TERITORIS. SLOVENIE. Gurize-Nova Gorica: un avignî adun?

GURIZE E NOVA GORÍCA_ I lôr nons a divegnin dal stes tiermin sloven, vâl a dî gorica, che al sta par “piçule mont, culine”. L’acent, sei par furlan che par sloven e talian, al va simpri su la prime “i”; par chest o podês sintîsi autorizâts a corezi cui che al va indevant a fevelâ di “Nova GÒrica” cence nancje impensâsi di usâsi a spostâ l’acent.
Gurize (Guriza te variant furlane locâl) e Nova Gorica: citâts zimulis, anzit une sole citât, dividude par uns sessante agns di un confin tirât dopo de Seconde vuere mondiâl cence badâ masse ai dans che al varès puartât. In chei timps nol vignive segnât dome un confin framieç lis cjasis e i cjamps tune aree li che furlans e slâfs a vivevin adun di secui, ma ben si decideve cui che al stave “di ca o di là”. E je vere che, cemût che si dîs par solit, in cheste aree la “curtine di fier” e jere jenfri lis plui debilis di dute la Europe, ma la manarie colade ai 10 di Fevrâr dal 1947 cul Tratât di Parîs suntune citât cuadrilengâl i à pardabon taiât lis alis.
DESTINS DIVIERS_ Di chê volte, la “vecje” Gurize e la “Gnove” Gurize a àn vût un diviers destin. Nassude in vie uficiâl propi tal ’47, cjapant dentri cualchi borc storic de perifarie nord-est de citât sul Lusinç, Nova Gorica e à vût un svilup cetant svelt di un pont di viste urbanistic, massime tai agns Cincuante e Sessante. Cui che al è stât lenti vie si è ineacuart daurman de diference jenfri la Gurize dai edificis asburgjics e liberty e la citât slovene, plui scuadrade e razionâl. Cun di fat, lis costruzions che a podin atrai plui la atenzion a son la vecje stazion de ferade transalpine (li che par agnorums e comparive une stele rosse a cinc pontis cu la scrite Mi gradimo socializem-Nô o costruìn il socialisim), il palaç dal municipi, il teatri e la biblioteche. Dut câs si va indevant a fâ sù, terens a disposizion ’nd è ancjemò: une sorte di “spazi vitâl” che Gurize no à plui di tant timp.
POPOLAZION_ A chest si pee la situazion demografiche des dôs realtâts. In dì di vuê il comun-citât di Nova Gorica, che si slargje su 309 chilometris cuadrâts e al cjape dentri 41 piçulis localitâts dut dulintor, al conte pôc plui di 32 mil abitants cjatantsi cussì al decim puest a nivel sloven; la citât par so cont e rive a cuasi 14 mil, mancul –tant par dâ une idee– di Codroip. La popolazion dal comun-citât (cemût che a vegnin clamadis lis citadinis plui grandis de Slovenie) e je in lizêr aument tai ultins agns, stant la migrazion di int che si sposte culì par lavôr. Cun di plui, tal 2008 e je stade regjistrade une cressite naturâl dal numar dai abitants, vâl a dî che i nâts vie pal an a son stâts plui dai muarts: nol capitave dal 1992. Magari cussì no, a pet dai dâts de “zimule” slovene, Gurize e va di chê altre bande: in dì di vuê, suntune superficie comunâl di 41 km², i abitants a son pôc mancul di 36 mil, cuntune diminuzion che e va indelunc di agnorums. Stant ai censiments, tal 1981 i abitants a jerin 41.500, tal ’91 a jerin lâts jù a 38.500: in sumis, –14 par cent in trente agns, tant che la posizion di Gurize come citât clâf dal Friûl di Soreli jevât e cjâflûc di provincie e ven metude in forsit de cressite vivarose di Monfalcon, che e à passât cuote 28 mil.
APONTAMENTS STORICS_ Par chest, dopo de vignude de Slovenie tal 1991 ma soredut dopo dal svicinament di Lubiane ae Union europeane tai ultins agns, si fevele di lavorâ adun a pro de cressite di cheste aree di là dal Lusinç. Cemût meti adun lis fuarcis? Par esempli, i aministradôrs des dôs citâts a àn za provât a impastanâ une linee di autobus tal Novembar dal 2002 jenfri i doi centris cuntun bon sucès. Tai agns dopo si son vûts apontaments che nol è esagjerât definî storics tant che la jentrade de Slovenie te Union europeane (prin di Mai dal 2004), la adozion dal euro di bande di Lubiane (prin di Zenâr dal 2007) e in ultin la jentrade te aree Schengen ai 21 di Dicembar dal 2007, cuant che i confins a son pardabon colâts.
GECT_ Il troi par creâ une citât “uniche” o ancje par svicinâ lis dos realtâts al pâr però ancjemò lunc. Un pas che al podarès jessi decisîf al è stât fat di resint, cuant che ai 22 di Zenâr stâts il sindic di Gurize Ettore Romoli, dutun cui coleghis di Nova Gorica Mirko Brulc e di Šempeter-Vrtojba Dragan Valencˇicˇ, al à firmât l’acuardi par meti in vore il cussì clamât Gect (Grup european di cooperazion teritoriâl): l’obietîf di cheste aleance al è chel di fâ nassi une vere e proprie “citât de Europe”, coordenant lis politichis peadis aes infrastruturis, ai traspuarts, aes risorsis energjetichis locâls e ambientâls pontant ae coesion politiche e sociâl. Midiant il Gect, lis trê aministrazions comunâls a podaran vê a ce fâ in maniere direte cun Bruxelles par domandâ finanziaments comunitaris.
ALESSIO POTOCCO