Origjinari di Tumieç, al lavore come preparadôr atletic cu la scuadre de Universitât di Stenhus, dongje Copenaghen
Si pense dispès che il Friûl al sedi une tiere indulà che i zovins cun competencis e voie di fâ a cjatin la lôr strade, miôr che in altris zonis. Purpûr, cul cognossi lis personis, si capìs che fûr de Patrie a son ocasions di cjapâ ancje par chei che il lavôr lu àn e, tantis voltis, al è un cjaminâ intal miôr. L’esempli di Tommaso Mazzilis, di Tumieç, al figure ben il pinsîr. Daspò tancj agns come alenadôr atletic di tantis scuadris di nivel, a Udin, al è rivât a vuadagnâsi une biele cariere in Danimarcje, intun college internazionâl, là che al lavore cun struturis e risorsis cetant plui sioris di chel che al è in Friûl. E ancje il tratament de sô professionalitât al è cetant plui concret. Tant che Tommaso al fevele sclet, gjavantsi cualchi clap dal scarpet.
_
Tommaso Mazzilis, dal Friûl ae Danimarcje: conte lis resons dal viaç.
“Si fevele simpri di sburtâ i zovins a fâ esperiencis fûr di cjase: lâ ator, cognossi ambients di lavôr gnûfs. In realtât, la mê e je state propit une emigrazion! No ai fufe a dîlu. In Friûl, sedi pe Universitât, sedi pai agns passâts cu lis scuadris che ur soi stât daûr, al è lât dut avonde ben. Dut câs o sintivi che o scugnivi fâ un pas indenant, soredut dal pont di viste economic, o soi sincîr. In Danimarcje si sta ben e, pardabon, achì il gno al è considerât un lavôr plen, robe che in Italie nol esist. Al è just dî che o jeri in societâts che, almancul a nivel talian, a jerin tai prins puescj. Cumò il moment nol è facil in Italie, massime pai zovins: par chest o soi vignût ca sù. Sante scugne”.
_
Cuale ise la tô ativitât?
“O ai vude la fortune di cjatâ une oportunitât achì, in Danimarcje: emigrâ ca sù, cjatant un lavôr di cualitât. Disìn che la fortune, par me, e je stade dople. O lavori in chel che si clame Stenhus Gymnasium, un college che al è afiliât ae scuadre di bale tal zei de citât di Holbæk, a une ore di machine di Copenaghen, sul Mâr dal Nord. Un puest cetant biel, il clime al è plasevul, si sta ben: al podeve lâmi une vore piês! A nivel di struturis, al somee di stâ intun college american. O ai dut ce che mi covente par davuelzi al miôr il gno lavôr di alenadôr fisic e atletic cui zovins students e atletis”.
_
Conte dai tiei zovins atletis.
“Ducj zovins che e àn culture dal lavôr e, cul fat che o vin struments che a son a nivel di Euroleghe, la massime competizion di bale tal zei europeane e, forsit, ancje miôr, si pues meti sù programs di alenament che al è dificil viodi di altris bandis. In Danimarcje cumò a sburtin une vore su chest stamp di ativitât, cul jutori di aziendis privadis che a fasin di sponsor e a batin sul fier: lis risorsis a son impuartantis”.
_
Cemût funzionie le scuele?
“Al è diferent di ce che o sin usâts. Ogni an, la scuele e à un budget e ognidun al decît cemût che al à di spindi i bêçs che si cjate inte sachete. Salacor pe didatiche, par cualchi progjet, par assumi cualchi professôr o altri personâl, pes struturis sportivis o pes ativitâts culturâls. O vin la fortune che, cumò, achì a sburtin sul sport”.
“O stoi daûr ae scuadre di bale tal zei e, di pôc, ancje ae scuadre di badminton. Di bot, chei che a fasin badminton mi àn sorprendût une vore cu la lôr potence atletiche: no crodevi. Il divertiment al è pardabon tant”.
_
Cualchidun ti aial sburtât?
