Dentri de cunvigne internazionâl “Tiepolo pittore europeo” che si è tignude ai 23 di Març inte gnove sede de Fondazion Friûl in vie Glemone a Udin, al è stât presentât il volum “Tiepolo: i disegni” (Scripta Edizioni), curât di Maria Paola Frattolin, storiche de art e presidente de associazion culturâl Itineraria Fvg, promotore de iniziative, dentri de cuarte edizion dal “Festival dei Tiepolo e del Settecento in Europa”, dal professôr de Università Ca’ Foscari Sergio Marinelli e dal ricercjadôr Andrea Piai. Il volum, fat metint dongje scrits dal dut inedits che a indaghin cuntune prospetive origjinâl l’art dal pitôr venezian che tant al à dât al Friûl, come lis oparis maraveosis, par restâ a Udin, conservadis tai Museus Civics dal Cjistiel, inte Catedrâl di Sante Marie Assunte, tal Palaç Patriarcjâl, intal Oratori de Beade Vergjine de Puritât. La publicazion e je il risultât de cunvigne internazionâl che e si jere tignude a Palaç Antonini Belgrado tal Març dal 2022 e w ten dentri i saçs di studiôs di aree furlane, taliane e europeane: Luca Baroni, Antonio Cipullo, Damian Dombrowsky, Maria Paola Frattolin, Gilberto Ganzer, Catherine Goguel, Sergio Marinelli, Roberto Pancheri, Andrea Piai, Lorenza Resciniti, Anna Spera, Ajlin Uluçam.
◆ Giambattista Tiepolo nol jere mestri dome inte tecniche dai frescs, ma al à savût interpretâ il so timp ancje midiant di dissens. Al jere dotât di une man sante, bon di inventâ, e di lui al à imparât so fi Giandomenico. Une schirie di figuris gnovis, in posis origjinâls e in situazions e prospetivis unichis. Ducj elements che si puedin cjatâ ancje in chei che a podaressin passâ par lavôrs minôrs, ma che no son par nuie cussì, come apont i siei dissens.
◆ Il biel libri al è insiorât di tantis fotografiis propit su cheste produzion specifiche. A son imagjins di oparis cjapadis intes sedis indulà che a son conservadis, di Udin a New York, metint adun un volum che al spieghe a clâr il caratar straordenari dai lavôrs di chest mestri. Lis formis dai dissens, la produzion grafiche de zoventût, la analisi di oparis specifichis come il “Consilium in arena”, chês conservadis inte residence di Würzburg, lis creaturis ibridis, il tant che al è conservât inte Collezion Sartorio di Triest e altris di grant interès.
◆ E scrîf la curadore Maria Paola Frattolin te jentrade dal libri: «Il nestri viaç al partìs di Udin e de opare dai mestris venezians, ma al cjale a la Europe e a dut il Sietcent, par cjapâ dentri studiôs talians e europeans, stiçant gnûfs studis sedi su Giambattista che su so fi Giandomenico e su dut il secul XVIII, parcè che inte Etât dai Lums la civiltât europeane e à cjatât pe prime volte un denominadôr comun. E je stade la prime volte che, ancje se tormentade di vueris e devastazions, la Europe e à scuviert un centri agregant inte sô culture portentose, discjadenade di chê sapience che di bessole e ilumine il mont». ❚
“Tiepolo: i dissens”: une publicazion par scuvierzi un patrimoni pôc cognossût
Alessio Screm![](https://www.lapatriedalfriul.org/wp-content/uploads/2024/06/La-copertina-del-libro-22Tiepolo-i-disegni22-Scripta-Edizioni.png)