TERITORIS – SLOVENIE. E je rivade la “vinjeta” pal 2012

NUIE AUMENTS_Intun periodi cetant grivi par vie de crisi economiche come chel che si sta vivint in dì di vuê ancje in Slovenie, une buine gnove e rive de decision de Dars (Družba za avtoceste v Republiki Sloveniji – Societât pes autostradis te Republiche di Slovenie) che pal 2012 e tignarà i stes presits di chest an pes cussì clamadis “vignetis” (“vinjete” par sloven), vâl a dî i bolins che si scuen incolâ sui veris di machinis e motos par cori sui 533 chilometris des autostradis e sui 73 chilometris des superstradis dal paîs nestri vicin. Come che o viodês te tabele chi in bande, cost e durade no son cambiâts. Pai veicui fin a 3 toneladis e mieze di pês, il bolin anuâl al vignarà ancjemò 95 euros, chel par un mês 30 e chel par une setemane 15 euros. Viodìn lis “vignetis” pes motos: 47 euros e mieç par un an, 25 par sîs mês, 7 euros e mieç par une setemane sole.
VERT CLÂR_ La uniche novitât e je che al è mudât il colôr de stesse “vignete”, in maniere che pai poliziots al sedi plui facil viodi za di lontan se cui che al sta menant un veicul su la autostrade al sedi in regule, tal stes timp cence confondi il bolin sloven cun chei di altris paîs: di fat, il colôr dai bolins sielzût pal 2012 al è il vert clâr, a pet dal colôr di rose in vore pal an che al sta par sierâsi. Dut câs atenzion: se o vês comprât il bolin anuâl pal 2011, al restarà valit fin ai 31 di Zenâr dal prossim an. Cheste validitât disìn cussì “sprolungjade” e sarà fate buine ancje pes “vignetis” dal 2012: come pal an passât, a saran validis in dut par 14 mês, dal prin di Dicembar stât (zornade cuant che si è za tacât a vendilis) ai 31 di Zenâr dal 2013. Par cont invezit di chei altris bolins di sîs mes, di un mês o di une setemane, a son valits tacant de date cuant che si ju compre.
VENDITIS_ Secont ce che e à fat savê la Dars, tai prins nûf mês di chest an a son stadis vendudis 833 mil 226 “vignetis” validis par un an, vâl a dî l’un par cent in mancul rispiet al 2010; tal stes periodi, a son stadis vendudis però 983 mil 139 “vignetis” mensîls (il 8,2 par cent in plui dal an stât) e passe doi milions 800 mil bolins valits par une setemane, vâl a dî l’11,5 par cent in plui. Par cont des motos, di Zenâr a Setembar di chest an a son stâts vendûts 2.060 bolins di un an, 16.071 di sîs mês e 37.522 di une setemane. Invezit, dome te prime metât di chest an, la Dars e à incassât 135 milions 600 mil euros, il 4 par cent in plui rispiet al stes periodi dal an passât: 55 milions e mieç a son rivâts dal sisteme des vignetis, 80 milions e 100 mil invezit traviers i paiaments dal transit dai camions, che a àn di paiâ il passaç al casel.
DULÀ COMPRÂ_ Par cuistâ i bolins, in Slovenie a esistin plui di mil ponts vendite, tant che distributôrs di benzine, ediculis e uficis de pueste; lis “vignetis” si podin comprâ ancje in buteghis e casei di diviers paîs de Europe, tant che Austrie, Cravuazie, Ongjarie, Gjermanie, Slovachie, Republiche Ceche, Polonie, Romanie e Danimarcje. Ancje ca di nô, si capìs: stant al sît de Dars (www.dars.si, sît bilengâl par sloven e par inglês), in Friûl a son almancul 24 tra distributôrs di carburants, tabachins, bar e ediculis, di Gurize a Çuian, di Cormons a Gonârs, i puescj li che si podin cuistâ i bolins.
MULTIS_ Cun cui che nol è in regule cu lis “vignetis”, la polizie slovene no scherce: lis multis a van di 300 a 800 euros, ma si paie la metât se cui che al è stât cjatât no in regule al da fûr i bêçs dentri di vot dîs. E di sigûr la idee de “vignete” e à permetût a Lubiane di cjatâ il miluç de magne pes cassis dal Stât. Dal prin di Lui dal 2008, cuant che al fo introdusût il sisteme dai bolins pes autostradis, fin a dut il mês di Setembar di chest an, a son stadis fatis cuasi 164 mil multis, che a àn puartât dongje in dut la bielece di cuasi 25 milions di euros. Par esempli, tai prins nûf mês di chest an lis multis pal mancjât ûs dai bolins o pe lôr no validitât a son stadis 44 mil, uns mil di mancul rispiet al stes periodi dal 2010, e i plui multâts a son stâts i automobiliscj e i motocicliscj forescj. A proposit di multis: come che o vin vût za scrit su la pagjine de Slovenie tal numar de Patrie di Novembar, us ricuardìn che fin ai 15 di Març dal prossim an, come ogni Invier, par lâ in machine tal paîs nestri vicin bisugne vê simpri sot man lis cjadenis di nêf. Se la polizie us cjate cence, la multe e je di 120 euros, ma e pues rivâ a 400 se si bloche il trafic stant fers cu la machine par vie che no si àn lis cjadenis.
ALESSIO POTOCCO