Domenie ai 15 di Otubar grant conciert tal Salon
dal Parlament di Udin cul solist Aonzo
O vin bielzà scrit dal dopli inovâl di Tite Grison, al secul Giovanni Battista Marzuttini, nassût cent e sessante agns indaûr, e che a son otante agns che al è muart. Lui si firmave “contadin de Basse” ma al jere mestri in tantis robis: inte musiche come compositôr, musicist, diretôr, teoric e fondadôr di orchestris a pletri; inte art figurative come pitôr, fotograf; inte leterature come poete; inte mecaniche come inventôr di machinis e di zûcs. O rimandi ae leture dal articul dedicât tal numar di Jugn de nestre “Patrie” par vê in struc une panoramiche de sô versatilitât creative e dal so estri in tancj cjamps dal savê.
◆ Par memoreâlu e par rindi cont des ativitâts inovativis che la formazion musicâl a lui titulade – la Orchestre a pletri Tita Marzuttini – e propon sedi par i siei components che pal public, e je in program a Udin une “doi dîs” une vore interessante. Sabide ai 14 e domenie ai 15 di Otubar, la orchestre udinese cun a cjâf Rudi Del Fabbro e direzude di Luca Zuliani – orchestre nassude tal 1886, che e je la plui antighe dal mont, inte sô tipologjie, inmò in ativitât, e dal sigûr la plui storiche dal Friûl par chel che al tocje il mandulin e la ghitare – e tignarà une “masterclass” risiervade ai siei components e un conciert cun jentrade gratuite intal Salon dal Parlament dal Cjistiei di Udin, domenie aes 18.30, cul patrocini dal Comun.
◆ Mestri e ospit di ecezion, un talent fûr di misure, o ben il conciertist di fame internazionâl Carlo Aonzo, tra l’altri docent di mandulin tal Conservatori “Girolamo Frescobaldi” di Ferrara. Une ocasion uniche par une zornade intensive di studis dedicade a un program musicâl pardabon particolâr, che dal Baroc al rive al dì di vuê. No mancjarà di ciert une composizion a onorâ Tite Marzuttini, e ancje par ricuardâ i cent e dîs agns de nassite di un altre figure impuartante pe orchestre e pai furlans: Angelo Prenna, diretôr storic de formazion par plui di trente agns, protagonist de vite musicâl udinese a partî dai agns Cincuante. A vignaran eseguidis musichis di Vivaldi, Piazzolla, Marzuttini, Prenna, Bruzzone, Mandonico, Caschetto, Munier, Boni: e se cualchidun di chescj al è pai plui pôc cognossût, si zonte une ocasion par lâ a scoltâ une ecelence furlane insiemi di un talent tant che Aonzo. Chest mandulinist di Savona, in Ligurie, in plui di une ativitât intense di docence e di concierts tant che solist, al colabore cun realtâts di lustri come la Orchestre filarmoniche dal Teatri la Scala di Milan, il Mai Musicâl Florentin, la Nashville Chamber Orchestra, la McGill Chamber Orchestra di Montreal, la Philarmonia di San Pietroburc, i Soliscj de Cjamare di Minsk, il Schleswig-Holstein Musik Festival e altris. Al à vint un grum di premis di grant nivel, al regjistre tancj discs e tra lis curiositâts al è di ricuardâ il fat che cu la sô “Orchestra a Pizzico Ligure” e à sunât par Pape Zuan Pauli II. Tant che ricercjadôr al à scrit la storie dal mandulin pal dizionari di grande nomee “New Grove Dictionary of Music and Musicians”, in plui che vê fevelât di iconografie musicâl dal mandulin in conferencis par istituzions mondiâls come al St. John’s University di New York, ae Boston University, al New England Conservatory di Boston, al Wisconsin Conservatory of Music di Milwaukee e in tantis altris. Une ocasion plui uniche che rare chê di metât Otubar pal public furlan e pe orchestre udinese “Marzuttini”, come dit la plui antighe, scomençade di Nicolò Serafini tal 1886 e afidade a Tite Grison fin dal principi, tant che a partî dal 1926 e cjape il so non. Un organic formât di mandulins prins e seconts, ghitaris e cuintribàs, une realtât dute di gjoldi e di scoltâ. ❚
