SALE CONFERENCIS DE BIBLIOTECHE COMUNÂLVie Rome 10, Vile di Ruvigne / Via Roma 10, S.Giacomo di Ragogna A intervegnin: DIEGO NAVARRIA colaboradôr dal mensîl ‘La Patrie dal Friûl’e DREE ANDREA VALCIC president de Clape di Culture ‘Patrie dal Friûl’Jentrade libare lei di plui +

L’EDITORIÂL / La lezion de bandiere par dismovisi dal letarc

Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +

La piçade / Fevelìn di autonomie pluio mancul diferenziade

Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +