Mauro Vidoni al à scrit un libri sul so cont. Si spere intune serie di studis sul gjeni furlan
Ancje il Friûl al à vût il so Leonardo Da Vinci, plui che rinassimentâl, romantic, vivût a cjaval tra il Vot e il Nûfcent. Romantic ta la anime, liberty tal spirt, futuristic tal pinsîr, ancje se al à simpri declarât, almancul tal cjamp des arts, di preferî lis vecjis formis de tradizion a chês gnovis des avanvuardiis. No dome artist estrôs, ma ancje tecnic, pratic, razionâl. Al è Giovanni Battista Marzuttini, “Tite Grison, contadin de Basse”, come che i plaseve firmâsi, musicist, compositôr, diretôr musicâl par bande, côr, orchestre a pletri, lui che di cheste forme strumentâl cun ghitaris e mandulins, al è stât in cualchi maniere un pari chi di nô. Ma ancje poete, pitôr, fotograf, mecanic, eletromecanic, inventôr, costrutôr di machinis futuristichis e di zûcs automatics par fruts. Un om cence limits di sorte, se no chel di no jessi stât masse capît ai siei timps e ancje cumò in cualchi maniere dismenteât, se nol fos par cualchi realtât che inmò cumò e ten alte la sô memorie, come il côr “Tite Grison” e la orchestre a pletri udinese “Giovanni Battista Marzuttini”.
◆ A colin in chest 2023 i 160 agns de sô nassite e i 80 de sô muart, lui nassût a Udin ai 9 di Fevrâr dal 1863 e muart a Favuîs il prin di Dicembar dal 1943.
◆ Al à fat studis iregolârs, il nestri Tite, no rivant adore di fantat a distrigâsi su cuâls des sôs passions seguî. Prin di cinc fradis, so pari al jere un benestant che al lavorave al Monte di Pietà e sô mari e jere une femine di une cierte culture, sûr dal patriote talian, filantrop e pianist Carlo Facci. Al ven su musicalmentri studiant cun lui, al tache il gjinasi e al ven convinçût a fâ la cariere militâr, si crôt stiçât dal barbe. Alore al va a Milan, ma chel in divise nol è mistîr par lui. Al torne in Friûl e al finìs a Cividât, daspò al cambie e si inscrîf al Istitût Tecnic Zanon di Udin, ma nol finìs nancje chei studis. Al vûl dâsi ae art figurative. Dopo cualchi lavorut come cronist intune dite di Udin, al cjape e al va a frecuentâ la Academie di Bielis Arts di Florence, tant che al rive a cjapâ il titul di mestri di dissen. Intant al continue cu la musiche e al studie, lant e tornant a Udin, cun Luigi Cuoghi, mestri di armonie e cuintripont, e strumentazion cul boem Edoardo Arnhold. Ma nol rive a cjapâ un titul musicâl, parcè che il Conservatori di Milan, indulà che al veve intenzion di diplomâsi, lu scarte. Cheste in struc la sô cariere di studis incuiete.
◆ Al è jessût di pôc un biel libri che al conte, ancje se in curt ma di sigûr benon, la sô vite, chest intai prins cjapitui di un preseât dopli volum che si concentre in particolâr su une part de produzion musicâl sacre di Marzuttini, chê plui trascurade ma che è meritevule di tantis atenzions. Chest libri al è stât scrit dal mestri compositôr e diretôr Mauro Vidoni e si titule “Giovanni Battista Marzuttini. Messa Rosa Mystica. Messa a tre voci d’uomo con organo e piccola orchestra ad libitum” (Gaspari editore, 2023). A cheste composizion mistiche al è dedicât il secont volum, indulà che Vidoni al opare une revision metodiche, presentant cheste Messe, componude tal 1927, in edizion moderne. Pardabon un biel lavôr che si cale intune prospetive une vore interessante inte suaze de produzion musicâl dal nestri Leonardo furlan, un corpus la plui part inedit che al conte tocs par pianoforte e harmonium, musiche varie di cjamare, ariis di salot, oparetis, vaudevilles, tocs liturgjics e tantis bielis vilotis su peraulis sôs, di Zorutti, Locatelli, Chiurlo e Cuoghi. E esist une racuelte publicade di Montico tal 1930.
◆ Tante stime al à vût Marzuttini ancje a Triest, indulà che al à vivût par un biel toc, clamât par insegnâ musiche e par inviâ une orchestre di mandulins. Tra l’altri, al à publicât par Schmidl varie musiche e impuartants tratâts e metodis sul mandulin, tradusûts in cuatri lenghis, comprendût il gjaponês.
◆ Lant a dâ un voli aes sôs invenzions e costruzions, invezit, si scuvierç che Marzuttini al à fat ancje struments musicâi, come il tricordo e mandulis cul fonts in cjarte pestade.
◆ Pe dite Coccolo al à inventât un sisteme par produsi scjatulis di fulminants cence scarts, intal so garage in Largo delle Grazie a Udin al traficave cun motôrs a sclop, al à costruît la “Colibrì”, une machine cuntun sôl puest, tra l’altri al è stât il prin a Udin a vê la patent. Mancul ben e je lade cuant che al à provât a costruî un avion, che nol à rivât adore di fâi cjapâ il svol. Cuant che si è metût invezit a fâ zuiatui automatics par une dite napoletane, tant al è stât stimât e tancj prins premis al à vinçût, come tes fieris a Udin, Milan e Sanremo, che il re Vittorio Emanuele III i à dât il titul di Cavalîr de Corone di Italie. Ritirât daspò des angariis de vuere in Friûl, si è fat cjase a Fauvîs tal comun di Gonârs, là che al è stât ancje comissari prefetizi, podestât e sindic. Dute la sô opare musicâl e je conservade tal fonts dedicât al Conservatori Tomadini di Udin e e spiete inmò di jessi frontade e studiade benon. ❚