A son stâts fondamentâi i contats che o soi rivât a ingrumâ intai agns. Mi soi cjatât tal puest just, intal moment just. Jessint stât cu la Apu e cu la Women Apu di Udin, in cinc agns o vin partecipât a almancul vinç finâls talianis cui zovins e chest al à judât une vore. Intal curriculum o ai metût esperiencis impuartantis. Se mi impensi che o ai mateât cun atletis di nivel, ancje vie pe lôr riabilitazion fisiche dopo di cualchi infortuni, o soi rivât a vê une esperience complete, che cumò e zove. La svolte e je rivade cu la Nazionâl taliane, al campionât european feminin di Sopron, in Ongjarie, un pâr di agns indaûr: chest element al pese une vore intal proponisi fûr de Italie. E massime al Stenhus, cul jessi un college di prin nivel, a tindin a cjalâ ciertis referencis”.
_
Fevelistu danês?
“Par dî contâ la veretât, o soi daûr a insegnâ un tic di talian a ducj. A son une vore di insegnants che a comprin cjase in Italie, par trasferîsi in vacance, e a àn voie di imparâ la lenghe. Darest, i insegnants danês a son i miôr paiâts di dute la Europe. Intai agns, a àn gjoldût di un boom economic di no crodi, a àn bêçs e, par lôr, la Italie al è il miôr puest par invistî. I presits des cjasis, in Italie, a son cetant convenients par ducj lôr. Se tu viodessis ce machinis che si cjatin intal parcament de scuele…”
_
Intal specific, ce tipologjie di lavôr âstu di fâ?
“Cul fat che o sin intun college, l’obietîf al è simpri chel di formâ zuiadôrs che dopo a laran intes scuadris professionistichis e semi professionistichis. L’an passât o sin rivâts tierçs cu lis frutis de scuadre under 19 e seconts cu la scuadre masculine, e si sin salvâts cu la prime scuadre. Intal campionât nol è un limit pai zuiadôrs forescj: pe medie dal campionât, o vin une vore di atletis danês, plui di ducj chei altris. La scuele e je internazionâl, ven a stâi che a son ducj zovins e motivâts. Par contâ: in Italie, in serie A, al zuie cualchi american che al è cuotât e ducj lu cognossin. Achì, a rivin zuiadôrs che a àn voie di metisi in mostre e fâ cariere: dutis lis partidis a son pardabon bataiis”.
_
Il frico sigûr.. e altris robis che a ti mancjin de tô Patrie?
“Par sigûr, mi mancje il mût di leâ e familiarizâ che o vin in Italie. Ancje a Udin e in Friûl o sin une vore plui vierts. Il standard danês al è une vore sierât. A son distacâts parcè che a son cussì e al è dificil fâ amicizie. A son come cocos, dut câs, cuant che tu rivis a rompi la scusse, a son dolçs come un toc di cjocolate. A son onescj e leâi: bielis personis”.
__
Tropis voltis rivistu a vignî a cjase?
“Dôs o trê voltis par an. Cumò o soi achì, a mateâ cu la scuadre gnove parcè che la stagjon sportive e tache daurman. Nol è tant timp di pierdi”. ❚
:::::::::::::::::::::::::::::::::::::::::::::::::::::::::::::::::::::
Une vite sot dai zeis
Prime zuiadôr, daspò student di siencis motoriis e alenadôr in serie A
e pe nazionâl taliane dai zovins
Tommaso Mazzilis al è origjinari di Tumieç e al à tacât a zuiâ di bale tal zei a Udin. Dopo dal liceu, si è iscrit a Siencis motoriis a Glemone, scomençant a lavorâ cu lis scuadris zovinis de Apu Udin intun prin moment e plui tart cu la scuadre feminine. Di chê strade, al à lavorât come volontari ai tancj campionâts europeans e mondiâi che si son zuiâts in Friûl dal 2014 indenant, massime cu lis scuadris nazionâls de Letonie, e tignint il pas al è rivât a seguî la nazionâl feminine taliane ai campionâts europeans under 20 di Sopron, intal 2022, indulà che la Italie e à vinçût il bronç. Cul titul di dotôr di siencis dal sport cjapât ae Universitât dal Friûl, al è in Danimarcje dal an passât, lavorant tant che “Strength and Conditioning Coach”, par doprâ la definizion internazionâl. Dal Friûl a Copenaghen, par deventâ un dai plui preseâts professioniscj intal so setôr. ❚
