Trop sono malâts di moto i furlans? Sal domandìn a 30 agns de scree de peraule par dî bikers: motârs

Furlans motârs e malâts di motos? A sintî chei che no ju puedin viodi, si disarès di no. Ma la storie lungje e tribulade dal popul des dôs ruedis – che e à scugnût puartâ la caravane dai motârs di une bande a di chê altre ator pal Friûl par organizâ il lôr motoradun plui impuartant, la Biker Fest International, dopo di agnorums tal Parc dal Rivelin di Osôf di Osôf (ma tacade a Vilegnove), prime tune trasfierte al Çoncolan, po dopo a Lignan – e somearès contâ l’esat contrari. Numarons: un event che di une bande al puarte in Friûl int di dute Europe, e di chê altre al puarte dongje cualchi carantan, se no altri pai locâi dongje di dulà che e je la fieste. Po dopo, une considerazion: si vierç l’Istât e cu lis bielis zornadis, si viodin a butinton. Insome, che a plasin o no, a son un fenomen di contâ.
Cui che a son chei cu la moto Daûr dai prejudizis, no tu ur daressis un franc. Fevelant cun lôr, si reste maraveâts. Provait a domandâur ce mistîr che a fasin te vite di ogni dì. No peçotârs: no cate il cjaveli lunc e ont, lis cjadenis, il fâ di spacons e dut chel corean. Cui sono i motârs? Pal plui: avocats, nodârs, professioniscj. I motârs vêrs a son int serie te vite di ogni dì e la moto probabilmentri e rapresente une valvule di sbroc des tensions e des dinamichis de cuotidianitât. Indagant su di lôr, o ai scuviert ancje che il tiermin biker, par dî il vêr, al à dentri tantis declinazions. No je dome une moto. E l’event di Lignan al tire dentri pal plui apassionâts des motos “custom”: ven a stâi chei che les “customizin”, lis personalizin di strichis e di piel, di cjadenis e motôr a manete. Motos customizadis a son chês strambis, cu la sente basse e lungje, il manuvri bas e slungjât. Insome: chês che a fasin plui sene (e ancje plui rumôr).
I numars des “dôs ruedis” Cirint i numars daûr dal fenomen, lis provinciis furlanis a van daûr de medie taliane in merit ae presince di motos: Gurize a ‘nd à 10,6 ogni 100 abitants; Pordenon 7,7; Udin 8,6. La medie taliane e je invezit 10,6 motos par 100 abitants. Numars che a vegnin de ultime rilevazion fate tal 2013, par cure de Aci e dal Centri Studi dal Censis e che a metin adun ducj i mieçs su dôs ruedis, e duncje ancje i “cincuantins” dai adolessents.
Une peraule furlane al puest di chê inglese Dal sigûr il 2016 al segne l’inovâl de peraule Motârs, doprade pe prime volte tal 1986 par definî il tiermin inglês di Bikers: al jere il non dal club di passionâts di moto che tal 1987 al organizà la prime Biker Fest a Vilegnove di Sant Denêl. Tal 1991 e nassè ancje la lôr riviste, che si clamarà Bikers Life e par tancj agns e sarà la uniche fate in Friûl e distribuide tes ediculis di dute Italie. Moreno Persello, un dai fondadôrs dal club, al veve contât a Christian Romanini, intune interviste ae Patrie di cualchi an za fa: «Il club al è stât sierât ae fin dai agns Novante e cumò la fieste e je gjestide di une associazion. La plui grande sodisfazion dopo vê sierât il club e je che, vint inventât il non Motârs in lenghe furlane, ducj i motocicliscj furlans cumò si clamin Motârs! Une grande sodisfazion par ducj nô che o vin fat part dal club: si sintìn un pôc i gjenitôrs di ducj»
Sino tiere di motârs? Il fat al è che la tiere furlane e pâr che e vedi propite vocazion pai motârs. O sin storichementri un teritori di passaç: par Austrie e Gjermaniis, dulà che la tradizion dai motârs e je plui consolidade, o sin une tiere di mieç e di passaç, cussì come pai paîs a soreli jevât, tant che Slovenie e Cravuazie, che a stan propit vivint une lôr vierte in tiermins di turisim a dôs ruedis. O vin curvis, pas, monts e bielecis di paisaçs, sedi su lis distancis lungjis che su chês curtis. O vin une culture locâl di fâ viodi e di ‘vendi’: gustâ a presit acetabil, culture di viodi e di discuvierzi sore nuie. Forsit o varessin di pandi di plui chescj aspiets jenfri cheste categorie di turiscj e di jessi plui tolerants viers di lôr. Ae fin, e je juste dome un pôc di confusion di motôrs in plui. ❚
✒ Oscar Puntel